භූ කම්පනයකට ලක්ව විපතට පත් වූ මියන්මාර ජනතාව වෙනුවෙන් ඇමරිකානු ඩොලර් මිලියනයක මුදල් ආධාරයක් ලබාදීමට ශ්‍රී ලංකා රජය තීරණය කර ඇති අතර, එයට අදාළ චෙක්පත ජනාධිපති ලේකම් ආචාර්ය නන්දික සනත් කුමානායක මහතා විසින් ශ්‍රී ලංකාවේ මියන්මාර තානාපතිනි මාලර් තන් ටයික් මහත්මිය වෙත අද (10) ජනාධිපති ලේකම් කාර්යාලයේදී පිරිනමන ලදී.

වර්තමාන ආර්ථික අර්බුදයක නිරතව සිටින ශ්‍රී ලංකාව මියන්මාර ජනතාව වෙනුවෙන් මෙවැනි ආධාරයක් ලබාදීම අගය කළ යුතු බවත්, ජනාධිපති අනුර කුමාර දිසානායක මහතා ඇතුලු රජයට එම පිහිටවීම සඳහා ස්තූතිය පළ කරන බවත් තානාපතිවරිය අවධාරණය කළාය.

ඒ අනුව, අසීරුකමට පත් වූ මියන්මාර ජනතාවට සහන කණ්ඩායම් සහ සෞඛ්‍ය කාර්ය මණ්ඩල යොමු කිරීම පිළිබඳවද උණුසුම් කෘතඥතාව පළ කරන ලදී.

ශ්‍රී ලංකාව සහ මියන්මාරය අතර පවතින දිගුකාලීන ආගමික සහ සංස්කෘතික සබඳතා තවදුරටත් වර්ධනය වන බවද තානාපතිවරිය සදහන් කළාය.

මෙම අවස්ථාවට ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ, මියන්මාර තානාපති කාර්යාලයේ Winh Wint Khaus Tun සහ Lei Yi Win යන මහත්ම මහත්මීන් ද සහභාගී වී සිටියහ.

වෛද්‍ය කර්මය සඳහා වන පරිපූරක වෘත්තීන් ලෙස වෛද්‍ය රසායනාගාර කාර්මික විද්‍යාඥ සහ භෞත චිකිත්සක තනතුරු සඳහා අනුස්ථාපන හා සමායෝජන පාඨමාලා සදහා උපාධිධාරීන් බඳවා ගැනීමේ තරඟ විභාගය 2025 අප්‍රේල් මස 27 වන ඉරුදින පැවැත්වීමට කටයුතු කර ඇති බව සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම් (පාලන II) චාමික එච්. ගමගේ මහතා සඳහන් කළේය.

මෙම තරඟ විභාගය සඳහා සුදුසුකම් ලත් අයදුම්කරුවන්ට මේ වන විට ප්‍රවේශ පත්‍ර නිකුත් කර ඇති අතර, අයදුම්කරුවන්ගේ සංඛ්‍යාව 600 කට අධික බවද වැඩිදුරටත් අනාවරණය විය.

විභාගය පැවැත්වෙන විභාග මධ්‍යස්ථාන ලෙස කොළඹ හෙද විදුහල, කඳාන හෙද විදුහල, කොළඹ පශ්චාත් හෙද විදුහල සහ කාසල්වීදිය කාන්තා රෝහල නම් කර තිබේ.

අදාළ තරඟ විභාගය සම්බන්ධයෙන් වැඩිදුර තොරතුරු සෞඛ්‍ය අමාත්‍යාංශයේ නිල වෙබ් අඩවිය වන www.health.gov.lk ඔස්සේ ලබාගත හැක.

ඇමෙරිකාව විසින් පැනවූ නව තීරු බදු ප්‍රතිපත්තිය හමුවේ ශ්‍රී ලංකා ආර්ථිකය මත ඇතිවිය හැකි බලපෑම් හා ඒ හමුවේ ගතයුතු ක්‍රියාමාර්ග පිළිබඳව සාකච්ඡා කිරීම සඳහා පක්ෂ නායක හමුවක් අද (10) ජනාධිපති කාර්යාලයේදී පැවැත්විණි.

මෙම හමුව ජනාධිපති අනුර කුමාර දිසානායක මහතාගේ ප්‍රධානත්වයෙන් පැවැත්වූ අතර, විපක්ෂ මන්ත්‍රීවරුන්ගේ ඉල්ලීමක් අනුව ජනාධිපතිවරයා විසින් මෙය කැඳවනු ලැබීය.

අදාළ තීරු බදු තත්ත්වය සම්බන්ධයෙන් රජයට නිර්දේශ ඉදිරිපත් කිරීම සඳහා පත් කළ කමිටුව ඉදිරිපත් කළ යෝජනා පිළිබඳවද, මෙතෙක් රජය ගෙන ඇති පියවර පිළිබඳවද ජනාධිපතිතුමා පක්ෂ නායකයන් දැනුවත් කල අතර විපක්ෂ පාර්ශවයන් ඉදිරිපත් කළ යෝජනාද විශේෂයෙන් සලකා බැලිණි.

ඇමෙරිකානු රජය සමඟ මේ සම්බන්ධයෙන් සාකච්ඡා කිරීමට යෝජනා සකස් කිරීම සහ අපනයන ගමනාන්ත විවිධාංගීකරණය පිළිබඳ කරුණුද පුළුල්ව සාකච්ඡා කෙරිණි. කමිටු යෝජනා සහ පක්ෂ නායකයන්ගේ යෝජනා ඒකරාශි කර ගනිමින් වැඩිදුර සාකච්ඡා සඳහා තීරණය කෙරිණි.

මෙම හමුවට විපක්ෂ නායක සජිත් ප්‍රේමදාස මහතා ඇතුළු පාර්ලිමේන්තු මන්ත්‍රීවරුන් වන හර්ෂ ද සිල්වා, එස්. රාසමාණික්කම්, රවී කරුණානායක, ඩී.වී. චානක, මනෝ ගනේෂන්, පලනි දිගම්බරම්, එම්.එල්.ඒ.එම්. හිස්බුල්ලා, රිෂාඩ් බදුර්දීන්, දිලිත් ජයවීර, ජීවන් තොණ්ඩමන්, දයාසිරි ජයසේකර, ඒ. අර්චුනා සහ ස්වාධීන මන්ත්‍රීවරුන් වන ගයන්ත කරුණාතිලක, කාවින්ද ජයවර්ධන, එස්.එම්. මරික්කාර්, කාදර් මස්තාන් යන මහත්වරුන් ද සහභාගී විය.