සංචාරකයින්ගේ විශේෂ අවධානයට ලක්වන ලෝක උරුමයක් වූ සීගිරිය සුරක්ෂිත කිරීම සහ සංවර්ධනය කිරීම සඳහා රජය දැඩි අවධානය යොමුකර ඇත.

පුරාවිද්‍යා දෙපාර්තමේන්තුව, මධ්‍යම සංස්කෘතික අරමුදල සහ අනෙක් රාජ්‍ය ආයතන කිහිපයක් සමඟ එක්වූ කමිටුවක් විසින් සීගිරි උරුමය ආරක්ෂා කිරීම සඳහා නිර්දේශයන්ගෙන් සමන්විත වාර්තාවක් සකසා, බුද්ධ ශාසන ආගමික හා සංස්කෘතික කටයුතු අමාත්‍ය ආචාර්ය සුනිල් සෙනෙවි මහතාට පසුගිය දිනක භාරදුන් බව දැක්වෙයි.

මෙහිදී අමාත්‍යවරයා පැවසුවේ, සීගිරි පර්වතය වටා මීටර් 200-400 ක ප්‍රදේශය සංවේදී කලාපයක් බැවින්, එම ප්‍රදේශයේ ජීවත්වන ජනතාවගේ ජීවිතයට හානි නොවී පාරිසරික හා සන්ස්කෘතික වටිනාකම් ආරක්ෂා කරමින් එම ජනතාවට වෙනත් ජීවනෝපායන් ලබාදීමෙන් ඔවුන් එම ස්ථානවලින් ඉවත් කළ යුතු බවයි.

සීගිරි චිත්‍ර, පර්වතය, කුරුටු ගී සහ අවට හරිත භූ දර්ශනය සුරක්ෂිත කිරීම අනාගත පරපුර සඳහා මහඟු වගකීමක් වන අතර, මෙය ක්‍රියාත්මක කළ යුත්තේ සුලොගිත් සැලැස්මක් යටතේ යැයිද අමාත්‍යවරයා වැඩිදුරටත් පැවසීය.

මෙම අවස්ථාවට මධ්‍යම සංස්කෘතික අරමුදලේ අධ්‍යාක්ෂ ජනරාල් ආචාර්ය නිලාන් කුරේ මහතා ඇතුළු රාජ්‍ය නිලධාරීන් පිරිසක්ද සහභාගි වූහ.

පාරිභෝගික කටයුතු පිළිබඳ අධිකාරිය සහ ලුණු නිෂ්පාදකයන්ගේ සංගමය අතර පැවැති සාකච්ඡාවකදී ලුණු සඳහා උපරිම සිල්ලර මිලක් තීරණය කළ බවට පළවූ මාධ්‍ය වාර්තා අධිකාරිය ප්‍රතික්ෂේප කරයි.

එවැනි සාකච්ඡාවක් මෙම අධිකාරිය සහ සංගමය අතර සිදු වී නොමැති බව සඳහන් කරමින් නිවේදනයක් නිකුත් කර ඇත. උපරිම මිලක් තීරණය කිරීම සඳහා පාරිභෝගික කටයුතු පිළිබඳ සභාව විසින්, ලුණු නිෂ්පාදකයන්ගේ සංගමය කැඳවා අදහස් ලබාගෙන ඇති අතර, එම සාකච්ඡාවේදී මතු වූ කරුණු සැලකිල්ලට ගනිමින් අවසන් තීරණය ලබාදෙන්නේ සභාවය.

එම සභාවේ තීරණය අනුව අධිකාරිය ගැසට් නිවේදනයක් නිකුත් කරනු ලබන අතර, සංගමය විසින් මාධ්‍ය වෙත ඉදිරිපත් කළ මිල ගණන් හා අධිකාරිය සමඟ එකඟතාවක් තිබූ බව සඳහන් කිරීම වැරදි බව ද අධිකාරිය පැවසියි.

තවද, කිසිඳු තොරතුරක් හෝ මිල ගණන් සඳහන් නොවූ ලුණු වර්ග වෙළෙඳපොළට නිකුත් කිරීමේ උත්සාහයන් පවතින අතර, එවැනි භාණ්ඩ සම්බන්ධයෙන් නීතිමය පියවර ගන්නා බව ද නිවේදනයේ සඳහන් වේ. ඒ අනුව, ව්‍යාපාරිකයන් භාණ්ඩ ලබාගත් ආනයනකරුගේ හෝ නිෂ්පාදකයාගේ නිවැරදි තොරතුරු සහිත බිල්පත් තබාගත යුතු අතර, එවැනි පතක් නොමැතිව භාණ්ඩ තබාගෙන සිටින පිරිස්වලටද නීතිමය ක්‍රියාමාර්ග ගන්නා බව ද අවධාරණය කර ඇත.

2025 වසර සඳහා පැවති රජයේ වෛද්‍ය නිලධාරීන්ගේ සංගමයේ වාර්ෂික නිලවරණයෙදී වෛද්‍ය සංජීව තෙන්නකෝන් මහතා නැවතත් සභාපති ලෙස තේරී පත් විය.

එමෙන්ම වෛද්‍ය ප්‍රභාත් සුගතදාස මහතාද යළි සංගමයේ ලේකම් ලෙස පත්වුණි.

මෙම නිලවරණය 2025 ජුනි 28 දා පැවැත්වූ අතර, ඡන්ද 60%කට වඩා වැඩි ප්‍රතිශතයක් ලබාගෙන ඔවුන් ජයග්‍රහණය කළේය.

මෙවර මැතිවරණයේදී සංජීව-ප්‍රභාත් පාර්ශ්වයෙත්, දර්ශන සිරිසේන සහ හරිත අලුත්ගේ නියෝජනය කළ තරඟකාරී පාර්ශ්වයෙත් අතර දැඩි තරඟයක් දක්නට ලැබුණි.

අවසානයේදී, සංජීව තෙන්නකෝන් සහ ප්‍රභාත් සුගතදාස පාර්ශ්වය ආයතනික බලය තහවුරු කර ගන්නට සමත් විය.