ශ්‍රී ලංකාවේ සංවර්ධන ගමනට ලෝක බැංකුවේ සහය ගැන වැඩිදුර සාකච්ඡා කිරීම සඳහා එම සංවිධානයේ සභාපති අජේ බංගා (Ajay Banga) මහතා ජනාධිපති අනුර කුමාර දිසානායක මහතා හමුවීමක් අද (07) පස්වරුවේ ජනාධිපති මන්දිරයේදී සිදු විය.

වසර 20කට පසුව ශ්‍රී ලංකාවට පැමිණි පළමු ලෝක බැංකු සභාපතිවරයා ලෙස අජේ බංගා මහතාගේ සංචාරය විශේෂ වැදගත්කමක් ලබාගෙන තිබේ.

මෙම හමුවේදී, ශ්‍රී ලංකාවේ සංවර්ධන අරමුණු සාර්ථක කර ගැනීම සඳහා කෙටිකාලීන සහ දීර්ඝකාලීන ක්ෂේත්‍රවල ලෝක බැංකුවේ සහය ලබා ගැනීම පිළිබඳව පුළුල් සාකච්ඡාවක් පැවැත්වුණි. විශේෂයෙන්ම ඩිජිටල් පද්ධති සංවර්ධනය, සංචාරක කර්මාන්තය, කෘෂි අංශය, යටිතල පහසුකම් සහ උතුරු-නැගෙනහිර සංවර්ධනය යන ක්ෂේත්‍රවල අවධානය යොමු කෙරුණි.

එසේම, නව ආයෝජකයන් මෙරටට ආකර්ෂණය කිරීම සඳහා අවශ්‍ය නෛතික හා ප්‍රතිපත්තිමය රාමුව සකස් කිරීමට රජය ගෙන ඇති පියවර සම්බන්ධයෙන් ද සාකච්ඡා කර ඇත.

මෙම හමුවට ලෝක බැංකුවේ විශේෂ උපදේශක ට්‍රෙවර් කින්කේඩ්, දකුණු ආසියානු කලාපීය අධ්‍යක්ෂ ඉමාද් ෆැකවුරි, ශ්‍රී ලංකාව, නේපාලය සහ මාලදිවයින සඳහා අධ්‍යක්ෂ ඩේවිඩ් සිස්ලන්, නේවාසික නියෝජිත ගිවෝර්ග් සාර්කස්ජාන් සහ ශ්‍රී ලංකා රජයේ උසස් නිලධාරීන් රාශියක්ද එක්විය.

මේ අතර, කම්කරු අමාත්‍ය අනිල් ජයන්ත ප්‍රනාන්දු, මුදල් නියෝජ්‍ය අමාත්‍ය හර්ෂණ සුරියප්පෙරුම, ජනාධිපති ජ්‍යෙෂ්ඨ අතිරේක ලේකම් රසල් අපොන්සු යන මහත්වරුන්ද මේ සඳහා සහභාගී වී සිටියහ.