අග්නිදිග ආසියාව පුරා නව කොවිඩ්-19 රැල්ලක් ආරම්භ වී ඇති බව විදෙස් වාර්තා සඳහන් කරයි. චීනය, සිංගප්පූරුව, තායිලන්තය සහ හොංකොං ඇතුළු රටවල දහස් ගණනක් රෝගීන් වාර්තා වන අතර, තායිලන්තය තුළ පමණක් මේ වනවිට මරණ 46ක් වාර්තා වී ඇත.

තායිලන්ත සෞඛ්‍ය අංශ වාර්තා සඳහන් කරන්නේ, ජනවාරි සිට මැයි තෙක් කාලය තුළ එරටදී රෝගීන් 187,031ක් සහ මරණ 46ක් වාර්තා වූ බවය. තවද මෙහි වැඩිම ආසාදන ලැබූවන් වයස අවුරුදු 30 සහ 39 අතර සිටින පුද්ගලයන් බවද පැවසේ.

හොංකොං, චීනය, සිංගප්පූරුව සහ තායිලන්තය යන රටවල ජනගහණ ගැඹුරු නගර ප්‍රදේශවලදී රෝගීන් සංඛ්‍යාව තදින් ඉහළ ගොස් ඇති බව වාර්තා වේ. හොංකොං සහ සිංගප්පූරුවේ සෞඛ්‍ය බලධාරීන් විශේෂ පරීක්ෂණ ක්‍රියාමාර්ග රැසක් ක්‍රියාත්මක කරමින් සිටින අතර, චීනය සහ තායිලන්තය නව බූස්ටර් එන්නත් ලබාගැනීමට ජනතාවට උපදෙස් ලබාදී තිබේ.

හොංකොංහි සෞඛ්‍ය අංශ පවසන්නේ, නගරයේ වෛරස ක්‍රියාකාරිත්වය මේ වනවිට “තරමක් ඉහළ” මට්ටමට ළඟා වී ඇති බවයි. මැයි 3 දිනෙන් අවසන් වූ සතියේදී කොවිඩ් ආසාදිතයින් 31 දෙනෙකු හඳුනාගෙන ඇති අතර, එය අවසන් මාස 12කදී වාර්තා වූ ඉහළම සංඛ්‍යාව වේ.

සිංගප්පූරුවේ දීත් කොවිඩ්-19 ආසාදිතයන්ගේ සංඛ්‍යාව 28%කින් ඉහළ ගොස් ඇති අතර, දෛනික රෝහල් ගත වීමද 30%කින් වැඩි වී ඇති බව එරට සෞඛ්‍ය අංශ පවසයි. ජනතාවගේ ප්‍රතිශක්ති පද්ධතියේ පහළ යාම මෙම ව්‍යාප්තියට බලපා ඇති හැකියාවක් තිබෙන අතරත්, නව වෛරස් ප්‍රභේදය වසංගත මට්ටමක තර්ජනයක් නොවන බව එරට සෞඛ්‍ය අමාත්‍යාංශය සඳහන් කරයි.

JN.1 ලෙස හැඳින්වෙන ඔමික්‍රොන් උප ප්‍රභේදය මෙම රෝග ව්‍යාප්තියට හේතු වී ඇති අතර, ලෝක සෞඛ්‍ය සංවිධානය එය “උනන්දුවක් දක්වන ප්‍රභේදයක්” ලෙස නම් කළද, මෙතෙක් එය “කනස්සල්ලට පත් කරන” වෛරස්වලට අයත් නොවන බව දක්වා ඇත.

සෞඛ්‍ය අංශ සීඝ්‍ර අවධානයෙන් තත්ත්වය පරීක්ෂා කරමින් සිටින අතර, මෙය වඩාත් දරුණු අවස්ථාවක් සෑදිය හැකි බවට තවමත් නිශ්චිත සාක්ෂි නොමැති බවද වාර්තා වේ.