බදුල්ල ශික්ෂණ රෝහලේ වෛද්‍ය පාලිත රාජපක්ෂ මහතා ඖෂධ හිඟය සම්බන්ධයෙන් කළ ප්‍රකාශයක් හේතුවෙන් රාජ්‍ය සේවා කොමිෂන් සභාව වෙත විනය පරීක්ෂණයක් සඳහා කැඳවා තිබේ.

පසුගියදා ඇල්ල–වැල්ලවාය ප්‍රධාන මාර්ගයේ සිදු වූ බිහිසුණු රිය අනතුර අවස්ථාවේදී, වෛද්‍ය රාජපක්ෂ මහතා අනතුරට පත් වූ අයගේ ජීවිත බේරා ගැනීමට සිය ජීවිත අවදානමට ගෙන කටයුතු කළේද විශේෂත්වයකි.

කුඹුක්ගැටේ පොලිස් වසමේ හෙට්ටිගම ප්‍රදේශයේ කිඹුල්වාන ඔය මණ්ඩලපල පාලම ආසන්නයේ පාවෙමින් තිබියදී පුද්ගල මළ සිරුරක් හමුවිය.

මියගොස් ඇත්තේ වයස අවුරුදු 80ක් වූ, හෙට්ටිගම, කුඹුක්ගැටේ ප්‍රදේශයේ පදිංචිකරුවෙකි.
මෙම මරණය දියේ ගිලීමෙන් සිදුවූවක් ද නැතහොත් වෙනත් සැකපහරණ මරණයක්ද යන්න පිළිබඳව කුඹුක්ගැටේ පොලීසිය විමර්ශන ආරම්භ කර ඇත.

එමෙන්ම, පල්ලේකැලේ පොලිස් වසමේ වික්ටෝරියා ජලාශයේ ද පාවෙමින් තිබියදී තවත් පිරිමි මළ සිරුරක් සොයා ගන්නට ලැබී ඇත.

මෙහිදී මියගොස් ඇත්තේ වයස අවුරුදු 63ක් වූ, බාබර් වත්ත, ගුන්නෑපාන ප්‍රදේශයේ පදිංචිකරුවෙකි.
ඒ මහතාගේ මෘත ශරීරය මහනුවර රෝහලේ මෘත ශරීරාගාරයට තැන්පත් කර ඇති අතර, පල්ලේකැලේ පොලීසිය වැඩිදුර විමර්ශන සිදුකරයි.

ලංකා විදුලිබල මණ්ඩලයේ වෘත්තීය සමිති ආරම්භ කළ අකුරට වැඩ කිරීමේ වෘත්තීය සමිති ක්‍රියාමාර්ගය අද (04) දිනටත් දිවයින පුරා ක්‍රියාත්මක වෙයි.

නිදහස් සේවක සංගමයේ ප්‍රධාන ලේකම් ප්‍රියන්ත ප්‍රභාත් මහතා සඳහන් කළේ, රජයේ පාර්ශ්වයෙන් මෙතෙක් ප්‍රතිචාර නොලැබීම හේතුවෙන් අද සිට පස්වරු 4.30ට පසු අතිකාල සේවාවලින් ඉවත් වන බවයි.

ඉහත වෘත්තීය සමිති ක්‍රියාමාර්ගය පසුගිය බ්‍රහස්පතින්දා මධ්‍යම රාත්‍රියේ සිට ක්‍රියාත්මක කරනු ලැබූයේ, විදුලිබල මණ්ඩලය ප්‍රතිව්‍යූහගත කිරීමේ ගැටලු විසඳීම ඇතුළු ඉල්ලීම් 24ක් මූලික කරගෙනය.

මෙම වෘත්තීය ක්‍රියාමාර්ගයට නිදහස් සේවක සංගමය, පොදුජන ප්‍රගතිශීලි සේවක සංගමය, ඉංජිනේරු සංගමය ඇතුළු සංගම් කිහිපයක් එක්ව සිටින බවද වාර්තා වෙයි.

විදුලිබල පනත අනුව, පසුගිය අගෝස්තු 27 සිට මණ්ඩලය සමාගම් 4ක් ලෙස ප්‍රතිව්‍යූහගත කර ඇති අතර එහි සේවකයින් අදාළ සමාගම්වලට අනුයුක්ත කිරීමට නියමිතය.

මෙය සිදුකරගැනීම සඳහා සේවකයින්ගේ කැමැත්ත අනුව අනුයුක්ත වීමට අවශ්‍ය ලිපි ද පසුගිය දිනවල නිකුත් කර තිබේ.