අභාවප්‍රාප්ත කෝසල නුවන් ජයවීරගේ මහතාගෙන් පුරප්පාඩු වූ ජාතික ජන බලවේගයේ කෑගල්ල දිස්ත්‍රික් පාර්ලිමේන්තු මන්ත්‍රී ධුරය සඳහා සමන්ත රණසිංහ මහතාව නම්කළ බව මැතිවරණ කොමිසම පවසයි.

සමන්ත රණසිංහ මහතා 2024 පාර්ලිමේන්තු මැතිවරණයේදී ජාතික ජන බලවේගය රඹුක්කන ආසන සංවිධායකවරයා ලෙස කටයුතු කළේය.

අමෙරිකානු තීරුබදු බලපෑම සම්බන්ධයෙන් සාකච්ඡා කිරීම සඳහා ජනාධිපති අනුර කුමාර දිසානායක මහතා හෙට (10) පෙරවරුවේ ජනාධිපති කාර්යාලයේදී පක්ෂ නායක රැස්වීමක් කැඳවා තිබේ.

සිය X ගිණුමේ සටහනක් තබමින් අමාත්‍ය බිමල් රත්නායක මේ බව සඳහන් කර සිටි අතර එහිදී ඔහු පවසා ඇත්තේ අද උදෑසන විරුද්ධ පක්ෂ නායකයින් 12 දෙනෙකු මෙම ගැටලුව සාකච්ඡා කිරීම සඳහා ජනාධිපතිවරයා හමුවීමට අවශ්‍ය බව ඉල්ලා සිටි බවය.

පළාත් පාලන ආයතන ඡන්ද විමසීම සඳහා අවශ්‍ය ඡන්ද පත්‍රිකා ලක්ෂ 70 ක් මේ වනවිට මුද්‍රණය කර අවසන් කර ඇති බව රජයේ මුද්‍රණාලයාධිපති ප්‍රදීප් පුෂ්පකුමාර මහතා පවසයි.

ඔහු සඳහන් කළේ දිස්ත්‍රික් 12 ක ඡන්ද පත්‍රිකා මුද්‍රණය මේ වනවිට සම්පූර්ණ කර ඇති අතර, එයින් දිස්ත්‍රික් 9 කට අදාළ ඡන්ද පත්‍රිකා මැතිවරණ කොමිසමට භාර දී ඇති බවයි.

තවත් දිස්ත්‍රික් 13 ක ඡන්ද පත්‍රිකා මුද්‍රණය කිරීමටනියමිතව ඇතැයි ද රජයේ මුද්‍රණාලයාධිපතිවරයා සඳහන් කළේ ය.

එමෙන්ම තැපැල් ඡන්දය සඳහා මේ වනවිට ලක්ෂ 7 ක පමණ තැපැල් ඡන්ද පත්‍රිකා මුද්‍රණය කර අවසන් කර ඇති අතර, ඒවාද මැතිවරණ කොමිසමට ලබාදීමට නියමිතය.

පළාත් පාලන ආයතන 114 කට අයත් තැපැල් ඡන්ද පත්‍රිකා ඇතුළත් පැකට්ටු අද (07) තැපෑලට භාරදෙන අතර වත්මන් අධිකරණ ක්‍රියාමාර්ග නිසා තවත් ආයතන 225 සදහා තැපැල් ඡන්ද පත්‍රිකා භාරදීම ප්‍රමාද වන
බවත් මැතිවරණ කොමිසම පැවසීය.

පළාත් පාලන ඡන්දය සඳහා තැපැල් ඡන්දය ලබන අප්‍රේල් 22, 23 සහ 24 යන දිනයන්හිදී පැවැත්වෙන අතර, එම දිනවල ඡන්දය ප්‍රකාශ කළ නොහැකි ඡන්ද දායකයින්ට අප්‍රේල් 28 සහ 29 යන දිනයන්හිදී ඡන්දය ලබාදිය හැකිය.

මෙම කටයුතු සාර්ථකව සිදුකිරීම සඳහා සියලු තැපැල් සේවකයින්ගේ නිවාඩු ද 05 වනදා සිට අවලංගු කර ඇති බවද සදහන් වේ.