හිටපු අමාත්‍ය රාජිත සේනාරත්න සහ පාර්ලිමේන්තු මන්ත්‍රී නිමල් ලංසාට ඔවුන්ගේ නිවෙසවලින් ආහාර රැගෙන ඒමට අවසර ලබාදුන් බව බන්ධනාගාර දෙපාර්තමේන්තුවේ මාධ්‍ය ප්‍රකාශක ජගත් වීරසිංහ මහතා සඳහන් කරයි. ඔහු පැවසුවේ එය ඔවුන්ගේ ඉල්ලීමකට අනුව සලස්වා ඇති බවයි.

රාජිත සේනාරත්න මහතා ලබන 9 වැනිදා දක්වා රක්ෂිත බන්ධනාගාරගත කර ඇති අතර, කිරිඳ ධීවර වරායේ වැලි කැණීම් ව්‍යාපෘතිය කොරියානු සමාගමකට ලබාදී රජයට රුපියල් කෝටි 200ට අධික පාඩුවක් කිරීමේ චෝදනා ඔහුට එල්ල වී ඇත.

නිමල් ලංසා මහතා ලබන 12 වැනිදා දක්වා රක්ෂිත බන්ධනාගාරගත කර ඇති අතර, 2006 පළාත් පාලන මැතිවරණ කාලයේ මීගමුව උප නගරාධිපතිවරයාගේ නිවසට පහරදී අනර්ථයක් සිදුකිරීමේ චෝදනා යටතේ ඔහුට එරෙහිව නඩු ගොනු කර ඇත.

පොලිස් විශේෂ කාර්ය බලකායේ 41 වන රණවිරු ගුණ සමරු උත්සවය අද (01) කටුකුරුන්ද පුහුණු පාසලේ රණවිරු ස්මාරකය අභියසදී පැවැත්වේ.

මෙම උත්සවය පොලිස්පති ප්‍රියන්ත වීරසුරිය සහ මහජන ආරක්ෂක අමාත්‍යාංශ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනවිරත්න යන මහත්වරුන්ගේ ප්‍රධානත්වයෙන් සිදුකෙරෙන බව පොලිස් විශේෂ කාර්ය බලකායේ නියෝජ්‍ය අණදෙණ නිළධාරි (පාලන) දීප්ත හෙට්ටිආරච්චි මහතා සඳහන් කළේ ය.

ඊයේ දිනයේදී රටේ විවිධ ප්‍රදේශවල සිදුවූ මාරක රිය අනතුරු කිහිපයකින් පුද්ගලයින් තිදෙනෙකු ජීවිතක්ෂයට පත්ව ඇති බව පොලීසිය සඳහන් කරයි.

ඇඹිලිපිටිය මොරකැටිය මාර්ගයේ 09 ඇල ප්‍රදේශයේදී ත්‍රීරෝද රථයක් යතුරුපැදියක ගැටීමෙන් සිදු වූ අනතුරකින් 75 හැවිරිදි ත්‍රීරෝද රථ රියදුරු මියගොස් ඇත.

හික්කඩුව ප්‍රදේශයේ ගාල්ල–කොළඹ ප්‍රධාන මාර්ගයේදී යතුරුපැදියකට ලොරි රථයක් ගැටීමෙන් 23 හැවිරිදි අඟුරුවාතොට පදිංචිකරුවෙකු ජීවිතක්ෂයට පත්ව තිබේ.

තවද නොච්චියාගම ප්‍රදේශයේදී මෝටර් රථයක් මාර්ගය හරහා ගමන්ගත් කාන්තාවක් ගැටීමෙන් 75 හැවිරිදි වෙන්නප්පුව පදිංචිකාරිය මියගොස් ඇති බවද පොලීසිය කියයි.

මෙම අනතුරු සම්බන්ධයෙන් පොලීසිය වැඩිදුර විමර්ශන සිදුකරමින් පවතී.