ඇෆ්ගනිස්ථානයේ රික්ටර් මාපකයේ 6.0ක ප්‍රබලත්වයෙන් සිදු වූ භූ කම්පනයක් හේතුවෙන් පුද්ගලයින් 20 දෙනෙකු ජීවිතක්ෂයට පත් වී තවත් 100කට අධික පිරිසක් තුවාල ලබා රෝහල් ගත කර ඇති බව විදෙස් මාධ්‍ය වාර්තා කරයි.

මෙම භූ කම්පනය කිලෝමීටර් 8ක ගැඹුරකින් හටගත් අතර, පසු කම්පන තත්ත්ව 3ක්ද සිදුව ඇති අතර ඒවා රික්ටර් මාපක 4.5 සිට 5.2 දක්වා පරාසයේ තිබුණි.

කාබුල් සිට පාකිස්තාන අගනුවර ඉස්ලාමාබාද් දක්වා ගොඩනැගිලි රැසක් සෙලවී ඇති අතර, දැඩි හානි සිදුව ඇත්තේ පාකිස්ථානයේ සීමාවට ආසන්න කුනාර් පළාතේ නොර්ගල් දිස්ත්‍රික්කයේ බවද වාර්තා වේ.

තලේබාන් බලධාරීන් සඳහන් කර ඇත්තේ මිය ගිය සංඛ්‍යාව තවදුරටත් ඉහළ යා හැකි බවත්, ගලවා ගැනීම් කටයුතු සඳහා ජාත්‍යන්තර සහාය ඉල්ලා සිටින බවත්ය.

භූ කම්පනයෙන් පසු ඇති වූ ගංවතුර සහ නායයෑම් හේතුවෙන් කඳුකර ප්‍රදේශවල මාර්ග අවහිර වී ඇති අතර, ගලවා ගැනීම් මෙහෙයුම් සිදුකළ හැක්කේ ගුවන් මගින් පමණක් බව ආරක්ෂක අංශ පවසයි.

ඒ අනුව බලපෑමට ලක්වූ ප්‍රදේශවලට ළඟා වීමට අවශ්‍ය ගුවන් යානා සපයන ලෙසත් ජාත්‍යන්තර සංවිධානවලට ඉල්ලා සිටින බවද සෞඛ්‍ය හා ආරක්ෂක අංශ ප්‍රකාශ කර ඇත.

ඉන්දියාවේ මුම්බායි නගරයේ අඛණ්ඩ තද වැසි හේතුවෙන් මිලියන ගණනක ජන ජීවිතයට දැඩි බලපෑම් සිදු වී ඇත. විදෙස් මාධ්‍ය වාර්තා අනුව නගරයේ මාර්ග රැසක් ජලයෙන් යට වී ඇති අතර ගුවන්ගමන් සහ දුම්රිය සේවා අත්හිටුවීමටද සිදුවී ඇත.

මුම්බායි සහ අසල්වැසි දිස්ත්‍රික්කවලට රතු අනතුරු ඇඟවීම් නිකුත් කර ඇත. ගත වූ දින හතර තුළ මුම්බායි නගරයට මිලිමීටර් 800ක වර්ෂාපතනය ලැබී ඇති අතර, එය සාමාන්‍ය මසකට වඩා අධික වර්ෂාවකි.

කෙසේ වෙතත් ඉදිරි දින කිහිපයේදී තත්ත්වය යහපත් වනු ඇති බව කාලගුණවිද්‍යා දෙපාර්තමේන්තුව ප්‍රකාශ කර සිටියා.

මෙම කාලගුණ තත්ත්වය හේතුවෙන් මහාරාෂ්ට්‍ර ප්‍රාන්තය තුළින් පසුගිය දින හතර ඇතුළත පුද්ගලයින් 21 දෙනෙකු ජීවිතක්ෂයට පත්ව ඇති බවද වාර්තා වේ.

ෆින්ලන්ත සමාජවාදී ප්‍රජාතන්ත්‍රවාදී පක්ෂය නියෝජනය කළ 30 හැවිරිදි පාර්ලිමේන්තු මන්ත්‍රී ඒමලි පෙල්ටොනන්ගේ මෘතදේහය එරට පාර්ලිමේන්තු ගොඩනැගිල්ල තුළ තිබියදී හමුවී ඇත.

ඔහු දිවිනසාගෙන ඇති බවට සම්බන්ධ කවුළු විශ්වාස කරමින් විමර්ශන දැනට සිදුවෙයි.

මෙම අනපේක්ෂිත තත්ත්වය හේතුවෙන් ෆින්ලන්ත පාර්ලිමේන්තුවේ සියලු නිල කාර්යාල වසා දැමීමට නියෝග කර තිබේ.