රජයේ හා රජයේ අනුමත සියලු පාසල්වල තුන්වැනි වාරය අද(05) ආරම්භ වූ අතර නත්තල වෙනුවෙන් යළි ලබන 22 වැනිදා පාසල්වලට නිවාඩු ලබා දී ජනවාරි 2 වැනිදා ආරම්භ කරන බව අධ්‍යාපන අමාත්‍යංශය ප්‍රකාශ කර තිබේ.

පසුව අ.පො.ස. උසස්පෙළ විභාගය සඳහා ජනවාරි 20 වැනිදා පාසල්වලට නිවාඩු ලබාදෙන අතර පෙබරවාරි 20 වැනිදා යළිත් පාසල් ආරම්භ වනු ඇති.

පාසල්වල තෙවැනි පාසල් වාරය මාර්තු 24 වැනිදායින් අවසන් වීමට නියමිතයි.

මේ අතර 2022 වර්ෂයේ අතරමැද පන්ති සඳහා සිසුන් ඇතුළත් කිරීම අද(05) සිට අත්හිටුවා තිබේ.

අධ්‍යාපන අමාත්‍යාංශය සඳහන් කළේ 2023 වර්ෂයේ අතරමැද පන්ති සඳහා සිසුන් ඇතුළත් කරනු ලබන්නේ, 2022 වර්ෂයේ තෙවන පාසල් වාරය අවසන් වන 2023 මාර්තු මස 24 දිනට පසුව බවයි.

අධ්‍යාපන අමාත්‍යාංශය නිකුත් කරනු ලබන චක්‍රලේඛ අනුව පමණක් ඒ සම්බන්ධයෙන් කටයුතු කරන බවද, අධ්‍යාපන අමාත්‍යාංශය ප්‍රකාශ කරන අතර සාමාන්‍ය පෙළ ප්‍රතිඵල මත උසස් පෙළ හැදෑරීම සඳහා අයදුම් කිරීමේ දී උසස් පෙළ විෂය ධාරාව නොමැති පාසල්වල සිසුන්, තමන් හදාරන විෂය ධාරාව ඇති පාසල් සඳහා ඉල්ලුම්පත්‍ර අදාළ පාසලටම යොමු කළ යුතු බවද අධ්‍යාපන අමාත්‍යංශය ප්‍රකාශ කර සිටියා.