ජපානයේ ස්ප්‍රින්ග් ගුවන්සේවයට අයත් බෝයිං 737 යානයක්, චීනයේ ෂැන්හයි නගරයෙන් ජපානයේ ටෝකියෝ බලා ගමන් කරමින් සිටියදී, මිනිත්තු 10ක් ඇතුළත අඩි 26,000කින් පහළට වැටුණු සිදුවීමක් වාර්තා වී ඇත.

අදාළ යානය අඩි 36,000ක උසක සිට අඩි 10,500ක උසකට අධිවේගයෙන් පහත වැටී ඇති අතර, මෙම අවස්ථාවේදී යානා තුළ ඇති වායු පීඩනය අවපාතවීමත් සමඟ මගීන් 191 දෙනා දැඩි අපහසුතාවයට පත්වී ඇත.

මෙම තත්ත්වයට හේතුව මෙතෙක් නිල වශයෙන් අනාවරණය වී නොමැති නමුත්, යානා නියමුවෝ යානය සාර්ථකව ජපානයේ කන්සායි ගුවන්තොටුපොළට ගොඩබැසවීමට සමත් වී ඇති බව වාර්තා වේ.

තායිලන්තයේ බැංකොක් නගරයේදී විශාල විරෝධතාවයක් පැවැත්වූ බව වාර්තා වේ.

මෙම විරෝධය ඔස්සේ ජනතාව විසින් තායිලන්ත අගමැති පේටොන්ටාන් ෂිනවත්‍රාගේ රජය විශ්වාසය තහවුරු කරගත නොහැකි බව පෙන්වමින් ඇය ඉල්ලා අස්විය යුතු බව අවධාරණය කළහ.

කාර්ණික වශයෙන්, කාම්බෝජය සමඟ ඇතිවූ දේශසීමා අර්බුදය සහ අගමැතිවරිය සහ කාම්බෝජයේ හිටපු අගමැති හන් සෙන් අතර පැවති බව කියන රහස් දුරකථන සංවාදයක් මේ විරෝධයේ මූලික හේතු වන බව සඳහන්ය. එම සංවාදයේදී රටේ හමුදා ප්‍රධානියෙකු පිළිබඳ විරුද්ධ අදහස් පළවීම සහ රටට අවාසිදායක ලෙස කතා කිරීම පිළිබඳ ජනතාව අතර දැඩි නොසන්සුන්කමක් ඇතිව තිබේ.

2023 වසරේදී බලයට පැමිණි 38 හැවිරිදි ෂිනවත්‍රාට එරෙහිව මෙය මෙතෙක් පැවති විශාලතම විරෝධතාවය ලෙස විදෙස් මාධ්‍ය සදහන් කරයි.

ලබන මාසයේදී අගමැතිවරියට එරෙහිව විශ්වාසභංග යෝජනාවක් ඉදිරිපත් කිරීමටද සැලසුම් කර ඇති අතර, වත්මන් රජයේ සමීප පක්ෂ කිහිපයක්ද රජයට සහය දැක්වීමෙන් ඉවත්ව ඇති බව වාර්තා වේ.

ශ්‍රී ලංකා අග්‍රාමාත්‍ය ආචාර්ය හරිනි අමරසූරිය මහත්මිය, නිළ සංචාරයකට එක්වීමේදී 2025 ජුනි 24 වනදා කැනඩාවේ වැන්කුවර් නුවරදී පැවැත්වූ පොදුරාජ්‍ය මණ්ඩලීය ඉගෙනුම් (COL) පාලක මණ්ඩල රැස්වීමට සහභාගී විය.

ඔටාවා හි ශ්‍රී ලංකා මහ කොමසාරිස් කාර්යාලයේ සහ බ්‍රිටිෂ් කොලොම්බියා ප්‍රාන්තයේ රාජ්‍ය නියෝජිතයින්ගේ සහ COL නිලධාරීන්ගේ උණුසුම් පිළිගැනීමක් අග්‍රාමාත්‍යවරියට හිමි විය.

එමෙන්ම, සරේ නගරයේ පැවති “ආචාර්ය හරිනි අමරසූරිය සමඟ සන්ධ්‍යාවක්” ලෙසින් නම් වූ විශේෂ හමුවකටද ඇය සහභාගී විය. මෙය කැනඩාවේ පදිංචි ශ්‍රී ලාංකික ජනතාවට අග්‍රාමාත්‍යවරිය සමඟ සෘජුව අදහස් හුවමාරු කරගැනීමේ විශේෂ අවස්ථාවක් විය.

මෙම සංචාරය ශ්‍රී ලංකාව සහ කැනඩාවේ ශ්‍රී ලාංකික ප්‍රජාව අතර සබඳතා වර්ධනයට ද පදනමක් විය.