රාජ්‍ය පරිපාලන, පළාත් සභා සහ පළාත් පාලන අමාත්‍යාංශය විසින් නිකුත් කළ නව චක්‍රලේඛයකින් සියලු රාජ්‍ය ආයතනවලින් විධිමත් සහ තිරසාර අපද්‍රව්‍ය කළමනාකරණ ක්‍රමවේදයක් ක්‍රියාත්මක කිරීම අනිවාර්ය කර තිබේ.

මෙම චක්‍රලේඛය අමාත්‍යංශ ලේකම්වරුන්, පළාත් ප්‍රධාන ලේකම්වරුන් සහ රාජ්‍ය දෙපාර්තමේන්තු ප්‍රධානීන් වෙත යොමු කර ඇති අතර, එමඟින් ‘ත්‍රී-ආර්’ සංකල්පයට (අඩු කරන්න, නැවත භාවිත කරන්න, ප්‍රතිචක්‍රා කරන්න) අනුගත වීමේ වැදගත්කම උදෙසා අවධානය යොමු කරයි.

බොහෝ රාජ්‍ය ආයතන නාගරික ප්‍රදේශවල පිහිටා ඇති අතර, එම ආයතන වෙත දෛනිකව පැමිණෙන පුද්ගලයින් සහ සේවකයන් හරහා විශාල වශයෙන් අපද්‍රව්‍ය නිපදවෙයි. ඒ සඳහා සවිමත් කළමනාකරණ ක්‍රමයක් අවශ්‍ය බව අමාත්‍යාංශය සඳහන් කර සිටි අතර මෙම චක්‍රලේඛය අනුව,

• කඩදාසි භාවිතය හැකි තරම් අඩු කිරීම,
• තනි භාවිතය සඳහා වූ ප්ලාස්ටික් භාවිතය අධෛර්යමත් කිරීම,
• සහ පරිසර හිතකාමී විකල්ප භාවිතය වැඩිදියුණු කිරීම ආදී ක්‍රියාමාර්ග ලබාගැනීමට රාජ්‍ය ආයතන පියවර ගත යුතුය.

එමෙන්ම, අපද්‍රව්‍ය නිසි පරිදි එකතු කිරීම, වෙන්කිරීම සහ බැහැර කිරීම පිළිබඳව ද ක්‍රියාමාර්ග ගැනීමත්, ඒවායේ පවත්නා අධීක්ෂණය සදහා ක්‍රමවේදයක් සකස් කිරීමත් අවශ්‍ය වේ.

මෙම චක්‍රලේඛය බලාත්මක වන දිනයේ සිට මාස 6ක කාලසීමාවක් තුළ සියලුම ආයතනවලට තමන්ට ගැළපෙන විධිමත් අපද්‍රව්‍ය කළමනාකරණ සැලැස්මක් සකස් කර ක්‍රියාත්මක කළ යුතු බවද එහි දැක්වෙයි.