පළාත් පාලන ආයතන ඡන්ද විමසීම සඳහා අවශ්‍ය ඡන්ද පත්‍රිකා ලක්ෂ 70 ක් මේ වනවිට මුද්‍රණය කර අවසන් කර ඇති බව රජයේ මුද්‍රණාලයාධිපති ප්‍රදීප් පුෂ්පකුමාර මහතා පවසයි.

ඔහු සඳහන් කළේ දිස්ත්‍රික් 12 ක ඡන්ද පත්‍රිකා මුද්‍රණය මේ වනවිට සම්පූර්ණ කර ඇති අතර, එයින් දිස්ත්‍රික් 9 කට අදාළ ඡන්ද පත්‍රිකා මැතිවරණ කොමිසමට භාර දී ඇති බවයි.

තවත් දිස්ත්‍රික් 13 ක ඡන්ද පත්‍රිකා මුද්‍රණය කිරීමටනියමිතව ඇතැයි ද රජයේ මුද්‍රණාලයාධිපතිවරයා සඳහන් කළේ ය.

එමෙන්ම තැපැල් ඡන්දය සඳහා මේ වනවිට ලක්ෂ 7 ක පමණ තැපැල් ඡන්ද පත්‍රිකා මුද්‍රණය කර අවසන් කර ඇති අතර, ඒවාද මැතිවරණ කොමිසමට ලබාදීමට නියමිතය.

පළාත් පාලන ආයතන 114 කට අයත් තැපැල් ඡන්ද පත්‍රිකා ඇතුළත් පැකට්ටු අද (07) තැපෑලට භාරදෙන අතර වත්මන් අධිකරණ ක්‍රියාමාර්ග නිසා තවත් ආයතන 225 සදහා තැපැල් ඡන්ද පත්‍රිකා භාරදීම ප්‍රමාද වන
බවත් මැතිවරණ කොමිසම පැවසීය.

පළාත් පාලන ඡන්දය සඳහා තැපැල් ඡන්දය ලබන අප්‍රේල් 22, 23 සහ 24 යන දිනයන්හිදී පැවැත්වෙන අතර, එම දිනවල ඡන්දය ප්‍රකාශ කළ නොහැකි ඡන්ද දායකයින්ට අප්‍රේල් 28 සහ 29 යන දිනයන්හිදී ඡන්දය ලබාදිය හැකිය.

මෙම කටයුතු සාර්ථකව සිදුකිරීම සඳහා සියලු තැපැල් සේවකයින්ගේ නිවාඩු ද 05 වනදා සිට අවලංගු කර ඇති බවද සදහන් වේ.

වැලිකඩ පොලිස් ස්ථානාධිපතිවරයා ධුරයෙන් ඉවත් කිරීමට වැඩබලන පොලිස්පති⁣ගෙන් නිර්දේශ කර තිබේ.

වැලිකඩ පොලිස් භාරයේ සිටි සැකකරු⁣වෙකු මියයාමේ සිද්ධියට අදාළව සාධාරණ හා අපක්ෂපාතී පරීක්ෂණයක් වෙනුවෙන් මෙම තීරණය ගෙන ඇති අතර රාජකාරි පැහැර හැරි බව කියන සැරයන්ව⁣රයෙකු සහ කොස්තාපල්වරයෙකුගේද වැඩ තහනම් කළ බව පොලිස් මාධ්‍ය ප්‍රකාශකවරයා සඳහන් කළේ ය.

ජනාධිපති අනුර කුමාර දිසානායක මහතාගේ ආරාධනයකට අනුව ශ්‍රී ලංකාවට රාජ්‍ය සංචාරයක නිරත වූ ඉන්දියානු අග්‍රාමාත්‍ය නරේන්ද්‍ර මෝදි මහතා අද (06) පෙරවරුවේ අනුරාධපුර ගුවන් හමුදා කඳවුරෙන් ඉන්දියාව බලා පිටත්ව ගියේය.

“සියවස් මිතුදමක සෞභාග්‍යවත් අනාගතයකට බැඳීමක්” යන සංකල්පය යටතේ ශ්‍රී ලංකාව සහ ඉන්දියාව අතර පවතින ඓතිහාසික, ආර්ථික හා සංස්කෘතික සබඳතා තවදුරටත් ගැඹුරු කිරීම මෙම සංචාරයේ ප්‍රධාන අරමුණවක් විය.

මෙය අග්‍රාමාත්‍ය මෝදි මහතාගේ සිව්වන ශ්‍රී ලංකා සංචාරය වන අතර, දෙරට අතර බහු පැති හවුල්කාරිත්වය ශක්තිමත් කිරීම සදහා විශේෂ පියවර ගත් බව ද රාජ්‍ය පාර්ශ්ව සඳහන් කරයි. “පළමුව අසල්වැසියා” යන ඉන්දියානු විදේශ ප්‍රතිපත්තියට අනුව ශ්‍රී ලංකාවට හිමි වන විශේෂ තාන්ත්‍රික ස්ථානයක් ගැන මෙලෙස තවත් වරක් තහවුරු කරන ලදී.

මෙම සංචාරය තුළදී, දෙරට අතර අනාගතය සඳහා වැදගත් සහයෝගීතා ගිවිසුම් කිහිපයකටත් එක්වූ අතර, එමඟින් ශ්‍රී ලංකා ජනතාවට අනාගතයේදී වටිනා ප්‍රතිඵල බලාපොරොත්තු විය හැකි බවත්, ජනතාවාදී තිරසර සංවර්ධනයක් කරා යන ගමනේ වැදගත් මූලිකයක් ලෙස මෙම සංචාරය සැලකිය හැකි බවත් රජය අවධාරණය කරයි.

මෙම සංචාරයට එක්ව සිටි විශේෂිත ඉන්දියානු නියෝජිතයන් අතර විදේශ කටයුතු අමාත්‍ය ආචාර්ය එස්. ජයශංකර්, ජාතික ආරක්ෂක උපදේශක අජිත් දොවාල්, සහ විදේශ ලේකම් වික්‍රම් මිස්රි යන මහත්වරුන් ද ඇතුළත්ය.