මෙරට ජනතාවට කෙටි කාලයක් තුළ ගුණාත්මක සහ කාර්යක්ෂම ප්‍රතිකාර සේවාවක් ලබාදීම සඳහා රජයේ රෝහල් පද්ධතිය සම්පූර්ණයෙන්ම ඩිජිටල්කරණය කිරීමට රජය පියවර ගනිමින් සිටින බව සෞඛ්‍ය සහ ජනමාධ්‍ය අමාත්‍ය වෛද්‍ය නලින්ද ජයතිස්ස මහතා සඳහන් කළේය.

මෙම පියවර මඟින් රෝගීභාවයට පත්වන පුරවැසියෙකුට වැඩිම සත්කාරය සහ පිළිගැනීම රෝහලෙන් ලබාදෙන අතර, රෝහල, පුරවැසියන්ට සුවපහසු, විශ්වාසදායක ස්ථානයක් ලෙස පරිවර්තනය වීමත් රජයේ අරමුණක් බවත් අමාත්‍යවරයා අවධාරණය කර සිටිය.

මෙම අදහස් පළ කරන ලද්දේ කොළඹ රිජ්වේ ආර්යා ළමා රෝහලේ සෞඛ්‍ය තොරතුරු තාක්ෂණ පද්ධතිය නිල වශයෙන් ජනගත කිරීම සහ රෝහල් රසායනාගාරයේ පටක විද්‍යා අංශය සඳහා ප්‍රමිතිකරණය ලබාදීම වෙනුවෙන් පැවැති උත්සවයක දී ය.

එමෙන්ම අමාත්‍යවරයා තවදුරටත් සඳහන් කරමින් ප්‍රකාශ කර සිටියේ සම්පූර්ණ රාජ්‍ය සේවාවම ඩිජිටල්කරණය කර මහජනතාවට වඩා පහසු, කාර්යක්ෂම සේවාවක් ලබාදීම වත්මන් රජයේ බලාපොරොත්තුවක් බවයි.

එමෙන්ම, ලක්ෂ එකහමාරකට ආසන්න සෞඛ්‍ය කාර්ය මණ්ඩලයේ තොරතුරු සහ මානව සම්පත් කළමනාකරණය තාක්ෂණය හරහා ක්‍රියාත්මක කිරීම, සම්බන්ධතාවයෙන් පිරුණු ඩිජිටල් සෞඛ්‍ය වාර්තා සංවර්ධනය කිරීම, සහ ඖෂධ සැපයුම් ජාලය තාක්ෂණය සමඟ ව්‍යවස්ථානුකූලව කළමනාකරණය කිරීම සදහාද විශේෂ අවධානය යොමුකරමින් කටයුතු කරන බවද අමාත්‍යවරයා පෙන්වා දුන්නේය.