ඖෂධ මිල අඩු කිරීමේ අවශ්‍යතාවය සහ එයට රජයේ සූදානම සම්බන්ධයෙන් සෞඛ්‍ය අමාත්‍යාංශයේදී විශේෂ සාකච්ඡාවක් පැවැත්වී තිබේ.

මෙම සාකච්ඡාව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ ප්‍රධානත්වයෙන් පැවැත්වූ අතර, සමස්ත ලංකා ඖෂධශාලා හිමියන්ගේ සංගමය, ඖෂධ ආයෝජන මණ්ඩලය, ජාතික ඖෂධ නියාමන අධිකාරිය ඇතුළු ඖෂධ ආනයනය සහ බෙදාහැරීමේ ක්ෂේත්‍රයේ නියෝජිතයන් තිඛටම මෙයට සහභාගී වී තිබේ.

මෙහිදී, ජනතාවට සහන සැලසීමේ අරමුණින් ඖෂධ මිල පහත හෙළීමේ අවශ්‍යතාවය, සහ ඒත් සමග ඖෂධ හිඟයකින් තොරව සැපයුම සහතික කිරීම පිළිබඳව සෞඛ්‍ය අමාත්‍යවරයා පැහැදිලි කර ඇත.

ජාතික ඖෂධ නියාමන අධිකාරියේ මිල කමිටුව, පිරිවැය, රක්ෂණ සහ සැපයුම් අගය සලකා බැලීමෙන්, ඖෂධ සඳහා උපරිම සිල්ලර මිලක් ලෙස සියයට 80ක් නියම කළහොත් පමණක් තොග වෙළෙඳුන්ට සියයට 18ක ලාභයක් ලබා දිය හැකි බව මෙම අවස්ථාවේදී අවධාරණය වී තිබේ.

මේ දිනවල බහුලව භාවිතා වන විශේෂිත ඖෂධ කිහිපයක මිල සූත්‍රය යෙදීමෙන් ලබාදිය හැකි මිල අඩුකිරීම් පිළිබඳ වාර්තාවක් සකස් කර සෞඛ්‍ය අමාත්‍යවරයා වෙත ඉදිරිපත් කරන ලෙස ඖෂධ ආයෝජන මණ්ඩලයට උපදෙස් දී ඇති බවද අමාත්‍යාංශය නිවේදනය කරයි.