ජනාධිපති අනුර කුමාර දිසානායක මහතාගේ නියමයෙන් රාජ්‍ය ආයතන කිහිපයකට නව පත් කිරීම් කිහිපයක් සිදුකර ඇති බව ජනාධිපති මාධ්‍ය අංශය නිවේදනය කළේය.
එහි ප්‍රධානතමය වශයෙන්, ජාතික නවෝත්පාදන නියෝජ්‍යායතනයේ ප්‍රධාන නිලධාරී ලෙස ආචාර්ය මුදිත දර්ශන සෙනරත් යාපා මහතා පත් කර ඇත.
තවද, ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීමේ අමාත්‍යාංශයට නව ලේකම්වරයෙකු ලෙස ධීවර, ජලජ සහ සාගර සම්පත් අමාත්‍යාංශයේ හිටපු ලේකම් සම්පත් මන්ත්‍රීනායක මහතා පත්කර ඇත.
උතුරු පළාත් ප්‍රධාන ලේකම් ධුරය සඳහා තනුජා මුරුගේසන් මහත්මිය පත්කර ඇති අතර, ධීවර, ජලජ සහ සාගර සම්පත් අමාත්‍යාංශයේ නව ලේකම්වරයා ලෙස ආචාර්ය බී. කේ. කෝලිත කමල් ජිනදාස මහතා පත්කර තිබේ.
ආචාර්ය ජිනදාස මහතා රසායනික විද්‍යාව හා තාක්ෂණය පිළිබඳ පශ්චාත් ආචාර්ය උපාධියක්, ආහාර විද්‍යාව පිළිබඳ විද්‍යාපති උපාධියක් සහ ධීවර කළමනාකරණය පිළිබඳ පශ්චාත් උපාධි ඩිප්ලෝමායක් හිමි කෙනෙකි. ඔහු දකුණු ආසියාවේ එක්සත් ජාතින්ගේ ජෛව වෛද්‍ය ව්‍යාපෘති කාර්යාලයෙහි ඉංජිනේරුවරයකු ලෙසද කටයුතු කර තිබේ.
මෙම පත්විම් සඳහා ලිපි ලේඛන ජනාධිපති ලේකම් ආචාර්ය නන්දික සනත් කුමානායක මහතා විසින් අද (20) පස්වරුවේ ජනාධිපති කාර්යාලයේදී බාර දෙන ලදී.
