අම්පාර හා මොනරාගල දිස්ත්‍රික්කවල පැතිර ඇති, හෙක්ටයාර 40,683ක විශාලත්වයෙන් යුත් නිල්ගල වනය, හෙට (02) දිනයේ සිට නිල වශයෙන් රක්ෂිතයක් ලෙස ප්‍රකාශයට පත්කිරීමට පරිසර අමාත්‍යාංශය තීරණය කර ඇත.

මැදගම, බිබිල, නිල්ගල සහ ඉඟිනියාගල යන වන සංරක්ෂණ බීට් හතරකින් සමන්විත මෙම වනාන්තරයේ ප්‍රධානම කොටස බිබිල අඩවිය වේ.

මෙම රක්ෂිතය නිවේදනය කිරීමේ සමාරම්භක උත්සවය හෙට පෙරවරුවේ බිබිල රතුගල ආදිවාසී ජන උරුම මධ්‍යස්ථානයේදී පැවැත්වීමට නියමිත අතර, එය පරිසර අමාත්‍ය වෛද්‍ය ධම්මික පටබැඳි මහතාගේ ප්‍රධානත්වයෙන් පැවැත්වේ. උත්සවය සංවිධානය කරනු ලබන්නේ වන සංරක්ෂණ දෙපාර්තමේන්තුවයි.

මෙම කටයුතු, ජූනි 5 වනදාට යෙදී ඇති ලෝක පරිසර දිනයට සමගාමීව පරිසර අමාත්‍යාංශය ක්‍රියාත්මක කර ඇති ජාතික පරිසර සතිය යටතේ සිදුවන අතර, එහි සිව්වැනි දිනය වන හෙට දිනය “ජෛවවිවිධත්ව සංරක්ෂණ දිනය” ලෙස නම් කර ඇත.

එක්සත් ජාතීන්ගේ මානව හිමිකම් පිළිබඳ මහකොමසාරිස් වෝල්කර් ටර්ක් මහතා මේ මස අවසානයේ හෝ ලබන මස ආරම්භයේදී ශ්‍රී ලංකාවට සංචාරයක නිරතවීමට නියමිත බව විදේශ කටයුතු අමාත්‍යංශය නිවේදනය කරයි.

2016 වසරෙන් පසුව එක්සත් ජාතීන්ගේ මානව හිමිකම් පිළිබඳ මහකොමසාරිස්වරයෙකු ශ්‍රී ලංකාවට පැමිණෙන්නේ මෙය ප්‍රථම අවස්තාව වේ. 2016 දී ජනාධිපති මෛත්‍රිපාල සිරිසේන මහතාගේ බලය තුළදී, එවකට මහකොමසාරිස් සෙයිද් අල් හුසේන් කුමරු මෙරට සංචාරයක නිරත වූයේය.

මෙවර සංචාරය දී, ශ්‍රී ලංකාවේ මානව හිමිකම් ආරක්ෂාව සම්බන්ධයෙන් රජය ක්‍රියාත්මක කරන වැඩපිළිවෙළ පිළිබඳව විශේෂ අවධානයක් යොමු වනු ඇති බව වාර්තා වේ.

ඒ අතර, ත්‍රස්තවාදය වැළැක්වීමේ පනත් කෙටුම්පත සම්බන්ධ සංශෝධන, සංහිඳියාව තහවුරු කිරීමේ උත්සාහයන් සහ නීති හා ආණ්ඩුක්‍රම ව්‍යවස්ථානුකූල වගවීම පිළිබඳව මහකොමසාරිස්වරයා අවධානය යොමු කරන බවද අපේක්ෂිතය.

ජූලි මාසයේදී ක්‍රියාත්මක කිරීමට නියමිත වාර්ෂික බස් ගාස්තු සංශෝධනය අගෝස්තු මාසය දක්වා කල්දැමීමට තීරණය කර ඇති බව ලංකා පෞද්ගලික බස් හිමියන්ගේ සංගමය සඳහන් කරයි.

මෙම සංගමයේ සභාපති ගැමුණු විජේරත්න මහතා පැවසුවේ, පවතින ආර්ථික සහ සමාජ තත්ත්වය සැලකිල්ලට ගත් විට ජූලි මාසයේදී බස් ගාස්තු සංශෝධනයක් සිදුකිරීම ප්‍රායෝගික නොවන බවය.

කොළඹදී අද (01) පැවති මාධ්‍ය හමුවකට එක්වෙමින් ඔහු මෙම අදහස් පළ කළේය.