එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක් මහතා, ජුනි 23 සිට 26 දක්වා ශ්‍රී ලංකාවේ නිල සංචාරයක නිරත වීමට නියමිත බව විදේශ කටයුතු, විදේශ රැකියා සහ සංචාරක අමාත්‍යාංශය නිවේදනයක් නිකුත් කරමින් සඳහන් කරයි.

2016 වසරේ පසුපසින් මෙය ශ්‍රී ලංකාවට පැමිණෙන පළමු මානව හිමිකම් මහ කොමසාරිස්වරයා වන අතර, සංචාරය දී ජනාධිපති අනුර කුමාර දිසානායක, අග්‍රාමාත්‍ය ආචාර්ය හරිනි අමරසූරිය, අමාත්‍යවරුන්, මන්ත්‍රීවරුන්, ආගමික නායකයින්, සිවිල් සමාජ නියෝජිතයින් සහ මානව හිමිකම් කොමිසම සමඟ රැස්වීම් කිහිපයක් පැවැත්වීමට නියමිතය.

මහ කොමසාරිස්වරයා මෙරට සංචාරය අතරතුර මහනුවරදී දළඳා මාළිගාවට පැමිණ පුදා ගන්නා අතර මල්වතු සහ අස්ගිරි මහනා හිමිවරුන් හමුවීමටත්, යාපනය හා ත්‍රිකුණාමලය යන උතුරු සහ නැගෙනහිර ප්‍රදේශවලට පිවිස එහි ආණ්ඩුකාරවරුන් හා සාකච්ඡා පැවැත්වීමටත් නියමිතය.

කල් ඉකුත් වූ භාණ්ඩ අලෙවි කිරීම සම්බන්ධයෙන් ප්‍රධාන සුපිරි වෙළඳසැල් ජාලයක ශාඛා තුනකට රුපියල් ලක්ෂ 6ක දඩයක් අලුත්කඩේ මහේස්ත්‍රාත් අධිකරණය විසින් නියම කර ඇත.

පාරිභෝගික කටයුතු පිළිබඳ අධිකාරිය සඳහන් කළේ, මෙම වෙළඳසැල්වල කල් ඉකුත් භාණ්ඩ අලෙවිය සම්බන්ධයෙන් නඩු පැවරූ බවයි.

අදාළ වෙළඳසැල්වල නියෝජිතයින් අධිකරණය හමුවේ වරද පිළිගෙන ඇති අතර, ඒ අනුව ශාඛාවකට රුපියල් ලක්ෂ 2 බැගින්, මුළු දඩ මුදල ලෙස රුපියල් ලක්ෂ 6ක් නියම කර තිබේ.

හැටන් – මහනුවර ප්‍රධාන මාර්ගයේ බගතොලුව ප්‍රදේශයේදී ඊයේ (19) දින මෝටර් රථ දෙපාර්තමේන්තුව විසින් පවත්වානු ලැබූ හදිසි වාහන පරීක්ෂාවේදී වාහන 44ක් තාවකාලිකව ධාවනයෙන් ඉවත් කර තිබේ.

මෙම පරීක්ෂාවට ලක්වූ වාහන 115ක් අතරින්, වායු විමෝචනය අධිකව පැවති වාහන සහ තාක්ෂණික අඩුපාඩු සහිතව ධාවනයට නුසුදුසු වාහන මෙම ක්‍රියාවලියෙන් ඉවත් කර ඇත.

ධාවනයෙන් ඉවත් කළ වාහනවලට වාර්ෂික ආදායම් බලපත්‍රය අත්අඩංගුවට ගෙන ඇති අතර, එම වාහන 2025 ජූනි 30 වනදාට පෙර නිරීක්ෂණයට යළි ඉදිරිපත් කළ යුතුය.

මෙම වාහන අතර ලංගම හා පෞද්ගලික බස් රථ 15ක්ද අඩංගුය. මගීන්ගේ ආරක්ෂාවට අවදානමක් ඇති උපාංග ඉවත් කරන ලෙසද පරික්ෂකවරුන් උපදෙස් ලබාදී ඇත.

මෙම පරීක්ෂාව නුවරඑළිය දිස්ත්‍රික් ප්‍රධාන මෝටර් රථ පරීක්ෂක ජාලිය බණ්ඩාර මහතාගේ ඉල්ලීම මත සිදු වූ අතර, එම අධීක්ෂණ කටයුතුවලට එම්. එස්. එල්. චන්දන බණ්ඩාර මහතා, වායු විමෝචන පරීක්ෂණ අංශයේ නිලධාරීන් සහ ගිනිගත්හේන පොලිසිය එක්වී තිබුණි.