ඊශ්‍රායලය සහ ඉරානය දෙරටම තමන් ප්‍රකාශ කළ සටන් විරාමය උල්ලංඝනය කර ඇති බව අමෙරිකානු ජනාධිපති ඩොනල්ඩ් ට්‍රම්ප් මහතා පවසයි.

එමනිසා මෙම රටවල් දෙක කෙරෙහි තමන් සතුටු නොවන බවත්, විශේෂයෙන් ඊශ්‍රායලයේ ක්‍රියාවලිය පිළිබඳව අප්‍රසාදය පළකරන බවත් ඔහු සඳහන් කළ බව විදෙස් මාධ්‍ය වාර්තා කරයි.

“බෝම්බ හෙලන්න එපා, ඔබේ ගුවන් නියමුවන් දැන්ම නැවත ගෙන්වා ගන්න” යනුවෙන් ඔහු ඊශ්‍රායලයෙන් ඉල්ලා ඇති අතර, ඉරානයට ගුවන් ප්‍රහාර එල්ල නොකරන ලෙසද දැඩි අනතුරු ඇඟවීමක් සිදු කර තිබේ.

“බෝම්බ ප්‍රහාර එල්ල කිරීම විශාල උල්ලංඝනයක්” යනුවෙන්ද ඔහු අවධාරණය කර තිබේ.

නෙටෝ සමුළුව සඳහා ධවල මන්දිරයෙන් පිටවෙමින් සිටියදී වාර්තාකරුවන්ට අදහස් දක්වමින් ඔහු ප්‍රකාශ කර ඇත්තේ, “ඉරානය උල්ලංඝනය කළා, නමුත් ඊශ්‍රායලයත් උල්ලංඝනය කළා. අපි ගිවිසුම් ඇතිකරගත් වහාම ඊශ්‍රායලය බෝම්බ ප්‍රහාර එල්ල කළා. එය මම දැකපු විශාලතම ප්‍රහාරයක්. මම ඉරානය ගැනත් සතුටු නෑ. ඊශ්‍රායලය ගැනත් සතුට නෑ. දෙපාර්ශවයම දැන් කරන්නේ මොකක්ද කියලා ඔවුන්වත් දන්නෙ නැහැ,” යනුවෙන්ද ට්‍රම්ප් මහතා සඳහන් කර තිබේ.

පවතින යුධමය තත්ත්වය මත කටාර් රාජ්‍යය තම ගුවන් කලාපය හරහා ගමන් කරන ගුවන් යානා සඳහා ගුවන් ගමන් තාවකාලිකව අත්හිටුවන බව විදේශ අමාත්‍යාංශය නිවේදනය කරයි.

මෙම තීරණය අනුව, හමාඩ් ජාත්‍යන්තර ගුවන්තොටුපොළ වෙත ගමන් කිරීමට නියමිත ගුවන් යානා විකල්ප ගුවන්තොටුපොළවලට යොමු කෙරේ.

මේ අතර, කටාර්හි පිහිටා ඇති අල් උඩෙයිඩ් ගුවන් හමුදා කඳවුර වෙත ඉරාන ප්‍රහාරයක් එල්ලවිය හැකි අවදානමක් ඇති බවත්, එම කඳවුර මැදපෙරදිග විශාලතම අමෙරිකානු හමුදා පදවියක් වන බවත් විදෙස් මාධ්‍ය වාර්තා කරයි.

අමෙරිකානු රාජ්‍ය දෙපාර්තමේන්තුව සහ බ්‍රිතාන්‍ය අධිකාරීන්, කටාර්හි සිටින තම පුරවැසියන්ට නැවත දැනුම් දෙන තුරු ආරක්ෂිත ස්ථානවල රැඳී සිටින ලෙස උපදෙස් ලබාදී ඇත.

අමෙරිකාව විසින් ඉරානයට එල්ල කළ ප්‍රහාරයට පිළිතුරු ලෙස දැඩි ප්‍රතිචාරයක් ලබාදීමට ඉරානය තීරණය කර ඇති බව එරට ඉස්ලාමීය විප්ලව ආරක්ෂක බළකාය (IRGC) ප්‍රකාශ කළේය.

IRGC ප්‍රකාශක ඊබ්‍රහිම් සොල්ෆගාරි සඳහන් කළේ, “එක්සත් ජනපදය සෘජුවම යුද්ධයකට අවතීර්ණ වී ඇත. ඔවුන් ඉරානයේ පූජනීය භූමිය උල්ලංඝනය කර ඇත” යන්නයි.

ඔහු වැඩිදුරටත් අනතුරු අඟවා සිටියේ, ඉදිරියේදී බලවත් සහ ඉලක්කගත ප්‍රතික්‍රියාක් ලබාදෙන බවත්, එක්සත් ජනපදය එම ක‍්‍රියාවලින් බරපතළ, කණගාටුදායක සහ අනපේක්ෂිත ප්‍රතිවිපාකවලට මුහුණදිය හැකි බවයි.

“ට්‍රම්ප් යනු සූදුකාරයෙකු” යැයි ද ඔහු කියා සිටියේ, ඔහුට යුද්ධය ආරම්භ කළ හැකි වුවද එය අවසන් කරනුයේ ඉරානය බව පවසමිනි.

IRGC යනු වසර 40කට පෙර ඉරානයේ ඉස්ලාමීය විප්ලවය ආරක්ෂා කිරීම සඳහා පිහිටුවූ බලකයක් වන අතර, එය දැන් ඉරානයේ ප්‍රධාන මිලිටරි, දේශපාලනික සහ ආර්ථික බලවේගයක් බවට පත්වී ඇත.

විදෙස් මාධ්‍ය වාර්තා පවසන්නේ IRGC සතුව ක්‍රියාකාරී සාමාජිකයින් 190,000 කට අධික පිරිසක් සිටින බවත්, විදේශ මෙහෙයුම් සඳහා කුඩ්ස් බලකාය හරහා ඔවුන් මිත්‍ර රටවලට සහ සන්නද්ධ කණ්ඩායම්වලට අත්යවශ්‍ය සහාය ලබා දෙන බවයි.