ශ්‍රී ලංකාවේ ජාතික සමගිය හා සංහිඳියාව තහවුරු කිරීමට සහ මානව හිමිකම් සුරැකීමට ජනාධිපති අනුර කුමාර දිසානායක මහතා ප්‍රමුඛ රජය ගෙනයන වැඩපිළිවෙළට සහාය ලබාදෙන බව එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක් මහතා පවසයි.

මෙරට සංචාරයක නිරත මහ කොමසාරිස්වරයා අද (26) පස්වරුවේ ජනාධිපති කාර්යාලයේදී ජනාධිපතිවරයා හමුවූ අවස්ථාවේදී මේ බව ප්‍රකාශ කළේය.

මෙරට සිදුවෙමින් පවතින නව දේශපාලන සහ සමාජමය පරිවර්තනය පිළිබඳව මහ කොමසාරිස්වරයා ඉහලින්ම අගය කළ අතර, උතුරේ සහ දකුණේ ජනතාව ජනාධිපතිවරයා සහ රජය කෙරෙහි දැඩි විශ්වාසයක් තබා සිටින බවද සඳහන් කළේය.

තම සංචාරය තුළින් මෙරට නව පරිවර්තනය පිළිබඳ පැහැදිලි අවබෝධයක් ලබාගත හැකිවූ බවද ඔහු පෙන්වා දුනේය. එසේම අද රටේ ජනතාව නව බලාපොරොත්තු සහිතව යහපත් අනාගතයක් අපේක්ෂා කරන බවද ඔහුගේ විශ්වාසය බවද සඳහන් කළේය.

අතුරුදන් වූවන් පිළිබඳවද විශේෂ අවධානය යොමුකරමින්, ඔවුන්ගේ පවුල්වල දැක්වෙන බලාපොරොත්තු ඉටු වනු ඇතැයි එක්සත් ජාතීන්ගේ මානව හිමිකම් කාර්යාලය අපේක්ෂා කරන බවද පැවසිය.

දේශපාලන සංස්කෘතිය නිසා ජනතා අයිතීන් සුරැකීමේ ආයතන අපොහොසත් වූ බැවින් ඒවා ශක්තිමත් කිරීමේ අවශ්‍යතාවයද මෙහිදී තෘප්තිමත් ලෙස සාකච්ඡා කෙරිණි.

ජනාධිපති අනුර කුමාර දිසානායක මහතා පවසා සිටියේ, අතුරුදන් වූවන් පිළිබඳ අත්දැකීම් ඇති දේශපාලන ව්‍යාපාරයක් ලෙස තමන්ට එය ගැඹුරු අවබෝධයකින් පැහැදිලි බවත්, ජාතික සමගිය, සංහිඳියාව සහ මානව හිමිකම් පිළිබඳව තම රජය කැපවී සිටින බවත්ය.

ආර්ථික ස්ථාවරතාවය ස්ථාපිත කිරීම මේ වන විට රජයේ ප්‍රමුඛ අරමුණ බවද ජනාධිපතිවරයා පෙන්වා දුනි. එමඟින් පවතින අභියෝග හැසිරවීමට ජාත්‍යන්තර සහය අවශ්‍ය වන බවද ඔහු අවධාරණය කළේය.

ශ්‍රී ලංකාවේ සැබෑ තත්ත්වය ලෝකය හමුවට ගෙන ඒමටත්, ජාත්‍යන්තර වශයෙන් රටේ ප්‍රතිරූපය ඉහළ දැමීමටත් එක්සත් ජාතීන්ගේ මහ කොමසාරිස් කාර්යාලය ඇතුළු ජාත්‍යන්තර ආයතනවල සහය අපේක්ෂා කරන බවද ජනාධිපතිවරයා සඳහන් කළේය.

වෙළෙඳපොළේ ලුණු මිල පහත දැමීම සඳහා උපරිම සිල්ලර මිල සීමාවන් යටතේ ලුණු නිකුත් කිරීම වහාම ආරම්භ කර ඇති බව ශ්‍රී ලංකා ලුණු නිෂ්පාදකයන්ගේ සංගමය නිවේදනය කරයි.

පාරිභෝගික කටයුතු පිළිබඳ සභාව සමඟ ඇති කරගත් එකඟතාවය පදනම් කරගෙන මෙම පියවර ගෙන ඇති අතර, රජය විසින් ආනයන සීමා ලිහිල් කිරීමෙන් අනතුරුව අවශ්‍ය තරම් ලුණු තොග මෙරටට ලැබී ඇතැයි සංගමය වැඩිදුරටත් සඳහන් කරයි.

ඒ අනුව, පහත උපරිම සිල්ලර මිල සීමාවන් යටතේ ආනයනිත කෑමට ගන්නා ලුණු නිකුත් කෙරේ:

• කැට ලුණු කිලෝග්‍රෑම් 1ක් – රු. 180
• ලුණු කුඩු කිලෝග්‍රෑම් 1ක් – රු. 240
• ලුණු කුඩු ග්‍රෑම් 400ක් – රු. 120

මෙම මිල යටතේ ඇසුරුම් කළ ලුණු දිවයින පුරා බෙදාහැරීම සඳහා දින කිහිපයක් ගතවිය හැකි අතර, එමගින් ඉහත සඳහන් මිලට පාරිභෝගිකයින්ට ලුණු ලබා ගැනීමේ හැකියාව උදා වනු ඇතැයිද සංගමය පවසයි.

මෙරට වෙළෙඳපොළ තුළ කීරි සම්බා සහල් ප්‍රමාණවත්ව නොමැති බව ශ්‍රී ලංකා පාරිභෝගික සේවා අධිකාරය විසින් සඳහන් කිරීම පදනම් කරගෙන, කීරි සම්බා සඳහා ආදේශක සහල් මෙට්‍රික් ටොන් 40,000ක් ආනයනය කිරීමට ආහාර ප්‍රතිපත්ති හා සුරක්ෂිතතා කමිටුව විසින් නිර්දේශ කර ඇත.

ඒ අනුව, මෙට්‍රික් ටොන් 5,000ක් රාජ්‍ය ආයතන මඟින්ද, අනෙක් ප්‍රමාණය පෞද්ගලික අංශය මඟින්ද ආනයනය කිරීමට තීරණය කර තිබේ.

මෙම තීරණයට එළැඹුණේ ජනාධිපති ලේකම් කාර්යාලයේදී පැවැති කමිටු රැස්වීමකදීය. මෙහිදී ආහාර සුරක්ෂිතතාවය තහවුරු කිරීම සඳහා ප්‍රතිපත්තිමය තීන්දු ගනු ලැබීය.

මේ අවස්ථාවේදී වෙළෙඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පෙන්වාදුන්නේ, පුරවැසියන්ගේ ආහාර අවශ්‍යතා සපුරාලීම මෙන්ම දේශීය නිෂ්පාදකයා ආරක්ෂා කරගැනීමද මෙහි අරමුණක් වන බවය.

එමෙන්ම, දේශීය ගොවියා ආරක්ෂා කිරීමේ අරමුණින් කීරි සම්බා වී කිලෝවක් රු. 120ක මිලකට වී අලෙවි මණ්ඩලය සහ සතොස ආයතනය මඟින් මිලදී ගැනීමේ කටයුතු අඛණ්ඩව පවත්වාගෙන යාමට තීරණය කෙරිණි.

ත්‍රිපෝෂ නිෂ්පාදනය සඳහා බඩඉරිගු ගබඩා කිරීමේ පහසුකම් ඇති කිරීම, බියර් හා සත්ව ආහාර නිෂ්පාදන සඳහා සහල් හෝ කැඩුණු සහල් හෝ විකල්ප අමුද්‍රව්‍ය ආනයනය කිරීම පිළිබඳවද සාකච්ඡා කෙරිණි.

එමෙන්ම, පාරිභෝගික අවශ්‍යතාවයන්ට අනුව බඩඉරිගු, ටින් මාළු, බිත්තර, මාංශ නිෂ්පාදන සහ ලුණු ආනයන කටයුතුද සාකච්ඡා විය.

පොහොර ආනයනය, තොග පවත්වා ගැනීම, සැපයීම සහ බෙදාහැරීම, යල කන්නයට පොහොර බෙදාදීමේ ප්‍රගතිය, ණය නිකුත් කිරීම සහ වගා කටයුතුවල සාර්ථකත්වය පිළිබඳවද මෙහිදී විශ්ලේෂණයක් සිදු විය.