එක්සත් ජාතික පක්ෂය (එජාප) සහ සමගි ජනබලවේගය (එස්.ජේ.බී.) අතර පවතින දුරස්ථභාවය අවසන් කරමින් එක්මුතුවෙන් ක්‍රියා කිරීමට කැපවෙන බව එජාපය විසින් නිකුත් කළ විශේෂ නිවේදනයක සඳහන් වේ.
එම නිවේදනයේ වැඩිදුරටත් සඳහන් වන්නේ, ශ්‍රී ලංකාවේ ප්‍රජාතන්ත්‍රවාදී බහුපක්ෂ ක්‍රමය ආරක්ෂා කිරීම සඳහා සියලු දේශපාලන පක්ෂ එක වේදිකාවකට ගෙන ඒම තම පක්ෂයේ ස්ථාවරය බවය.
එමගින්, බහුපක්ෂ ක්‍රමය රැක ගැනීමේදී ප්‍රතිපත්ති සහ පක්ෂ අනන්‍යතාවය ආරක්ෂා විය යුතු බවද එජාපය අවධාරණය කරයි.
ඒ අනුව, එම ස්ථාවරයට එකඟ වීමට අනෙකුත් සියලු දේශපාලන පක්ෂවලටද එජාපය කැඳවීමක් කර ඇත.
තවද, විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් විපක්ෂ නායක කාර්යාලයේ පැවැත්වෙන කමිටු සාකච්ඡා සඳහා එජාපය සහභාගී වීමටත්, අනෙකුත් දේශපාලන පක්ෂ සමග ද පක්ෂික සාකච්ඡා සිදු කළ යුතු බවත් එම නිවේදනයේ සඳහන් වේ.
අමතරව, පක්ෂ දෙක අතර සාකච්ඡා කිරීම සඳහා කමිටුවක් පත් කිරීමේ යෝජනාවටද එජාපය එකඟත්වය පළ කර ඇති අතර, එස්.ජේ.බී. මෑතකදී කළ ප්‍රකාශත් සහ එජාපයේ මූලික අරමුණත් සලකාබලා ඉදිරි වැඩපිළිවෙලක් සකස් කළ හැකි බව ද එම නිවේදනයෙහි තවත් සඳහන් වේ.
