හිටපු පාර්ලිමේන්තු මන්ත්රීවරයෙකු මෙන්ම දකුණු පළාත් සභා මන්ත්රීවරයෙකු වූ පූජ්ය බද්දේගම සමිත හිමි, මාතර පෞද්ගලික රෝහලට ප්රතිකාර ලබමින් සිටියදී අද (30) අලුයම අපවත් වී තිබේ. මියයන විට උන්වහන්සේ 69 වන වියේ පසු විය.
මීට දින කිහිපයකට පෙර කොවිඩ් ආසාදිතව ගාල්ල කරාපිටිය රෝහල් ප්රතිකාර ලබමින් සිට සුවය ලබා විහාරස්ථානයට වැඩමකර තිබේ. යළි ස්වසන අපහසුතා හේතුවෙන් උන්වහන්සේ පසුගිය 27 වනදා රාත්රියේ ගාල්ල පෞද්ගලික රෝහලකට ඇතුළත් කිරීමෙන් අනතුරුව අද අලුයම අපවත් වී ඇති බව රෝහල් ආරංචි මාර්ග පැවසුවේය. උන්වහන්සේ අපවත් වීමට හේතුව කොවිඩ් නියුමෝනියා තත්ත්වය බව උන්වහන්සේ ප්රතිකාර ලැබූ පෞද්ගලික රෝහලේ බලධාරියෙකු සඳහන් කළේය. එමෙන්ම උග්ර පෙනහලු ආසාදනයකින්ද උන්වහන්සේ පෙළී සිට තිබුණි.
2001 වසරේ සිට 2004 දක්වා කාලය තුළ පාර්ලිමේන්තු මන්ත්රීවරයෙකු ලෙස කටයුතු කළ පූජ්ය බද්දේගම සමිත හිමියන් මෙරට පාර්ලිමේන්තුවට තේරී පත්වූ පළමු භික්ෂූන් වහන්සේද වෙයි. ලංකා සමසමාජ පක්ෂයෙන් ක්රියාකාරී දේශපාලනයට පිවිසි උන්වහන්සේ දකුණු පළාත් සභාව විසුරුවා හරිනතුරුම එහි මන්ත්රීවරයෙකු ලෙසත් කටයුතු කළේය.
උන්වහන්සේගේ දේහය පිළිබඳ අවසන් කටයුතු අද (30) පස්වරුවේ සිදුකිරීමට නියමිතව තිබේ.