පොදු ජනතාව සඳහා පැවැත්වෙන සිරි දළදා දැක්මට එක්වීම සඳහා කිසිඳු විශේෂ පෝලිම් හෝ විශේෂ ප්‍රවේශ පත්‍ර නොමැති බව අස්ගිරි මහා විහාර පාර්ශ්වයේ නියෝජ්‍ය ලේඛකාධිකාරී ශාස්ත්‍රපති පූජ්‍ය නාරම්පනාවේ ආනන්දාභිදාන නායක ස්වාමීන්වහන්සේ පැවසීය.

අද (10) රජයේ ප්‍රවෘත්ති දෙපාර්තමේන්තුවේදී පැවැති විශේෂ මාධ්‍ය සාකච්ඡාවකට එක්වෙමින් උන්වහන්සේ පවසා සිටියේ, මෙවර දළදා දැක්මට සහභාගී වන්නට අවශ්‍ය සැමට පවතින පොදු පෝලිම් භාවිතයෙන්ම පැමිණිය යුතු බවය.

කෙසේ වෙතත්, මහා සංඝරත්නය, විදේශ තානාපතිවරුන්, විශේෂ අමුත්තා හා විශේෂ අවශ්‍යතා සහිත පුද්ගලයින් සඳහා පමණක් විශේෂ පහසුකම් සලසා ඇති බවද උන්වහන්සේ පැවසූහ.

එමෙන්ම, මහා සංඝරත්නය සඳහා වෙන්කර ඇති විශේෂ ගේට්ටුවක් මඟින් පෙ.ව. 10ට පෙර දළදා මාළිගාවට පැමිණිය යුතු අතර, උන්වහන්සේලාට පිරිනමන දානයෙන් අනතුරුව දළදා වන්දනාවට සහභාගී විය හැකි බවද සඳහන් කළේය.

වසර 16කට පසුව පැවැත්වෙන මෙම සිරි දළදා දැක්ම, ජනාධිපති අනුර කුමාර දිසානායක මහතාගේ ආරාධනය මත මල්වතු සහ අස්ගිරි උභය විහාර පාර්ශ්වීය ස්වාමීන්වහන්සේලාගේ මගපෙන්වීම යටතේ සම්පූර්ණයෙන්ම සංවිධානය කර ඇති බවද නාරම්පනාවේ ආනන්දාභිදාන ස්වාමීන්වහන්සේ අවධාරණය කළහ.

භූ කම්පනයකට ලක්ව විපතට පත් වූ මියන්මාර ජනතාව වෙනුවෙන් ඇමරිකානු ඩොලර් මිලියනයක මුදල් ආධාරයක් ලබාදීමට ශ්‍රී ලංකා රජය තීරණය කර ඇති අතර, එයට අදාළ චෙක්පත ජනාධිපති ලේකම් ආචාර්ය නන්දික සනත් කුමානායක මහතා විසින් ශ්‍රී ලංකාවේ මියන්මාර තානාපතිනි මාලර් තන් ටයික් මහත්මිය වෙත අද (10) ජනාධිපති ලේකම් කාර්යාලයේදී පිරිනමන ලදී.

වර්තමාන ආර්ථික අර්බුදයක නිරතව සිටින ශ්‍රී ලංකාව මියන්මාර ජනතාව වෙනුවෙන් මෙවැනි ආධාරයක් ලබාදීම අගය කළ යුතු බවත්, ජනාධිපති අනුර කුමාර දිසානායක මහතා ඇතුලු රජයට එම පිහිටවීම සඳහා ස්තූතිය පළ කරන බවත් තානාපතිවරිය අවධාරණය කළාය.

ඒ අනුව, අසීරුකමට පත් වූ මියන්මාර ජනතාවට සහන කණ්ඩායම් සහ සෞඛ්‍ය කාර්ය මණ්ඩල යොමු කිරීම පිළිබඳවද උණුසුම් කෘතඥතාව පළ කරන ලදී.

ශ්‍රී ලංකාව සහ මියන්මාරය අතර පවතින දිගුකාලීන ආගමික සහ සංස්කෘතික සබඳතා තවදුරටත් වර්ධනය වන බවද තානාපතිවරිය සදහන් කළාය.

මෙම අවස්ථාවට ජනාධිපති ජ්‍යෙෂ්ඨ අතිරේක ලේකම් රෝෂන් ගමගේ, මියන්මාර තානාපති කාර්යාලයේ Winh Wint Khaus Tun සහ Lei Yi Win යන මහත්ම මහත්මීන් ද සහභාගී වී සිටියහ.

වෛද්‍ය කර්මය සඳහා වන පරිපූරක වෘත්තීන් ලෙස වෛද්‍ය රසායනාගාර කාර්මික විද්‍යාඥ සහ භෞත චිකිත්සක තනතුරු සඳහා අනුස්ථාපන හා සමායෝජන පාඨමාලා සදහා උපාධිධාරීන් බඳවා ගැනීමේ තරඟ විභාගය 2025 අප්‍රේල් මස 27 වන ඉරුදින පැවැත්වීමට කටයුතු කර ඇති බව සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම් (පාලන II) චාමික එච්. ගමගේ මහතා සඳහන් කළේය.

මෙම තරඟ විභාගය සඳහා සුදුසුකම් ලත් අයදුම්කරුවන්ට මේ වන විට ප්‍රවේශ පත්‍ර නිකුත් කර ඇති අතර, අයදුම්කරුවන්ගේ සංඛ්‍යාව 600 කට අධික බවද වැඩිදුරටත් අනාවරණය විය.

විභාගය පැවැත්වෙන විභාග මධ්‍යස්ථාන ලෙස කොළඹ හෙද විදුහල, කඳාන හෙද විදුහල, කොළඹ පශ්චාත් හෙද විදුහල සහ කාසල්වීදිය කාන්තා රෝහල නම් කර තිබේ.

අදාළ තරඟ විභාගය සම්බන්ධයෙන් වැඩිදුර තොරතුරු සෞඛ්‍ය අමාත්‍යාංශයේ නිල වෙබ් අඩවිය වන www.health.gov.lk ඔස්සේ ලබාගත හැක.