පසුගිය දා පානදුර සහ අකුරණ ප්‍රදේශවලට ලබාදී තිබූ විශේෂ ආරක්ෂාව සම්බන්ධයෙන් ශ්‍රී ලංකා පොලිසිය පැහැදිලි කිරීමක් කර තිබෙනවා.පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව සඳහන් කළේ පානදුර ප්‍රදේශයේ ඉස්ලාමීය යාඥාවන් ඉලක්ක කර ගනිමින් ආරක්ෂක අවදානම් සම්බන්ධයෙන් සමාජ මාධ්‍ය ඔස්සේ අසත්‍ය තොරතුරු ප්‍රචාරය කර ඇති බවයි.එබැවින් එවැනි සිදුවීම් වළක්වා ගැනීම සඳහා විශේෂ ආරක්ෂාවක් ලබාදීමට පොලිසිය කඩිනම් පියවර ගෙන ඇති බවද ඔහු පැවසීය.
කෙසේ වෙතත්, ජ්‍යෙෂ්ඨ පොලිස් අධිකාරී තල්දූව පැවසුවේ, අකුරණ ප්‍රදේශයේ මුස්ලිම් පල්ලි ඉලක්ක කරගනිමින් පිපිරීමක් සිදුවිය හැකි බවට අනතුරු ඇඟවීමක් පොලිස් හදිසි ඇමතුම් අංකයට ලැබී ඇති බවයි.
එම පණිවිඩයේ සත්‍ය අසත්‍යතාව සොයා බලන අතරම එවැනි සිදුවීම් වළක්වා ගැනීම සඳහා අකුරණ එම ප්‍රදේශයට විශේෂ ආරක්ෂාවක් ලබාදීමට පොලිසිය කටයුතු කළ බව ඔහු වැඩිදුරටත් පැවසීය.
අලවතුගොඩ පොලිස් ස්ථානය සහ ප්‍රදේශයේ මුස්ලිම් පල්ලි නියෝජිතයින් සමඟ එක්ව විශේෂ ආරක්ෂාවක් ද සපයා තිබූ බවයි පොලිස් මාධ්‍ය ප්‍රකාශකවරයා වැඩිදුරටත් සඳහන් කළේ.
අසත්‍ය තොරතුරු පිටුපස සිටින පුද්ගලයා හඳුනා ගැනීම සඳහා පරීක්ෂණ ක්‍රියාත්මක බව ඔහු පැවසීය. රාමසාන් උත්සවය නිමිත්තෙන් අවශ්‍ය ආරක්‍ෂාව සලසන ලෙස පොලිස්පතිවරයා විසින් විශේෂ නියෝග නිකුත් කර ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී තල්දූව මහතා සඳහන් කළේය.