පසුගිය දින කිහිපය තුළ දිවයිනේ පවතින අධික වර්ෂාව සහ සුළං තත්ත්වය හේතුවෙන් සිදුවූ වගා හානි පිළිබඳව තක්සේරු කිරීමේ කටයුතු කෘෂිකාර්මික හා ගොවිජන රක්ෂණ මණ්ඩලය මඟින් ආරම්භ කර ඇත.

මෙම තත්ත්වය මත වී, බඩඉරිඟු, අර්තාපල්, ලොකු ලූනු, සෝයා බෝංචි සහ අමු මිරිස් වැනි වගාවන්ට සිදුවන හානිය සඳහා, ගොවීන්ට රක්‍ෂණ ආවරණයකින් තොරවම රක්ෂණ වන්දි ලබාදීමට කටයුතු කර තිබේ. එමගින් අක්කර 5ක් දක්වා වගා සඳහා නොමිලේ රක්ෂණ වන්දි ලබා දෙන අතර, එක් හෙක්ටයාරයකට උපරිම රු. 100,000ක් දක්වා වන්දි ගෙවීම සිදු කෙරේ.

දැනට මාතර දිස්ත්‍රික්කය තුළ ගොවීන් 100 කට අයත් අක්කර 130 ක වගා භූමි හානිවී තිබෙන බව වාර්තා වන අතර, ඉදිරි දිනවලදී තවත් වගා හානි පිළිබඳව නිරන්තර අධීක්ෂණයක් සිදු කිරීමට සැලසුම් කර ඇත.

මේ අතර ජලයෙන් බලපෑමට ලක්වූ වගාවන් පිළිබඳව ජලය ක්‍රමයෙන් බැස යන බව දිස්ත්‍රික් භාර අධ්‍යක්ෂවරුන් දැනුම් දී ඇත.

වගා හානි පිළිබඳව දැනුම්දීම සඳහා ගොවීන්ට කෘෂිකාර්මික හා ගොවිජන රක්ෂණ මණ්ඩලයේ 1918 ක්ෂණික දුරකථන අංකය අමතා වාර්තා කිරීමේ හැකියාව ලබාදී තිබේ.

ලංකා විදුලිබල මණ්ඩලයේ නව සභාපති ලෙස ඉංජිනේරු මහාචාර්ය කේ.ටී.එම්.යූ. හේමපාල මහතා පත් කර ඇති බව එම මණ්ඩලය නිකුත් කළ නිල ලිපියකින් දැක්වෙයි.

ඔහු පසුගිය කාලයේදී බලශක්ති අමාත්‍යාංශයේ ලේකම් ධූරයද දැරූවෙකි.

අදාල ලිපියෙන් වැඩිදුරටත් සදහන් වන්නේ, මෙතෙක් සභාපති ධූරය භාරව සිටි ඉංජිනේරු ආචාර්ය ඩී.ජේ.ටී. සියඹලාපිටිය මහතාගේ ඉල්ලා අස්වීම වහාම ක්‍රියාත්මක වන පරිදි අනුමත කර ඇති බවයි.

කොළඹ කොටස් වෙළෙඳපොළේ සියලු කොටස් මිල දර්ශකය අද (03) දිනයේදී ඉතිහාසයේ උච්චතම මට්ටමට ළඟා වීමට සමත්විය.

ගනුදෙනු අවසානයේදී එය ඒකක 17,214.39ක් ලෙස සටහන් වී ඇති අතර, මෙය 2025 පෙබරවාරි 18 වන දින වාර්තා වූ පෙර උච්චතම අගය වූ ඒකක 17,193.8 ක වාර්තාව පසුකරමින් සංකේතාත්මක වාර්තාවක් පිහිටුවීමක් ලෙස සැලකේ.

අද දිනයේදී ඒකක 234.50ක දැවැන්ත වර්ධනයක්ද සියලු කොටස් මිල දර්ශකය තුළ වාර්තා විය.

මෙම වර්ධනයට ප්‍රධාන වශයෙන් බලපා තිබූයේ බැංකු සහ මූල්‍ය සමාගම්වල කොටස් මිල ඉහළ යාමයි. කොමර්ෂල් බැංකුව, සම්පත් බැංකුව, DFCC බැංකුව, සෙන්ට්‍රල් ෆිනෑන්ස් සහ හැටන් නැෂනල් බැංකුව යන සමාගම්වල කොටස් මිල ඉහළ යාම මෙයට දැඩි ලෙස දායක විය.

මේ අතර අද දිනය තුළ රුපියල් බිලියන 7.37ක ගනුදෙනු පිරිවැටුමක් වාර්තා වී ඇති අතර, එය ද වෙළෙඳපොළේ සක්‍රීයතාවය පෙන්වන විශේෂිත සලකුණක් ලෙස සලකනු ලැබේ.