මයික්‍රොසොෆ්ට් සමාගම විසින් සේවකයින් 6000ක් පමණ සේවයෙන් ඉවත් කිරීමට තීරණය කර ඇති බව විදෙස් මාධ්‍ය වාර්තා කරයි.

පසුගිය අඟහරුවාදා මෙම නිවේදනය සමාගම විසින් නිකුත් කර තිබේ.

මෙම සේවක කප්පාදුව, සමාගමේ මුළු ශ්‍රම බලකායෙන් ප්‍රතිශත 3කටත් වඩා අඩු ප්‍රමාණයක් වන බව සඳහන් වෙයි.

මයික්‍රොසොෆ්ට් සමාගම බලාපොරොත්තු වන්නේ මෙම පියවර හරහා පිරිවැය පාලනය කිරීමත්, කෘතිම බුද්ධිය සම්බන්ධයෙන් ඩොලර් බිලියන ගණනක් ආයෝජනය කිරීමත් යිැයි විදෙස් මාධ්‍ය පෙන්වා දෙයි.

2023 වසරේදී සේවකයින් 10,000ක් සේවයෙන් ඉවත්කළ පසු සිදුවන විශාලතම සේවක කප්පාදුව ලෙස මෙය සැලකිය හැක.

නව පාප් වහන්සේ තෝරා පත් කර ගැනීම සඳහා පැවැත්වෙන රහසිගත ඡන්ද විමසීම අද (08) පෙරවරුවේදින් සිදු වූවද, එදිනද නව පාප් වහන්සේ තේරී පත් කිරීම සිදු නොවූ බව විදෙස් මාධ්‍ය වාර්තා කරයි.

වතිකානයේදී ඊයේ ආරම්භ වූ මෙම ඡන්ද විමසීම, ඊයේ පස්වරුවේ පැවති පළමු වටයේදීත් නව පාප් වහන්සේ තේරීම අසාර්ථක වූ බැවින්, අද පෙරවරුවේ යළිත් පැවැත්විය.

ඡන්ද විමසීමෙන් අනතුරුව වතිකානයේ ශාන්ත පීතර බැසිලිකාවේ දුම් කවුළුවෙන් නිකුත් වූ කළු දුමාරය හරහා, නව පාප් වහන්සේ තවමත් තේරී පත් වී නොමැති බව සංකේතවත් වී ඇත.

අද (08) උදෑසන පාකිස්තානයේ ලාහෝර් නගරයේ පිපිරීම් තුනක් සිදුව ඇති බව විදෙස් මාධ්‍ය වාර්තා කරයි.

මෙම සිදුවීම්වලට හේතුවෙන් ලාහෝර් සහ ඉස්ලාමාබාද් ගුවන්තොටුපොළවල ගුවන් ගමන් තාවකාලිකව අත්හිටුවා ඇති බවද වාර්තා වේ.

පිපිරීම් වාර්තා වී ඇත්තේ වෝල්ටන් ගුවන්තොටුපොළ අසල ගෝපාල් නගර් සහ නසීරාබාද් ප්‍රදේශයන්හිදීය. එම ප්‍රදේශවල පදිංචිව සිටින ජනතාව නිවෙස්වලින් පලායන ආකාරය සහ එම අවට කලාප දුමින් පිරී ඇති බවද විදෙස් වාර්තා පෙන්වයි.

මූලික වාර්තාවලට අනුව, පකිස්තාන ගුවන් හමුදාවේ පුහුණු අභ්‍යාසයක් අතරතුර මෙම පිපිරීම් සිදුවී ඇති බවට සැකයක් පවතින අතර, මේ පිළිබඳව තවම නිල ප්‍රකාශයක් නිකුත් වී නොමැත.

පිපිරීම් සිදුවී ඇත්තේ පකිස්තාන නාවික හමුදා යුද විද්‍යාලයට ආසන්නව සහ ලාහෝර් නගරයේ ජනප්‍රිය මොඩල් ටවුන් උද්‍යානය අසළ පිහිටි ඉහළ ආරක්ෂිත ප්‍රදේශයක බවද වාර්තා වේ.

එමෙන්ම මෙම පිපිරීම් සිද්ධියත් සමඟ ආරක්ෂක හේතූන් මත ශ්‍රී ලංකාවේ සිට පකිස්තානයේ ලාහෝර් දක්වා වන සියලුම ගුවන් ගමන් නැවත දැනුම් දෙන තුරු අත්හිටුවා ඇති බව ශ්‍රී ලංකන් ගුවන් සේවය නිවේදනය කර තිබේ.