පොලිස්පති දේශබන්දු තෙන්නකෝන් මහතාට එල්ල වී ඇති චෝදනා සම්බන්ධයෙන් විමර්ශනයක් සඳහා පත් කෙරෙන ත්‍රිපුද්ගල කමිටුව සඳහා සාමාජිකයින් නම් කරන ලෙස කථානායකවරයා අදාළ පාර්ශ්ව වෙත දැනුම් දී ඇත.

මෙම කමිටුව සඳහා අගවිනිසුරුවරයා විසින් විනිසුරුවරයෙකු පත් කළ යුතු අතර, ජාතික පොලිස් කොමිෂන් සභාවේ සභාපතිවරයා ද සාමාජිකයෙකු වනු ඇත. තෙවැනි සාමාජිකයා වශයෙන් අගමැති සහ විපක්ෂ නායකයාගේ එකඟත්වයෙන් වෘත්තිකයෙකු නම් කලේය.

විමර්ශනයෙන් අනතුරුව කමිටුව විසින් නිර්දේශ සහිත වාර්තාවක් කථානායකවරයා වෙත ඉදිරිපත් කිරීමට නියමිත අතර, එම නිර්දේශ පදනම් කරගෙන පොලිස්පතිවරයා ධුරයෙන් ඉවත් කිරීම සම්බන්ධ යෝජනාව පාර්ලිමේන්තුවට ඉදිරිපත් කෙරෙනු ඇත.

සිංහල – දෙමළ අලුත් අවුරුද්ද උදා වීමට දැන් ඉතිරිව ඇත්තේ තවත් පැය කිහිපයක් පමණයි. අද (13) පුරාණ අවුරුද්දට අයත් කෝනම් දිනය ලෙස සැලකේ.

සූර්යයා මීන රාශියෙන් මේශ රාශියට ගමන් කිරීමත් සමඟ අලුත් අවුරුද්ද උදාවෙන්නේ හෙට (14) අලුයම 03.21 ටයි.

ජෝතිෂ්‍යය අනුව:

• අද රාත්‍රී 08.57 ට පුණ්‍ය කාලය ඇරඹේ. ඒ අනුව එයට පෙර සියලු දේ අත්හැර ආගමික වතාවත්වල යෙදීම සුදුසුය.
• අද (13) පරණ අවුරුද්ද වෙනුවෙන් දිවුල්පත් යුෂ මිශ්‍ර නානු ගා ස්නානය කිරීම නිවැරදිය.
• ආහාර පිසීමේ නැකත – හෙට උදෑසන 04.04 ට.
• තඹ වර්ණ ඇඳගෙන දකුණු දිශාවට මුහුණලා ලිප් බැඳ ගිනි මොළවා කිරිබත්, කැවිලි, කිරි සහ විලඳ පිසීම සුදුසුය.
• වැඩ ඇල්ලීම, ගණුදෙනු, ආහාර අනුභවය – හෙට (14) උදෑසන 06.44 ට.
• මුතු සහ ශ්වේත වර්ණ ඇඳගෙන, දකුණු දිශාවට මුහුණලා එම කටයුතු සිදු කළ යුතුය.
• හිසතෙල් ගෑමේ නැකත – අප්‍රේල් 16 බදාදා උදෑසන 09.04 ට.
• රැකීරක්ෂා පිණිස පිටත් වීමේ නැකත – අප්‍රේල් 17 බ්‍රහස්පතින්දා උදෑසන 09.03 ට යෙදේ.

මේ අතර අලුත් අවුරුද්ද සඳහා ගම්බිම් බලා ගමන් කරන ජනතාව වෙනුවෙන් අද දිනයේදීත් විශේෂ දුම්රිය සේවා ක්‍රියාත්මකයි.

අවුරුදු සමය නිමිත්තෙන් ලංකා විදුලි බල මණ්ඩලය විසින් රටේ කුඩා ජල විදුලි බලාගාර රැසක් තාවකාලිකව අත්හිටුවීම සම්බන්ධයෙන් කුඩා ජල විදුලි බලාගාර ප්‍රවර්ධකයින්ගේ සංගමය දැඩි අප්‍රසාදය පළ කර ඇත.

විදුලි බල මණ්ඩලය මේ පියවර ගත්තේ ජාලයේ ස්ථාවරත්වය සුරක්ෂිත කිරීමේ අරමුණින් බව පැවසුවද, එය ජාතික බලශක්ති සුරක්ෂිතතාවයට සෘජු තර්ජනයක් බවත් බලශක්ති අංශයට එල්ලවූ බරපතළ පහරක් බවත් සංගමය චෝදනා කරයි.

සංගමය පෙන්වා දෙන්නේ, සූර්ය හා සුළං වැනි කඩින් කඩ ලැබෙන ප්‍රභවයන්ට වඩා කුඩා ජල විදුලිය විශ්වාසදායක හා අඛණ්ඩ බලශක්ති මූලාශ්‍රයක් බවයි.

මෙම තීරණය හේතුවෙන් පැය 08කදී මෙගාවොට් 450ක විදුලි ධාරිතාවක් ක්‍රියාත්මක වීම නවතා දැමෙන අතර, ජාතික පද්ධතියට ඒකක මිලියන 1.8ක විදුලි සැපයුමක් අහිමි වන බවද සංගමය පෙන්වා දෙයි.

කෙසේ වෙතත්, ලංකා විදුලි බල මණ්ඩලය පැවසූවේ අවුරුදු සමයේදී කර්මාන්තශාලා සහ ව්‍යාපාරික ස්ථානවලින් විදුලි පරිභෝජනය අඩුවන බැවින් විදුලි ඉල්ලුම අවම වීම නිසා පද්ධතියේ ස්ථායිතාව පවත්වා ගැනීම සඳහා මෙම තීරණය ගත් බවය.