ඉන්දීය ක්‍රිකට් නායක රෝහිත් ෂර්මා ජාත්‍යන්තර ටෙස්ට් ක්‍රිකට්වලින් විශ්‍රාම ලබාගෙන ඇත. එය ඔහුගේ Instagram ගිණුමේ පණිවිඩයක් මඟින් තහවුරු කරමින්, රට වෙනුවෙන් සුදු ඇඳුමින් ක්‍රීඩා කිරීම ගෞරවයක් බවද සඳහන් කළේය.

ඔහු 67 ටෙස්ට් තරගවලදී ලකුණු 4301ක් ලබා ශතක 12ක් සහ අර්ධ ශතක 18ක් වාර්තා කර ඇත.

2024 T20 ලෝක කුසලානයෙන් පසුව ඔහු T20 ක්‍රිකට්වලින්ද විශ්‍රාම ගත්තේය. රෝහිත් තවදුරටත් එක්දින තරග සඳහා ක්‍රීඩා කරනු ඇත.

ශ්‍රී ලංකා වේගපන්දු යවන්නා වූ කසුන් රාජිත එංගලන්ත ප්‍රාන්ත ක්‍රිකට් තරගාවලිය සඳහා එසෙක්ස් කණ්ඩායම සමඟ තරග 5ක් සඳහා ගිවිසුම් වී ඇත.

එමගින් ලබන සිකුරාදා ආරම්භ වන වෝර්සෙස්ටර්ෂයර් කණ්ඩායමට එරෙහි තරඟයේදී ඔහු එසෙක්ස් නියෝජනය කරනු ඇත.

හිටපු ශ්‍රී ලංකා ජාතික පුහුණුකරු ක්‍රිස් සිල්වර්වුඩ් දැනට එසෙක්ස් කණ්ඩායමේ අධ්‍යක්ෂකවරයෙකු ලෙස කටයුතු කරන අතර, කසුන් රාජිතව කණ්ඩායමට එක් කරගැනීමට ලැබීම ගැන සතුටක් දක්වමින් ඔහු මෙම තරගාවලියේදී විශිෂ්ට ලෙස ක්‍රීඩා කිරීම අපේක්ෂා කරන බව ප්‍රකාශ කර ඇත.

2028 ලොස් ඇන්ජලීස් ඔලිම්පික් උළෙල සඳහා ක්‍රිකට් තරග පැවැත්වීමට නියමිත ස්ථානය ලෙස දකුණු කැලිෆෝනියාවේ පමෝනා නගරයේ තාවකාලිකව ඉදිකරන ක්‍රීඩාංගනයක් තෝරාගෙන ඇත.

වසර 128කට පසු ඔලිම්පික් උළෙලකදී ක්‍රිකට් තරග ඇතුළත් වීම මෙහි විශේෂත්වය වන අතර 2028 ඔලිම්පික් උළෙල ජූලි 14 සිට 30 දක්වා පැවැත්වීමට නියමිතව තිබේ.