මෙරට ළමුන් 2000ත් 2500ත් අතර පිරිසක් තැලසිමියා රෝගයට ගොදුරු වී ඇති බව සෞඛ්‍ය අමාත්‍යාංශය සඳහන් කරයි.

අමාත්‍යාංශයේ බෝ නොවන රෝග ඒකකයේ අධ්‍යක්ෂ විශේෂඥ වෛද්‍ය සමිද්දි සමරකෝන් මහත්මිය පැවසුවේ, වසරකට උපත ලබන ළමුන්ගෙන් 40ත් 50ත් අතර පිරිසක් තැලසිමියා රෝගීන් ලෙස හඳුනාගෙන ඇති බවය.

තවද, රෝග වාහකයින් ලක්ෂ 5කට ආසන්න සංඛ්‍යාවක් මෙරට සිටින බවද, ජාත්‍යන්තර තැලසිමියා දිනය වෙනුවෙන් අද පැවති මාධ්‍ය හමුවකට එක්වෙමින් වෛද්‍ය සමරකෝන් මහත්මිය පැවසීය.

මෙවර තැලසිමියා දිනය “තැලසීමියා සමඟ එක්ව ප්‍රජාවන් එක්සත් කිරීම, රෝගීන්ට ප්‍රමුඛතාව දීම” යන තේමාව යටතේ සංවිධානය වෙයි.

විල්පත්තු අභයභූමිය හරහා යාමට යෝජනා කර තිබූ අධිවේගී මාර්ගය ඉදිකිරීම සිදු නොකරන බවට බලධාරීන් තීරණය කර ඇති බව නීතිපතිවරයා ශ්‍රේෂ්ඨාධිකරණය වෙත ඊයේ (07) දින දැනුම් දී ඇත.

මේ වසරේ දෙවන විදුලි ගාස්තු සංශෝධනය සඳහා අදාළ යෝජනා ලබන සතිය තුළ ලබාදෙනු ඇති බව ලංකා විදුලිබල මණ්ඩලය පවසා ඇති අතර, එම සංශෝධනය සම්බන්ධයෙන් අවධානයෙන් සිටින බව මහජන උපයෝගීතා කොමිසම නිවේදනය කරයි.

කොමිසමේ සන්නිවේදන අධ්‍යක්ෂ ජයනාත් හේරත් මහතා පැවසුවේ, ජුනි සහ ජුලි මාසවල විදුලි ගාස්තු වෙනස්වීමක් සිදුවීමට ඇති අවස්ථාවක් ඇති බැවින්, එයට අදාළ යෝජනා මැයි මාසය තුළම කොමිසම වෙත ලැබිය යුතු බවය.

මෙම යෝජනා ලැබීමෙන් පසුව, ඒවා සම්පුර්ණයෙන් අධ්‍යයනය කිරීමත් සමඟ සති 03 සිට සති 06 දක්වා කාල පරාසයකින් කොමිසමේ නිල තීන්දුව නිකුත් කිරීමට නියමිතය.

අදාළ කාලසීමාව තුළ මහජන අදහස්ද ලබා ගැනීමට කටයුතු සිදුකරන බවද කොමිසම පවසයි.