දැනට පවතින වර්ෂාදායක කාලගුණයත් සමඟ දිස්ත්‍රික්ක හතරක ප්‍රදේශ කිහිපයකට නායයාමේ අනතුරු ඇඟවීම් ක්‍රියාත්මකව පවතින බව ජාතික ගොඩනැගිලි පර්යේෂණ සංවිධානය පවසයි.

ඒ අනුව, ගාල්ල දිස්ත්‍රික්කයේ ඇල්පිටිය, කළුතර දිස්ත්‍රික්කයේ පාලින්දනුවර, මහනුවර දිස්ත්‍රික්කයේ ගඟ ඉහළ කෝරළය සහ පස්බාගෙ කෝරලේ, කෑගල්ල දිස්ත්‍රික්කයේ බුලත්කොහුපිටිය, ⁠රුවන්වැල්ල, ⁠යටියන්තොට සහ අරනායක ප්‍රාදේශීය ලේකම් කොට්ඨාශවලට මෙම අනතුරු ඇඟවීම් නිකුත් කර ඇති අතර එම නිවේදන හෙට (28) පෙරවරු 10.00 දක්වා බලපැවැත්වේ.

අදාළ කාලසීමාව තුළ බස්නාහිර සහ සබරගමුව පළාත්වලට අමතරව ගාල්ල, මාතර, මහනුවර සහ නුවරඑළිය දිස්ත්‍රික්කවල ඇතැම් ප්‍රදේශවල මිලිමීටර් 100 පමණ තද වැසි වාර්තා විය හැකි බව කාලගුණ විද්‍යා දෙපාර්තමේන්තුව අනතුරු අඟවයි.

එම දෙපාර්තමේන්තුව සඳහන් කරන්නේ දිවයිනේ අනෙකුත් ප්‍රදේශවලද ස්වල්ප වර්ෂාදායක තත්ත්වයක් පැවතිය හැකි බවත්, නිරිතදිග මෝසම් කාලගුණ තත්ත්වයේ බලපෑම හේතුවෙන් ඉදිරියේදී තද වැසි තත්ත්වයේ වැඩි වීමක් බලාපොරොත්තු විය හැකි බවත්ය.

මධ්‍යම කඳුකරයේ බටහිර බැවුම් ප්‍රදේශවලට, උතුරු, උතුරු-මැද පළාත්වලට සහ හම්බන්තොට, පුත්තලම, ත්‍රිකුණාමලය දිස්ත්‍රික්කවලට පැයට කිලෝමීටර් 40 – 50 ත් අතර තද සුළං හමන බවද සඳහන් කෙරේ.

ගිගුරුම් සහිත වැසි සමඟ ඇතිවිය හැකි අකුණු හා තාවකාලික තද සුළං නිසා ඇතිවිය හැකි අනතුරු වලින් හැකි ඉක්මනින් ආරක්ෂාවට පියවර ගන්නා ලෙසත්, ආරක්ෂිත ස්ථානවලට ස්ථානගත වන්නා ලෙසත්, කාලගුණ විද්‍යා දෙපාර්තමේන්තුව මහජනතාවගෙන් ඉල්ලා සිටී.