ජාත්‍යන්තර මූල්‍ය අරමුදලේ පළමු නියෝජ්‍ය කළමනාකාර අධ්‍යක්ෂිකා ආචාර්ය ගීතා ගෝපිනාත් මහත්මිය ජූනි 15 සහ 16 යන දෙදින අතර ශ්‍රී ලංකා සංචාරයක නිරත වීමට නියමිත බව ශ්‍රී ලංකා මහ බැංකුව නිවේදනයක් නිකුත් කරමින් පවසයි.

2005 වසරෙන් පසුව ජාත්‍යන්තර මූල්‍ය අරමුදලේ සේවය කරන පළමු නියෝජ්‍ය කළමනාකාර අධ්‍යක්ෂවරයෙකු මෙරටට පැමිණෙමින් සිටීමත් සමඟ මෙම සංචාරය විශේෂත්වයකින් යුක්ත බවද මහ බැංකුව දැනුම් දේ.

මෙම සංචාරය සමඟින්, ජූනි 16 වැනිදා මුදල් අමාත්‍යාංශය, ශ්‍රී ලංකා මහ බැංකුව සහ ජාත්‍යන්තර මූල්‍ය අරමුදල එක්ව සංවිධානය කරන “ශ්‍රී ලංකාවේ ආර්ථිකය යථා තත්ත්වයට පත් කිරීම: ණය සහ පාලනය” යන මාතෘකාවෙන් පැවැත්වෙන සමුළුවට ආචාර්ය ගෝපිනාත් මහත්මිය විශේෂ ආරාධිතයෙකු ලෙස සහභාගී වීමට නියමිතය.

අද වනවිට ජාත්‍යන්තර මූල්‍ය අරමුදලේ සහය මත ක්‍රියාත්මක වන ආර්ථික ප්‍රතිසංස්කරණ වැඩසටහනේ පළමු අර්ධය අවසන්වී ඇති අතර, එම අවස්ථාවට සරිලන ලෙස පැවැත්වෙන මෙම සමුළුවේදී, ශ්‍රී ලංකාවේ සාර්ව ආර්ථික ස්ථායීතාවය, ණය ප්‍රතිව්‍යුහගතකරණය සහ පාලනය සම්බන්ධයෙන් අත්දැකීම් හා ඉදිරි අභියෝග පිළිබඳ සාකච්ඡා සිදුවනු ඇත.

එමෙන්ම, සංචාරය දිනවලදී ජාත්‍යන්තර මූල්‍ය අරමුදල සහ ශ්‍රී ලංකාව අතර පවතින සබඳතා පිළිබඳව ශ්‍රී ලංකා බලධාරීන් සමඟ ද්විපාර්ශ්වික සාකච්ඡා පවත්වන ලෙසත්, අනෙකුත් ප්‍රධාන කොටස්කරුවන් සමඟද සාකච්ඡා පැවැත්වීමට බලාපොරොත්තු වන බවද මහ බැංකු නිවේදනයේ දැක්වේ.

ගම්පහ දිස්ත්‍රික්කයේ ප්‍රදේශ රැසකට හෙට (11) දිනයේ පැය 10ක ජල කප්පාදුවක් ක්‍රියාත්මක කිරීමට නියමිත බව ජාතික ජල සම්පාදන හා ජලාපවහන මණ්ඩලය සදහන් කරයි.

එම මට්ටමින් ජල සැපයුම අත්හිටුවනුයේ උදෑසන 8.30 සිට පස්වරු 6.30 දක්වා කාලසීමාව තුළය.

මෙම ජල කප්පාදුවෙන් පෑලියගොඩ, වත්තල, ජාඇළ, සීදුව නගර සභා බලප්‍රදේශයන්ට අමතරව කැලණිය, වත්තල, බියගම, මහර, දොම්පේ, ජාඇළ, කටාන, මිනුවන්ගොඩ සහ ගම්පහ ප්‍රාදේශීය සභා බලප්‍රදේශයේ කොටසකට බලපෑම් එල්ල වේ.

බියගම ජල පවිත්‍රාගාරයේ ස්ථාපිත සූර්යබල විදුලි පද්ධතිය ප්‍රධාන පද්ධතියට සම්බන්ධ කිරීමේ වැඩිදියුණු කටයුතු සදහා මෙලෙස ජල සැපයුම අත්හිටුවනු ඇතැයි මණ්ඩලය වැඩිදුරටත් දැනුම් දෙයි.

ශ්‍රී ලාංකීය ජනතාවට සුවිශේෂී ආගමික හා ඉතිහාසමය සිදුවීම් රැසක් සිදුවූ වැදගත් දිනයක් ලෙස පොසොන් පොහොය සැලකිය යුතු බව ජනාධිපති අනුර කුමාර දිසානායක මහතා සඳහන් කරයි.

පොසොන් පොහොය දිනය වෙනුවෙන් නිකුත් කළ පණිවුඩයකින් ජනාධිපතිවරයා අවධාරණය කරන්නේ, මෙම දිනයෙන් උරුම වූ විශිෂ්ට වටිනාකමක් වන්නේ අවිහිංසාව යන්න බවයි. තමන්ගේද අනෙකාගේද ජීවන නිදහස සහ අයිතිය ආරක්ෂා වන සනාතන වටිනාකමක් ලෙස අවිහිංසාව සියලු දෙනාගේ හදවත් තුළ රඳවා ගැනීම වැදගත් යැයිද ජනාධිපතිවරයා පෙන්වා දෙයි.

එමෙන්ම අග්‍රාමාත්‍ය හරිනි අමරසූරිය මෙනෙවියද තම පණිවුඩයේදී සදහන් කළේ, අනුබුදු මිහිදු මහ රහතන් වහන්සේ මෙරටට ගෙන ආ සදහම් මඟ යළි යළිත් සිහිපත් කරමින් ආමිස හා ප්‍රතිපත්ති පූජාවන් හරහා ජීවිතයට ආලෝකය සහ සාමය ලබා ගැනීම අතිශයින් වැදගත් බවයි.

පොසොන් පොහොය ශ්‍රී ලංකාවේ ජනතාවට ආගමික, සංස්කෘතික, සමාජීය හා ආර්ථිකය පවා පුනරුදයකට මඟ හැරූ දිනයක් බවද අග්‍රාමාත්‍යවරිය අවධාරණය කරයි.