ජාත්‍යන්තර මූල්‍ය අරමුදලේ පළමු නියෝජ්‍ය කළමනාකාර අධ්‍යක්ෂිකා ආචාර්ය ගීතා ගෝපිනාත් මහත්මිය ජූනි 15 සහ 16 යන දෙදින අතර ශ්‍රී ලංකා සංචාරයක නිරත වීමට නියමිත බව ශ්‍රී ලංකා මහ බැංකුව නිවේදනයක් නිකුත් කරමින් පවසයි.

2005 වසරෙන් පසුව ජාත්‍යන්තර මූල්‍ය අරමුදලේ සේවය කරන පළමු නියෝජ්‍ය කළමනාකාර අධ්‍යක්ෂවරයෙකු මෙරටට පැමිණෙමින් සිටීමත් සමඟ මෙම සංචාරය විශේෂත්වයකින් යුක්ත බවද මහ බැංකුව දැනුම් දේ.

මෙම සංචාරය සමඟින්, ජූනි 16 වැනිදා මුදල් අමාත්‍යාංශය, ශ්‍රී ලංකා මහ බැංකුව සහ ජාත්‍යන්තර මූල්‍ය අරමුදල එක්ව සංවිධානය කරන “ශ්‍රී ලංකාවේ ආර්ථිකය යථා තත්ත්වයට පත් කිරීම: ණය සහ පාලනය” යන මාතෘකාවෙන් පැවැත්වෙන සමුළුවට ආචාර්ය ගෝපිනාත් මහත්මිය විශේෂ ආරාධිතයෙකු ලෙස සහභාගී වීමට නියමිතය.

අද වනවිට ජාත්‍යන්තර මූල්‍ය අරමුදලේ සහය මත ක්‍රියාත්මක වන ආර්ථික ප්‍රතිසංස්කරණ වැඩසටහනේ පළමු අර්ධය අවසන්වී ඇති අතර, එම අවස්ථාවට සරිලන ලෙස පැවැත්වෙන මෙම සමුළුවේදී, ශ්‍රී ලංකාවේ සාර්ව ආර්ථික ස්ථායීතාවය, ණය ප්‍රතිව්‍යුහගතකරණය සහ පාලනය සම්බන්ධයෙන් අත්දැකීම් හා ඉදිරි අභියෝග පිළිබඳ සාකච්ඡා සිදුවනු ඇත.

එමෙන්ම, සංචාරය දිනවලදී ජාත්‍යන්තර මූල්‍ය අරමුදල සහ ශ්‍රී ලංකාව අතර පවතින සබඳතා පිළිබඳව ශ්‍රී ලංකා බලධාරීන් සමඟ ද්විපාර්ශ්වික සාකච්ඡා පවත්වන ලෙසත්, අනෙකුත් ප්‍රධාන කොටස්කරුවන් සමඟද සාකච්ඡා පැවැත්වීමට බලාපොරොත්තු වන බවද මහ බැංකු නිවේදනයේ දැක්වේ.

ගම්පහ දිස්ත්‍රික්කයේ ප්‍රදේශ රැසකට හෙට (11) දිනයේ පැය 10ක ජල කප්පාදුවක් ක්‍රියාත්මක කිරීමට නියමිත බව ජාතික ජල සම්පාදන හා ජලාපවහන මණ්ඩලය සදහන් කරයි.

එම මට්ටමින් ජල සැපයුම අත්හිටුවනුයේ උදෑසන 8.30 සිට පස්වරු 6.30 දක්වා කාලසීමාව තුළය.

මෙම ජල කප්පාදුවෙන් පෑලියගොඩ, වත්තල, ජාඇළ, සීදුව නගර සභා බලප්‍රදේශයන්ට අමතරව කැලණිය, වත්තල, බියගම, මහර, දොම්පේ, ජාඇළ, කටාන, මිනුවන්ගොඩ සහ ගම්පහ ප්‍රාදේශීය සභා බලප්‍රදේශයේ කොටසකට බලපෑම් එල්ල වේ.

බියගම ජල පවිත්‍රාගාරයේ ස්ථාපිත සූර්යබල විදුලි පද්ධතිය ප්‍රධාන පද්ධතියට සම්බන්ධ කිරීමේ වැඩිදියුණු කටයුතු සදහා මෙලෙස ජල සැපයුම අත්හිටුවනු ඇතැයි මණ්ඩලය වැඩිදුරටත් දැනුම් දෙයි.

මෙරට බුදු ශාසනය පිහිටුවීම සිහිපත් වන පොසොන් පුර පසළොස්වක පොහොය දිනය අද (10) යෙදී ඇත.

මෙම දිනට අයත් විශිෂ්ට සිදුවීමක් ලෙස, මිහිදු මහ රහතන් වහන්සේ ධර්ම දූත පිරිසක් සමඟින් ලංකාවට පැමිණීම සිදුවී ඇත. එයත් සමඟින් ශ්‍රී ලංකාවේ බුදු දහම ස්ථාපිත විය.

අනුරාධපුර මිහින්තලා පර්වතයට පැමිණි මිහිදු මහ රහතන් වහන්සේ, එවකට රාජධානිය පාලනය කළ දෙවන පෑතිස් රජු ඇතුළු පිරිස පංචසීලයට පිහිටුවා “චුල්ලහත්ථි පදෝපම සුත්‍රය” දේශනා කළේ ද මෙම පොහොය දිනයේය.

එසේම, බුදුරජාණන් වහන්සේ බුද්ධත්වයට පත්වී සිව්වන සතියේදී රුවන්ගෙයි වැඩ හිදී ප්‍රථම වරට සවණක් විහිදූ බවත්, එයද පොසොන් පුර පසළොස්වක පොහොය දිනයේ සිදුවූ බවත් බෞද්ධ ඉතිහාසය සඳහන් කරයි.

තෙවැනි ධර්ම සංගායනාවද මෙම අරුතබර පොහොය දිනයේදී පැවැත්වී තිබේ.