සංචාරකයින්ගේ විශේෂ අවධානයට ලක්වන ලෝක උරුමයක් වූ සීගිරිය සුරක්ෂිත කිරීම සහ සංවර්ධනය කිරීම සඳහා රජය දැඩි අවධානය යොමුකර ඇත.

පුරාවිද්‍යා දෙපාර්තමේන්තුව, මධ්‍යම සංස්කෘතික අරමුදල සහ අනෙක් රාජ්‍ය ආයතන කිහිපයක් සමඟ එක්වූ කමිටුවක් විසින් සීගිරි උරුමය ආරක්ෂා කිරීම සඳහා නිර්දේශයන්ගෙන් සමන්විත වාර්තාවක් සකසා, බුද්ධ ශාසන ආගමික හා සංස්කෘතික කටයුතු අමාත්‍ය ආචාර්ය සුනිල් සෙනෙවි මහතාට පසුගිය දිනක භාරදුන් බව දැක්වෙයි.

මෙහිදී අමාත්‍යවරයා පැවසුවේ, සීගිරි පර්වතය වටා මීටර් 200-400 ක ප්‍රදේශය සංවේදී කලාපයක් බැවින්, එම ප්‍රදේශයේ ජීවත්වන ජනතාවගේ ජීවිතයට හානි නොවී පාරිසරික හා සන්ස්කෘතික වටිනාකම් ආරක්ෂා කරමින් එම ජනතාවට වෙනත් ජීවනෝපායන් ලබාදීමෙන් ඔවුන් එම ස්ථානවලින් ඉවත් කළ යුතු බවයි.

සීගිරි චිත්‍ර, පර්වතය, කුරුටු ගී සහ අවට හරිත භූ දර්ශනය සුරක්ෂිත කිරීම අනාගත පරපුර සඳහා මහඟු වගකීමක් වන අතර, මෙය ක්‍රියාත්මක කළ යුත්තේ සුලොගිත් සැලැස්මක් යටතේ යැයිද අමාත්‍යවරයා වැඩිදුරටත් පැවසීය.

මෙම අවස්ථාවට මධ්‍යම සංස්කෘතික අරමුදලේ අධ්‍යාක්ෂ ජනරාල් ආචාර්ය නිලාන් කුරේ මහතා ඇතුළු රාජ්‍ය නිලධාරීන් පිරිසක්ද සහභාගි වූහ.

2025 වසර සඳහා පැවති රජයේ වෛද්‍ය නිලධාරීන්ගේ සංගමයේ වාර්ෂික නිලවරණයෙදී වෛද්‍ය සංජීව තෙන්නකෝන් මහතා නැවතත් සභාපති ලෙස තේරී පත් විය.

එමෙන්ම වෛද්‍ය ප්‍රභාත් සුගතදාස මහතාද යළි සංගමයේ ලේකම් ලෙස පත්වුණි.

මෙම නිලවරණය 2025 ජුනි 28 දා පැවැත්වූ අතර, ඡන්ද 60%කට වඩා වැඩි ප්‍රතිශතයක් ලබාගෙන ඔවුන් ජයග්‍රහණය කළේය.

මෙවර මැතිවරණයේදී සංජීව-ප්‍රභාත් පාර්ශ්වයෙත්, දර්ශන සිරිසේන සහ හරිත අලුත්ගේ නියෝජනය කළ තරඟකාරී පාර්ශ්වයෙත් අතර දැඩි තරඟයක් දක්නට ලැබුණි.

අවසානයේදී, සංජීව තෙන්නකෝන් සහ ප්‍රභාත් සුගතදාස පාර්ශ්වය ආයතනික බලය තහවුරු කර ගන්නට සමත් විය.

2024 අංක 44 දරන රාජ්‍ය මූල්‍ය කළමනාකරණ පනතට අනුව මූල්‍ය ක්‍රමෝපාය ප්‍රකාශය ඉදිරිපත් කිරීම සඳහා පාර්ලිමේන්තුව 2025 ජුනි 30 වනදා විශේෂව රැස්වීමට නියමිතය.

මෙම රැස්වීම පෙරවරු 9.30ට කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් පැවැත්වේ.

මූල්‍ය ක්‍රමෝපාය ප්‍රකාශය වර්ෂයෙහි ජුනි 30 හෝ ඊට පෙර ඉදිරිපත් කළ යුතුයැයි පනතේ 11 වගන්තිය සඳහන් කර ඇති අතර එය ඉටු කිරීම සඳහා මෙම රැස්වීම කැඳවනු ලැබී ඇත.

පාර්ලිමේන්තුවේ ස්ථාවර නියෝග 16 ප්‍රකාරයෙන් අග්‍රාමාත්‍යවරිය විසින් කළ ඉල්ලීමකට අනුව පාර්ලිමේන්තුව කැඳවනු ලැබූ බව පාර්ලිමේන්තු මහලේකම් කුෂාණි රෝහණදීර මහත්මිය සඳහන් කළාය.

එදින සභාව කල්තැබීමේ විවාදය පස්වරු 4.30 දක්වා පැවැත්වීමටද නියමිතය.

පාර්ලිමේන්තුව යළි ජූලි 8, 9 සහ 11 යන දිනවලදී රැස්වීමට නියමිතය.