පාසල් කාලය පැය භාගයකින් දීර්ඝ කිරීමට ගත් තීරණය වෘත්තීය සමිති සහ අදාළ සියලු පාර්ශ්ව සමඟ සාකච්ඡා කරනු ලැබූ බව අග්‍රාමාත්‍ය අචාර්ය හරිනි අමරසූරිය මෙනවිය සඳහන් කළාය.
ඇය පෙන්වා දුන්නේ, වෙනස්කම් සිදුකිරීමේදී විවිධ අදහස් මතුවීම සාමාන්‍ය තත්ත්වයක් බවය.
කෙසේවෙතත්, පාසල් කාලය දිගු කිරීමට ගත් තීරණය කිසිදු කරුණු අධ්‍යයනයකින් තොරව බව විදුහල්පති ශ්‍රේණිධාරීන්ගේ සංගමය පවසයි. එම සංගමයේ ප්‍රධාන ලේකම් නිමල් මුදුන්කොටුව මහතා මාධ්‍ය හමුවකදී සඳහන් කළේ, ආණ්ඩුව තීරණයට පදනම් වූ හේතු ජනතාවට අනාවරණය කළ යුතු බවය.
සමස්ත ලංකා එක්සත් ගුරු සංගමයේ සභාපති පූජ්‍ය යල්වෙල පඤ්ඤාසේකර හිමිද පැවසුවේ, අදාළ සාකච්ඡාවලදී මේ දක්වා කිසිදු එකඟතාවක් නොමැති බවයි.
ඒ අතර, කුලියාපිටිය ප්‍රදේශයේදී මාධ්‍ය වෙත අදහස් දක්වමින් අග්‍රාමාත්‍යවරිය ප්‍රකාශ කළේ, වෘත්තීය සමිති, ගුරු මණ්ඩල සහ විදුහල්පතිවරුන් සමඟ දිගු කාලීන සංවාදයන් පවත්වා ගෙන යාමෙන් පසු මෙම තීරණය ගෙන ඇති බවය.
ඇය වැඩිදුරටත් පැවසුවේ, අමාත්‍යාංශයෙන් මේ පිළිබඳ චක්‍රලේඛයක් නිකුත් කර ඇති අතර විදුහල්පතිවරුන්ට මෝඩල් ටයිම්ටේබල් ලබා දී ඇති බවදය.
