කොන්දේසි දෙකක් සපුරාලන තුරු තමන් හමුවීම ප්‍රතික්ෂේප කරමින් ගාලුමුවදොර විරෝධතාකරුවන් පිරිසක් අග්‍රාමාත්‍ය මහින්ද රාජපක්ෂ මහතා වෙත ලිපියක් යොමුකර තිබේ.
විරෝධතාවට සම්බන්ධ ප්‍රමුඛ පෙළේ ක්‍රියාකාරීන් කිහිප දෙනෙකු විසින් සමාජ මාධ්‍ය ඔස්සේ පළ කර ඇති ලිපියට අනුව ඔවුන් ජනාධිපති ගෝඨාභය රාජපක්ෂ මහතාට සහ ආණ්ඩුවේ සිටින සියලුම රාජපක්ෂ පවුලේ සාමාජිකයින්ට ඉල්ලා අස්විය යුතු බව බලකර තිබේ. තම ප්‍රධාන ඉල්ලීම් දෙක ඉටුවන තුරු “ගෝඨාගොගම” විරෝධතාව අඛණ්ඩව ක්‍රියාත්මක කරන බවද විරෝධතාකරුවන් අගමැතිවරයාට දන්වා ඇත.
විරෝධතාකරුවන් සමඟ සාකච්ඡාවකට රජය සූදානම් බව අග්‍රාමාත්‍ය මහින්ද රාජපක්ෂ මහතා අද ප්‍රකාශ කිරීමෙන් අනතුරුව විරෝධතාකරුවන් සිය ඉල්ලීම් දෙක ඉදිරිපත් කර තිබේ.
