2024 න් පසු තම රට ජාත්‍යන්තර අභ්‍යවකාශ මධ්‍යස්ථානයෙන් ඉවත් වීමට සැලසුම් කර ඇති බව රුසියානු අභ්‍යවකාශ ඒජන්සියේ නව අධ්‍යක්ෂ ජනරාල් යූරි බොරිසොව් සඳහන් කර සිටියා.
සෙසු හවුල්කරුවන් මෙන් රුසියාව ද හොඳ හවුල්කරුවෙකු බවත්, රුසියාවේ එම තීරණය සම්බන්ධයෙන් විමතියට පත්වන බවත් අමෙරිකාව පවසා සිටියා.
අමෙරිකානු රාජ්‍ය දෙපාර්තමේන්තුවේ ප්‍රකාශක නෙඩ් ප්‍රයිස් සඳහන් කළේ, දෙරටේ අභ්‍යවකාශ ඒජන්සි වසර ගණනාවක් පුරා පවත්වාගෙන ආ වෘත්තීය සහයෝගීතාව අවසන් කිරීමට තීරණය කිරීම පිළිබඳව කනගාටුවට පත්වන බවයි.
ජාත්‍යන්තර අභ්‍යවකාශ මධ්‍යස්ථානය සිදු කළ තීරණාත්මක විද්‍යාත්මක අත්හදා බැලීම් රැසක්, අමෙරිකාවේ සහ රුසියාවේ මූලිකත්වයෙන් සිදු කෙරුණ අතර අදාළ තීරණය, අමෙරිකා – රුසියා අභ්‍යවකාශ සබඳතාවයේ අවසානයක් නොවන බව රුසියානු අභ්‍යවකාශ ඒජන්සියේ ප්‍රධානියා ප්‍රකාශ කළේ ය.
