ශ්‍රී ලංකා වේගපන්දු යවන්නා වූ කසුන් රාජිත එංගලන්ත ප්‍රාන්ත ක්‍රිකට් තරගාවලිය සඳහා එසෙක්ස් කණ්ඩායම සමඟ තරග 5ක් සඳහා ගිවිසුම් වී ඇත.

එමගින් ලබන සිකුරාදා ආරම්භ වන වෝර්සෙස්ටර්ෂයර් කණ්ඩායමට එරෙහි තරඟයේදී ඔහු එසෙක්ස් නියෝජනය කරනු ඇත.

හිටපු ශ්‍රී ලංකා ජාතික පුහුණුකරු ක්‍රිස් සිල්වර්වුඩ් දැනට එසෙක්ස් කණ්ඩායමේ අධ්‍යක්ෂකවරයෙකු ලෙස කටයුතු කරන අතර, කසුන් රාජිතව කණ්ඩායමට එක් කරගැනීමට ලැබීම ගැන සතුටක් දක්වමින් ඔහු මෙම තරගාවලියේදී විශිෂ්ට ලෙස ක්‍රීඩා කිරීම අපේක්ෂා කරන බව ප්‍රකාශ කර ඇත.

2028 ලොස් ඇන්ජලීස් ඔලිම්පික් උළෙල සඳහා ක්‍රිකට් තරග පැවැත්වීමට නියමිත ස්ථානය ලෙස දකුණු කැලිෆෝනියාවේ පමෝනා නගරයේ තාවකාලිකව ඉදිකරන ක්‍රීඩාංගනයක් තෝරාගෙන ඇත.

වසර 128කට පසු ඔලිම්පික් උළෙලකදී ක්‍රිකට් තරග ඇතුළත් වීම මෙහි විශේෂත්වය වන අතර 2028 ඔලිම්පික් උළෙල ජූලි 14 සිට 30 දක්වා පැවැත්වීමට නියමිතව තිබේ.

ශ්‍රී ලංකා යොවුන් මලල ක්‍රීඩිකා තරුෂි කරුණාරත්න සහ ශ්‍රී ලංකා මලල ක්‍රීඩිකා දිල්හානි ලේකම්ගේ පිළිවෙලින් කාන්තා මීටර 800 ඉසව්ව හා කාන්තා හෙල්ල විසිකිරීමේ ඉසව්ව නියෝජනය කරමින් 2024 පැරිස් ඔලිම්පික් ක්‍රීඩා උළෙලට සුදුසුකම් ලබා තිබේ.

මෙවර පැරිස් ඔලිම්පික් කාන්තා මීටර 800 ඉසව්ව සඳහා ක්‍රීඩිකාවන් 48 දෙනෙකු සුදුසුකම් ලබා ගන්නා අතර එම ශ්‍රේණිගත කිරීම්වල 45වැනි ස්ථානයේ පසුවන තරුෂි ඒ සඳහා අවස්ථාව හිමිවුණි.

එමෙන්ම දිල්හානි ලේකම්ගේ කාන්තා හෙල්ලය විසි කිරීමේ ඉසව්වෙහි ශ්‍රේණිගත කිරීම්වල 26වැනි ස්ථානයේ පසු වන අතර එම ඉසව්වෙන් පැරිස් ඔලිම්පික් උලෙළට සුදුසුකම් ලබාගන්නේ ක්‍රීඩිකාවන් තිස් දෙදෙනෙකු පමණි.