සිරියාවේ පාර්ලිමේන්තු මැතිවරණය ඔක්තෝබර් 5 වනදා පැවැත්වීමට නියමිත බව විදෙස් මාධ්‍ය වාර්තා කරයි.

සිරියාවේ නායකයෙකු ලෙස වසර 25කට ආසන්න කාලයක් කටයුතු කළ බෂාර් අල්-අසාද් බලයෙන් පහ කිරීමෙන් පසු පැවැත්වෙන පළමු මැතිවරණය මෙය වේ.

නියම අනුව පාර්ලිමේන්තුවේ 210 සභික ධුරයන්ගෙන් 140ක් ඡන්දයෙන් තේරී පත් වන අතර ඉතිරි 70ක් ජනාධිපතිවරයා විසින් සෘජුවම පත් කරනු ඇත.

අසාද් පසුගිය දෙසැම්බර් මාසයේදී රුසියාවට පලා ගිය අතර, 1963 සිට බලයේ පැවති බාත් පක්ෂ පාලනය ද එමඟින් අවසන් විය.

දකුණු කොරියාවේ නිෂ්පාදන හා ධීවර ක්ෂේත්‍රවල රැකියා සඳහා 2025 වර්ෂයේ පැවැත්වෙන කොරියානු භාෂා ප්‍රවීණතා විභාගය සඳහා ප්‍රවේශපත්‍ර නිකුත් කිරීම අද (15) ආරම්භ වූ අතර එය සැප්තැම්බර් 17 වන දින මධ්‍යම රාත්‍රිය දක්වා මාර්ගගත ක්‍රමය ඔස්සේ සිදුකෙරේ.

විභාගයට ලියාපදිංචි වීමට ශ්‍රී ලංකා විදේශ සේවා නියුක්ති කාර්යාංශයේ www.slbfe.lk වෙබ් අඩවිය භාවිතා කළ හැක.

අයදුම් කළ හැක්කේ 1985.09.15 සිට 2007.09.14 අතර උපන්, වයස අවුරුදු 18-39ක් අතර පුද්ගලයින්ටයි. නඩු නිමිත්තක වරදකරුවන්, දකුණු කොරියාව මඟින් පිටුවහල් කරනු ලැබූ අය, වර්ණ අන්ධතාවය, කොඳු ඇට ආබාධ, ඇඟිලි අඩුකිරීම් සහිත අය, හෝ E-9 සහ E-10 වීසා යටතේ 5 වසරට වැඩි කාලයක් සේවය කළ අය මෙයට අයදුම් කළ නොහැක.

අයදුම් කිරීම සඳහා වලංගු විදේශ ගමන් බලපත්‍රයේ ස්කෑන් පිටපතක්, 3.5 × 4.5 සෙ.මී. ප්‍රමාණයේ සුදු පසුබිම සහිත නව ඡායාරූපයක්, සහ රු. 8,428.40ක් වූ විභාග ගාස්තුව ගෙවූ බැංකු රිසිට්පතක් ඉදිරිපත් කළ යුතුය.

වැඩි විස්තර හා බැංකු ගිණුම් අංක ලබාගත හැක්කේ www.slbfe.lk වෙබ් අඩවියෙන්ය.

ජනාධිපති අරමුදල වත්මන් රජය යටතේ සම්පූර්ණයෙන්ම (100%) ජනතාව වෙනුවෙන් භාවිත වන බව අග්‍රාමාත්‍ය ආචාර්ය හරිනි අමරසූරිය මහත්මිය සදහන් කළාය.

ඇය මේ බව ප්‍රකාශ කළේ 2023 (2024) සහ 2024 අ.පො.ස. (උසස් පෙළ) විභාග ප්‍රතිඵල මත දිවයිනේ සෑම දිස්ත්‍රික්කයකම විශිෂ්ට දක්ෂතා දැක්වූ සිසු දරු දැරියන් ඇගයීමේ වැඩසටහනට සහභාගී වෙමින්, සැප්තැම්බර් 14 දින මහනුවර දිස්ත්‍රික් ලේකම් කාර්යාලයේදීය.

අගමැතිතුමිය සදහන් කළේ, ජනාධිපති අරමුදල අතීතයේදී වරප්‍රසාද ලැබූ පිරිස විසින් අවභාවිත කළත්, අද එය සම්පූර්ණයෙන්ම අරමුදලේ නියමිත අරමුණ සඳහා යොදා ගනී බවය.

ඇය වැඩිදුරටත් පෙන්වා දුන්නේ රජය මානව සම්පත දියුණු කිරීමේ වැදගත්කම හඳුනා ගෙන අධ්‍යාපනයට විශේෂ ආයෝජන කරන බවත්, වෙනස් වන ලෝකය සරලව සහ විවෘතව සිතන, නායකත්වය දැක්විය හැකි පුරවැසියන් බිහිකිරීම තම අරමුණ බවත්ය.

මෙම අවස්ථාවට පාර්ලිමේන්තු කථානායක වෛද්‍ය ජගත් වික්‍රමරත්න, මධ්‍යම පළාත් ආණ්ඩුකාර මහාචාර්ය එස්.බී.එස්. අභයකොන්, අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන, සෞඛ්‍ය නියෝජ්‍ය අමාත්‍ය වෛද්‍ය හංසක විජේමුණි ඇතුළු ජනප්‍රිය නියෝජිතයන් සහ රජයේ නියෝජිතයින් සහභාගී වූහ.

අගමැතිතුමිය විසින් විශිෂ්ට දක්ෂතා දැක්වූ සිසු දරු දැරියන්ට සහතික ප්‍රදානයද සිදු කරන ලදී.