ලුණු හිඟය හේතුවෙන් බේකරි කර්මාන්තය දැඩි අභියෝගයකට මුහුණදෙමින් සිටින බව සමස්ත ලංකා බේකරි හිමියන්ගේ සංගමයේ සභාපති එන්.කේ. ජයවර්ධන මහතා සඳහන් කරයි.

ඔහු කියා සිටියේ, පවතින ලුණු ගැටලුව පිළිබඳව අදාළ අමාත්‍යවරයා දැනුවත් කර ඇති අතර, අවශ්‍ය ප්‍රමාණයෙන් ලුණු සැපයීමට වග බලාගන්නා බව අමාත්‍යවරයා විසින් දැනුම් දී ඇති බවය.

මේ පිළිබඳව අදහස් දක්වමින් එන්.කේ. ජයවර්ධන මහතා සඳහන් කර සිටියේ බේකරි කර්මාන්තයට අත්‍යවශ්‍ය වන්නේ ලුණු කැට නොව, ලුණු කුඩු බවත් ලුණු හිඟය එළඹෙන සතියේදී හෝ විසඳේවි යැයි බලාපොරොත්තු වන බවත් සඳහන් කර සිටියා.

පවතින ලුණු හිඟය පිළිබඳව ප්‍රතිචාර ලෙස, ඉන්දියාවෙන් ආනයනය කරන ලුණු තොගයක් ලබන බදාදා දිනයේදී ශ්‍රී ලංකාවට පැමිණෙන බව කර්මාන්ත හා ව්‍යවසායකත්ව සංවර්ධන අමාත්‍ය සුනිල් හදුන්නෙත්ති මහතා පවසයි.

අමාත්‍යවරයා සඳහන් කළේ, ලුණු ආනයනය ප්‍රමාද වීමට හේතුවක් ලෙස ඉන්දියාව සහ පාකිස්තානය අතර ඇතිවූ ආරවුල් සහගත තත්ත්වයද බලපෑ බවය.

අද පෙරවරුවේ පුත්තලම ලුණු සමාගමට පැමිණ නිරීක්ෂණ චාරිකාවක් සිදුකරනු ලැබූ අවස්ථාවේ මාධ්‍ය වෙත අදහස් දක්වමින් ඔහු මේ බව පැවසීය.

තවද අමාත්‍යවරයා අවධාරණය කළේ, සමහරුන් මහා පරිමාණයෙන් ලුණු මිලදී ගැනීමක් සිදුකරන බවත්, ඒ හේතුවෙන් වෙළෙඳපොළට පාලනයක් යටතේ ලුණු නිකුත් කිරීමට පියවර ගන්නා බවත්ය.

16 වන රණවිරු සැමරුමට සමගාමීව ආබාධිත රණවිරුවන් ඇගයීමේ උත්සවයක් අද (19) පස්වරුවේ මාතර රුහුණු පුරවර අභිමංසල ආබාධිත රණවිරුවන්ගේ පුනරුත්ථාපන මධ්‍යස්ථානයේදී පැවැත්විණි.
මේ සදහා පාර්ලිමේන්තු මන්ත්‍රී මහාචාර්යය එල්.එම් අබේවික්‍රම මහතා සහ අභිමංසල මධ්‍යස්ථානය නියෝජනය කරමින් මේජර් ජයන්ත දනේෂ්,ලුතිනල් නිලංගසිරි ඇතුලු නිළදාරීන් පිරිසක්ද සහබාගී වූහ.
පාර්ලිමේන්තු මන්ත්‍රී මහාචාර්යය එල්.එම් අබේවික්‍රම මහතා මධ්‍යස්ථානයේ සිටි ආබාධිත රණවිරුවන් සමග සුහද පිලිසදරක නිරත වූ අතර ඔවුන් සදහා වටිනා සමරු තිලිණයක්ද පිරිනමනු ලැබීය.

මේ රණවිරුවන් තම ජීවීත පරිත්‍යාගයෙන් දිනා දුන් මේ ජයග්‍රහණය වචන වලින් විස්තර කිරීමට නොහැකි බවත් මේ රජය යටතේ ආබාධිත රණවිරුවන්ගේ අවශ්‍යයතා නිබදව සොයාබැලීමට කැපවෙන බවත් මාධ්‍ය වෙත අදහස් දක්වමින් පාර්ලිමේන්තු මන්ත්‍රී එල්.එම් අබේවික්‍රම මහතා වැඩිදුරටත් පැවසීය.