ප්‍රංශයේ පැරිස් නගරයේදී පාපන්දු ප්‍රේක්ෂකයින් අතර ඇතිවූ ගැටුමක් හේතුවෙන් පුද්ගලයින් 559 දෙනෙකු අත්අඩංගුවට ගෙන තිබේ.

විදෙස් මාධ්‍ය වාර්තා කරන ආකාරයට, ජර්මනියේ පැවැත්වූ යුරෝපා චැම්පියන්ස් ලීග් අවසන් මහ තරඟය නරඹමින් සිටි ප්‍රංශ ප්‍රේක්ෂකයන් අතර මෙම ගැටුම උත්සන්න වී ඇත.

මෙම තරඟයෙන් ප්‍රංශයේ පැරිස් සෙන් ජර්මෙයි (ඵ්Sඝ්) කණ්ඩායම ඉතිහාසයේ පළමු වරට යුරෝපා ශූරතාව දිනා ගත්තේ ය.

මෙය සැමරීමට පැරිස් නගරයට විශාල පිරිසක් එක්වී ඇති අතර, එහිදී ඇතිවූ ගැටුමකින් පුද්ගලයින් දෙදෙනෙකු මියගොස් ඇත.

තවද, 190කට අධික පිරිසක් තුවාල ලබා ඇති අතර, ඔවුන් අතර පොලිස් නිලධාරීන් 9 දෙනකුද සිටිති.

කලහකාරී ලෙස හැසිරුණු පිරිසක් විසින් වෙළෙඳසැල් කිහිපයක්, බස් නැවතුම්පොළක් හා මෝටර් රථයක්ද විනාශ කර ඇති බව විදෙස් මාධ්‍ය වාර්තා කරයි.

ඇමරිකානු ජනාධිපති ඩොනල්ඩ් ට්‍රම්ප් විසින් ගෙන ගිය දැඩි තීරුබදු තීරණයක් එක්සත් ජනපද ෆෙඩරල් අධිකරණයක් විසින් අත්හිටුවා තිබේ.

මෑන්හැටන්හි පිහිටි ජාත්‍යන්තර වෙළඳ අධිකරණය ඊයේ (28) නිකුත් කළ නියෝගයකින් මෙම තීරණය ගෙන ඇති අතර, එය ජනාධිපති ට්‍රම්ප්ගේ ප්‍රධාන ආර්ථික ප්‍රතිපත්තිවලට දැඩි ආපදායක් ලෙස සැලකෙයි.

අධිකරණය විසින් දක්වා ඇත්තේ, එක්සත් ජනපද ආණ්ඩුක්‍රම ව්‍යවස්ථාව මගින් කොංග්‍රසයටම විදේශවෙළඳ නීති හා නියාමන පිළිබඳව සුවිශේෂී බලය ලබා දී ඇති බවත්, ජනාධිපතිවරයාට ආර්ථික ආරක්ෂාව සඳහා පනවන හදිසි නීති මගින් එම බලය ඉක්මවා යා නොහැකි බවත්ය.

ධවල මන්දිරය ක්‍රියාත්මක කළ හදිසි නීතියක් මත පදනම්ව ජනාධිපතිවරයාට එක්සත් ජනපදය සමඟ ව්‍යාපාර කරන සියලුම රටවල්ට තීරුබදු පනවීමට ඒකපාර්ශ්වික බලය හිමි නොවන බවත්, ත්‍රිපුද්ගල විනිසුරු මඬුල්ල විසින් ද අවධාරණය කර ඇත.

කෙසේ වෙතත්, මෙම තීරණයට එරෙහිව ට්‍රම්ප් පරිපාලනය වහාම අභියාචනයක් ඉදිරිපත් කර ඇති බවද වාර්තා වේ.

අමෙරිකාවේ ඉගෙනුම ලබන චීන ශිෂ්‍යයින් රැසකගේ වීසා අවලංගු කිරීමට අමෙරිකානු පරිපාලනය විසින් පියවර ගැනීමට සූදානම් වන බව වාර්තා වේ. ඩොනල්ඩ් ට්‍රම්ප්ගේ පරිපාලනය යටතේ මෙම තීරණය ගෙන ඇත්තේ, චීන කොමියුනිස්ට් පක්ෂය සමඟ සබඳතා ඇතිවීම හෝ තීරණාත්මක ක්ෂේත්‍රවල (උදාහරණයක් ලෙස තාක්ෂණය හා ආරක්ෂාව) ඉගෙනුම් ලබන සිසුන් සම්බන්ධයෙන් බවය.

මෙම තත්ත්වය පිළිබඳ නිවේදනයක් නිකුත් කළ අමෙරිකානු රාජ්‍ය ලේකම් මාර්කෝ රූබියෝ පවසා ඇත්තේ, ඉදිරියේදී චීන සහ හොංකොං ශිෂ්‍යයින් විසින් ඉදිරිපත් කරන ශිෂ්‍ය වීසා අයදුම්පත් වැඩි පරික්ෂාවකට ලක්වනු ඇති බවය.

එමෙන්ම අයදුම්කරුවන්ගේ සමාජ මාධ්‍ය ක්‍රියාකාරකම් නිරීක්ෂණය කිරීමේ ක්‍රමවේදයක් සකස් කරන තුරු ශිෂ්‍ය වීසා සම්බන්ධ සම්මුඛ පරීක්ෂණ තාවකාලිකව අත්හිටුවා ඇති අතර, එම තීරණය අදාළ වීමෙන් හෙට දිනයේ නව වීසා අවලංගු කිරීම් සම්බන්ධ තීන්දුවත් ප්‍රකාශයට පත්වීම විශේෂත්වයකි.