Connect with us

Local News

ආයෝජන කැඳවා ගැනීමට නව දිශානතියක් ඔස්සේ අවධානය යොමු කිරීම ඉතා වැදගත් – ජනපති…

Published

on

ශ්‍රී ලංකාවට විදේශ ආයෝජන ඇද දීම සඳහා නව මාර්ගෝපදේශයක් සකස් කරමින් ක්‍රියාත්මක වීම අවශ්‍ය බව ජනාධිපති අනුර කුමාර දිසානායක මහතා පවසයි.

2024 වසරේ පළමු කාර්තුවට සාපේක්ෂව 2025 වසරේ පළමු කාර්තුව තුළදී ශ්‍රී ලංකාවට සෘජු විදේශ ආයෝජන ඩොලර් මිලියන 96කින් වර්ධනයක් ලබා ගැනීමට හැකි වී ඇති බව ශ්‍රී ලංකා ආයෝජන මණ්ඩලය සඳහන් කළේය.

මෙය අද (20) පෙරවරුවේ ජනාධිපති ලේකම් කාර්යාලයේදී පැවති ආයෝජන මණ්ඩලයේ ප්‍රගති සමාලෝචන රැස්වීමේදී අනාවරණය විය.

2025 වසරේ පළමු කාර්තුවේදී දේශීය ආයෝජන ඩොලර් මිලියන 21කින් සහ අපනයන ආදායම ඩොලර් මිලියන 176කින් වර්ධනය වී ඇති බවත්, මේ දක්වා කාලය තුළ ශ්‍රී ලංකාවට ලැබී ඇති මුළු විදේශ ආයෝජන ඩොලර් මිලියන 4669ක් බවත් නිලධාරීහු පැවසූහ.

රටට ආයෝජන ආකර්ෂණය කිරීමේ දී ඇති ගැටලු හා අභියෝග සඳහා ප්‍රායෝගික විසඳුම් සෙවීමත්, කාර්යක්ෂම ක්‍රියාමාර්ග හඳුනා ගැනීමත් මෙම රැස්වීමේදී විශේෂ අවධානයට ලක් විය.

ජනාධිපතිවරයා මෙහිදී පැවසූවේ, ග්‍රාමීය ජනතාවගේ ජීවන තත්ත්වය වැඩි දියුණු කිරීම සඳහා ආයෝජන මණ්ඩලය ඉතා වැදගත් භූමිකාවක් ඉටු කළ යුතු බවයි. සාම්ප්‍රදායික ක්ෂේත්‍රවලට සීමා වීමෙන් වඩාත් ප්‍රයෝජනවත් වන නව ආයෝජන ක්ෂේත්‍ර හඳුනාගෙන, ඒවා තුළ විශේෂ අවධානයක් යොමු කළ යුතු බවද ඔහු අවධාරණය කළේය.

1978 වසරේ සිට මෙරටට ලැබී ඇති මුළු ආයෝජන ප්‍රමාණය ඩොලර් බිලියන 22ක් පමණ බව සඳහන් කරමින්, වියට්නාමය වැනි රටවල් එක් වසරකදී පමණක් ඩොලර් බිලියන 23ක ආයෝජන ආකර්ෂණය කිරීමට සමත් වී ඇති බව ජනාධිපතිවරයා උදාහරණයක් ලෙස පැවසීය.

ආයෝජන මණ්ඩලය සම්භවිත අවස්ථා පසුපස දිව යාමට පමණක් නොව, නව ආයෝජන හැකියාවන් සෙවීම සඳහා ද ක්‍රියා කළ යුතු බවද, සේවා අංශය වැනි ක්ෂේත්‍රවලට වැඩි අවධානයක් යොමු කළ යුතු බවද ජනාධිපතිවරයා තවදුරටත් පෙන්වා දුන්නේය.

මෙම අවස්ථාවට ආර්ථික කටයුතු පිළිබඳ ජ්‍යෙෂ්ඨ උපදේශක දුමින්ද හුලංගමුව, ආයෝජන මණ්ඩලයේ සභාපති අර්ජුන හේරත්, වැඩබලන අධ්‍යක්ෂ ජනරාල් රේණුකා වීරකෝන් යන අදාළ පාර්ශ්ව ඇතුළුව ජ්‍යෙෂ්ඨ නිලධාරීන් පිරිසක් සහභාගී වූහ.

Local News

තරුණයින් බස්නාහිර පළාත් පාලනයට යොදාගන්නා “YoLoGo” වැඩසටහන ඇරඹේ….

Published

on

By

බස්නාහිර පළාතේ පළාත් පාලන ආයතන හරහා ක්‍රියාත්මක සංවර්ධන කටයුතු සඳහා තරුණයින් සහයෝගී කර ගැනීමේ YoLoGo (Youth in Local Governance) වැඩසටහනේ සමාරම්භක උත්සවය අද (05) බස්නාහිර පළාත් ගරු ආණ්ඩුකාරවර හනීෆ් යුසූෆ් මහතාගේ සහ ශ්‍රී ලංකා කැනේඩියානු මහ කොමසාරිස් එරික් වෝල්ෂ් මහතාගේ ප්‍රධානත්වයෙන් බස්නාහිර පළාත් සභා ප්‍රධාන ශ්‍රවනාගාරයේ දී පැවැත්වූ අතර මෙම අවස්ථාවට තරුණ කටයුතු නියෝජ්‍ය අමාත්‍ය එරංග ගුණසේකර, රාජ්‍ය පරිපාලන,පළාත් සභා සහ පළාත් පාලන නියෝජ්‍ය අමාත්‍ය රුවන් සේනාරත්න, කොළඹ මහා නගරසභාවේ නගරාධිපති ව්‍රායි කැලී බල්තසාර් ඇතුළු මහත්ම මහත්මීන් පිරිසක් එක්ව සිටියේය.

ගරු ආණ්ඩුකාරවරයාගේ මෙහෙයවීම යටතේ ක්‍රියාත්මක මෙම සුවිශේෂ වැඩසටහන බස්නාහිර පළාත් සභාව සහ ශ්‍රී ලංකා කැනේඩියානු මහා කොමසාරිස් කාර්යාලය සමඟ ඒකාබද්ධව ක්‍රියාත්මක කිරීමට කටයුතු සුදානම් කර ඇති අතර මෙම වැඩසටහන හරහා වර්තමානය වන විට රාජ්‍ය පාලනයට අඩු දායකත්වයක් සපයන තරුණ නියෝජනය ඉහල ප්‍රතිශතයකින් දායක කරගැනීම අරමුණු කරයි.

1971,1987-89 තරුණ නැගිටීමට ප්‍රතිචාර දැක්වීමක් ලෙස මහාචාර්ය ලක්ෂ්මන් ජයතිලක මහතා විසින් 1990 වසරේ දී තරුණ කොමිසම හදුන්වාදුන් අතර පසුව පළාත් පාලන ආයතනවල තරුණයින් (18-35) සඳහා නිර්දේශිත 40% කෝටාව හදුන්වාදුන් බවත් 1990 අංක 25 දරන පළාත් පාලන ආයතන මැතිවරණ (සංශෝධන) පනත මගින් ද රාජ්‍ය පාලනයට තරුණයින් වැඩි වශයෙන් සම්බන්ධ කරගැනීමට ප්‍රයත්න දැරුවද වර්තමානය තෙක් එය අපේක්ෂිත මට්ටමින් සාර්ථක වී නොමැති බවත් ආණ්ඩුකාරවරයාගේ ප්‍රධානත්වයෙන් ක්‍රියාත්මක මෙම YoLoGo වැඩසටහන එම රික්තකය පිරවීමට ජාත්‍යන්තර සහයෝගය සහිතව දරන ප්‍රයත්නයක් බවත් මෙම සමාරම්භක උත්සවයේදී ආණ්ඩුකාරවරයාගේ මහජන සම්බන්ධතා නිලධාරී අරුණ ප්‍රදීප් කුමාර මහතා කියා සිටියේය.

මෙම වැඩසටහන යටතේ බස්නාහිර පළාතේ සියලුම නගර සහ ප්‍රාදේශීය සභා 49ක තරුණ මන්ත්‍රීවරුන් නියෝජිතයන් ලෙස පත්කරමින් පළාත් තරුණ පාලන ජාලයක් පිහිටුවන බවත්, ඔවුන්ගේ මෙහෙයවීම යටතේ තරුණයින්ගෙන් සමන්විත තරුණ උපදේශන කමිටු සෑදීමට කටයුතු කරන බවත් ආණ්ඩුකාරවරයා කියා සිටි අතර එතුමා අවධාරණය කරමින් කියා සිටියේ “තරුණයින් අනාගතය නොව, ඔවුන් මේ මොහොතේම නායකත්වය ගන්නා ජනතාවය” බවයි.

මෙම උත්සවයට සහබාගී වෙමින් තරුණ කටයුතු නියෝජ්‍ය අමාත්‍ය එරංග ගුණසේකර මහතා ප්‍රකාශ කර සිටියේ….

“අපි හරි කැමතියි පළාත් පාලන ආයතන සමඟ සහයෝගයෙන් වැඩ කරන්න මේ වන විට රජය විසින් වැඩපිළිවෙළක් සකස් කරලා තියෙනවා තරුණ සංගම්වල නායකයින් පළාත් පාලන ආයතනවල වැඩපිළිවෙළ හා සම්බන්ධ කරගන්න.
ලබන වසර තුළ පොලිටිකල් ඇකඩමියක් හදන්න බලාපොරොත්තු වෙනවා, ආණ්ඩුකාරතුමා සහ මෙම වැඩපිළිවෙළ හා සම්බන්ධ වූ සියලු දෙනා සමග එකට එකතු වෙන්න අපි කැමතියි.
රට පුරා සිටින තරුණ තරුණයන් අප අභිබවා යා යුතු බව අප නිරන්තරයෙන් විශ්වාස කරනවා”

Continue Reading

Local News

මන්ත්‍රී විශ්‍රාම වැටුප අහෝසි කිරීමේ යෝජනාවට පළිගැනීමක් නැහැ – අමාත්‍ය නලින්ද ජයතිස්ස

Published

on

By

පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කිරීම සම්බන්ධයෙන් කිසිදු පළිගැනීමක් සිදු නොවූ බවත්, මෙම යෝජනාව අලුත් දෙයක් නොවන බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවති මාධ්‍ය හමුවේදී පැවසීය.

මෙම යෝජනාව පිළිබඳව පක්ෂයක් ලෙස වසර 25කට අධික කාලයක් තිස්සේ අඛණ්ඩව කතා කළ බවත්, විපක්ෂයේ සිටියදී මේ පිළිබඳව ඉදිරිපත් කළ අදහස් ක්‍රියාත්මක කිරීමට අවස්ථාවක් ලැබුණේ ආණ්ඩුවට පැමිණි පළමු වතාවේදී බවත් ඔහු පැවසීය.

මන්ත්‍රී විශ්‍රාම වැටුප අහෝසි කිරීම පිළිබඳ නීතිමය ක්‍රියාවලිය මේ වනවිට ක්‍රමානුකූලව සිදුකරමින් පවතින බවත්, විවිධ අදහස් පැවතීම සාමාන්‍ය යැයිද සඳහන් කළේය.

මේ දිනවල රජය විසින් ආර්ථික වශයෙන් අපහසුතාවයට පත්ව සිටින පුද්ගලයින් සොයා බැලීම ප්‍රාදේශීය ලේකම් මට්ටමින් සිදුකරන බවත්, මන්ත්‍රීවරුන්ටද ජීවත් වීමට අසීරු නම් සාමාන්‍ය පුරවැසියෙකු ලෙස සහනාධාර ඉල්ලිය හැකි බවද ඔහු පැවසීය.

එවැනි ඉල්ලීම් ලැබී නොමැති බවත්, මෙය අනාගතයට බලපාන නව පනතක් වන අතර එය ක්‍රියාත්මක වන දිනයෙන් පසුව පමණක් විශ්‍රාම වැටුප අහෝසි වන බවද අමාත්‍යවරයා අවධාරණය කළේය.

Continue Reading

Local News

සංචාරක වීසා මත ව්‍යාපාරික කටයුතු කළ විදේශිකයින්ට නීතිමය පියවර – අමාත්‍ය නලින්ද ජයතිස්ස

Published

on

By

සංචාරක වීසා මත ශ්‍රී ලංකාවේ රැඳී සිටිමින් ව්‍යාපාරික කටයුතු සිදු කිරීම නීතිවිරෝධී බවත්, එවැනි ක්‍රියාකාරකම්වල නිරත වන විදේශිකයින්ට එරෙහිව නීතිමය පියවර ගෙන ඇති බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවසීය.

රජයේ ප්‍රවෘත්ති දෙපාර්තමේන්තුවේදී පැවති කැබිනට් තීරණ දැනුම්දීමේ මාධ්‍ය සාකච්ඡාවකදී ඔහු සඳහන් කළේය ‍ආරුගම්බේ, වැලිගම සහ උණවටුන ප්‍රදේශවලදී මෙවැනි විදේශිකයින් ව්‍යාපාරිකව ක්‍රියාත්මක වන බවට ලැබුණු පැමිණිලිවලට අනුව සිදු කළ පරික්ෂණවලින් පසුව පුද්ගලයින් කිහිපදෙනෙකු අත්අඩංගුවට ගෙන ඇති බවත්, ඔවුන්ගේ වීසා දික් කිරීමද නතර කර ඇති බවත්ය.

පොලිස් සංචාරක කොට්ඨාසයේ අධ්‍යක්ෂ සහකාර පොලිස් අධිකාරී ප්‍රභාත් විදානගම මහතා සඳහන් කළේ, උණවටුන ප්‍රදේශයේ ව්‍යාපාර පවත්වාගෙන ගිය බ්‍රිතාන්‍ය ජාතිකයින් දෙදෙනෙකුට එරෙහිවද නීතිමය පියවර ගෙන ඇති බවය. එමෙන්ම ශ්‍රී ලාංකික ව්‍යාපාරිකයින් තම නමින් වෙනත් පුද්ගලයින්ට අනීතිකව ව්‍යාපාරික කටයුතු සිදු කිරීමට ඉඩ නොදිය යුතු බවද ඒ මහතා අවධාරණය කළේය.

මෙරටට පැමිණෙන විදේශ සංචාරකයින්ගේ ආරක්ෂාව රජයේ වගකීමක් බවද, ඊයේ ආරුගම්බේ ප්‍රදේශයට පැමිණි රටවල් 20ක සංචාරකයන්ගෙන් 20% ක් පමණ ඊශ්‍රායල ජාතිකයින් වූ බවද අමාත්‍යවරයා වැඩිදුරටත් පවසා සිටියේය.

ඊශ්‍රායල ජාතිකයන්ගේ ආරක්ෂාවට විශේෂ පියවරක් ගෙන තිබේදැයි විමසූ මාධ්‍යවේදියෙකුගේ ප්‍රශ්නයට පිළිතුරු ලබා දෙමින්, පොලිසිය, විශේෂ කාර්යය බලකාය, යුද හමුදාව සහ ගුවන් හමුදාව යොදවා සියලු සංචාරකයන්ට ආරක්ෂාව සනාථ කරන බවද පොලිස් නියෝජිතයා පැවසීය.

Continue Reading

ප්‍රවණතාවන්