ඉරානය සටන් විරාමය පිළිගෙන ඇති නමුත්, ඊශ්‍රායලය තම රටට ප්‍රහාරයක් එල්ල කළහොත් ඉතා දැඩි ලෙස ප්‍රතිචාර දැක්වීමට සිදු වන බව ශ්‍රී ලංකාවේ ඉරාන තානාපති අලිරේසා දෙල්කොෂ් මහතා පවසයි.

අද (26) පැවති මාධ්‍ය හමුවකදී තානාපතිවරයා ප්‍රකාශ කළේ, ඉරානය කිසිදු පක්ෂයකට යටත් නොවන රටක් බවත්, තමන්ගේ න්‍යෂ්ටික තාක්ෂණික හැකියාව කිසිවෙකුට සොරාගත නොහැකි බවත්ය.

මේ අතර, ‘ඉරාන – ඊශ්‍රායල’ සටන් විරාමය අතරතුර යළි ගැටුම් ඇතිවිය හැකි බවට අමෙරිකානු ජනාධිපති ඩොනල්ඩ් ට්‍රම්ප් මහතා විසින් මතභේදාත්මක ප්‍රකාශයක් සිදුකර ඇති බව විදෙස් වාර්තා සඳහන් කරයි.

සටන් විරාමය කඩකළ ඉරාන මිසයිල ප්‍රහාරයට ප්‍රතිචාරයක් ලෙස ඊශ්‍රායලය, ටෙහෙරානයේ රේඩාර් පද්ධතියක් විනාශ කළ බව ඊශ්‍රායල අග්‍රාමාත්‍ය බෙන්ජමින් නෙතන්යාහු පවසයි.

කෙසේවෙතත්, අමෙරිකානු ජනාධිපති ඩොනල්ඩ් ට්‍රම්ප් සමඟ දුරකථන සංවාදයක් පසුකරන ලද පසු, ඊශ්‍රායල අග්‍රාමාත්‍යවරයා පවසා ඇත්තේ තවදුරටත් ප්‍රහාර එල්ල නොකළ බවයි.

ඊශ්‍රායලය සහ ඉරානය දෙරටම තමන් ප්‍රකාශ කළ සටන් විරාමය උල්ලංඝනය කර ඇති බව අමෙරිකානු ජනාධිපති ඩොනල්ඩ් ට්‍රම්ප් මහතා පවසයි.

එමනිසා මෙම රටවල් දෙක කෙරෙහි තමන් සතුටු නොවන බවත්, විශේෂයෙන් ඊශ්‍රායලයේ ක්‍රියාවලිය පිළිබඳව අප්‍රසාදය පළකරන බවත් ඔහු සඳහන් කළ බව විදෙස් මාධ්‍ය වාර්තා කරයි.

“බෝම්බ හෙලන්න එපා, ඔබේ ගුවන් නියමුවන් දැන්ම නැවත ගෙන්වා ගන්න” යනුවෙන් ඔහු ඊශ්‍රායලයෙන් ඉල්ලා ඇති අතර, ඉරානයට ගුවන් ප්‍රහාර එල්ල නොකරන ලෙසද දැඩි අනතුරු ඇඟවීමක් සිදු කර තිබේ.

“බෝම්බ ප්‍රහාර එල්ල කිරීම විශාල උල්ලංඝනයක්” යනුවෙන්ද ඔහු අවධාරණය කර තිබේ.

නෙටෝ සමුළුව සඳහා ධවල මන්දිරයෙන් පිටවෙමින් සිටියදී වාර්තාකරුවන්ට අදහස් දක්වමින් ඔහු ප්‍රකාශ කර ඇත්තේ, “ඉරානය උල්ලංඝනය කළා, නමුත් ඊශ්‍රායලයත් උල්ලංඝනය කළා. අපි ගිවිසුම් ඇතිකරගත් වහාම ඊශ්‍රායලය බෝම්බ ප්‍රහාර එල්ල කළා. එය මම දැකපු විශාලතම ප්‍රහාරයක්. මම ඉරානය ගැනත් සතුටු නෑ. ඊශ්‍රායලය ගැනත් සතුට නෑ. දෙපාර්ශවයම දැන් කරන්නේ මොකක්ද කියලා ඔවුන්වත් දන්නෙ නැහැ,” යනුවෙන්ද ට්‍රම්ප් මහතා සඳහන් කර තිබේ.