පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කිරීම සම්බන්ධයෙන් කිසිදු පළිගැනීමක් සිදු නොවූ බවත්, මෙම යෝජනාව අලුත් දෙයක් නොවන බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවති මාධ්‍ය හමුවේදී පැවසීය.

මෙම යෝජනාව පිළිබඳව පක්ෂයක් ලෙස වසර 25කට අධික කාලයක් තිස්සේ අඛණ්ඩව කතා කළ බවත්, විපක්ෂයේ සිටියදී මේ පිළිබඳව ඉදිරිපත් කළ අදහස් ක්‍රියාත්මක කිරීමට අවස්ථාවක් ලැබුණේ ආණ්ඩුවට පැමිණි පළමු වතාවේදී බවත් ඔහු පැවසීය.

මන්ත්‍රී විශ්‍රාම වැටුප අහෝසි කිරීම පිළිබඳ නීතිමය ක්‍රියාවලිය මේ වනවිට ක්‍රමානුකූලව සිදුකරමින් පවතින බවත්, විවිධ අදහස් පැවතීම සාමාන්‍ය යැයිද සඳහන් කළේය.

මේ දිනවල රජය විසින් ආර්ථික වශයෙන් අපහසුතාවයට පත්ව සිටින පුද්ගලයින් සොයා බැලීම ප්‍රාදේශීය ලේකම් මට්ටමින් සිදුකරන බවත්, මන්ත්‍රීවරුන්ටද ජීවත් වීමට අසීරු නම් සාමාන්‍ය පුරවැසියෙකු ලෙස සහනාධාර ඉල්ලිය හැකි බවද ඔහු පැවසීය.

එවැනි ඉල්ලීම් ලැබී නොමැති බවත්, මෙය අනාගතයට බලපාන නව පනතක් වන අතර එය ක්‍රියාත්මක වන දිනයෙන් පසුව පමණක් විශ්‍රාම වැටුප අහෝසි වන බවද අමාත්‍යවරයා අවධාරණය කළේය.

සංචාරක වීසා මත ශ්‍රී ලංකාවේ රැඳී සිටිමින් ව්‍යාපාරික කටයුතු සිදු කිරීම නීතිවිරෝධී බවත්, එවැනි ක්‍රියාකාරකම්වල නිරත වන විදේශිකයින්ට එරෙහිව නීතිමය පියවර ගෙන ඇති බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවසීය.

රජයේ ප්‍රවෘත්ති දෙපාර්තමේන්තුවේදී පැවති කැබිනට් තීරණ දැනුම්දීමේ මාධ්‍ය සාකච්ඡාවකදී ඔහු සඳහන් කළේය ‍ආරුගම්බේ, වැලිගම සහ උණවටුන ප්‍රදේශවලදී මෙවැනි විදේශිකයින් ව්‍යාපාරිකව ක්‍රියාත්මක වන බවට ලැබුණු පැමිණිලිවලට අනුව සිදු කළ පරික්ෂණවලින් පසුව පුද්ගලයින් කිහිපදෙනෙකු අත්අඩංගුවට ගෙන ඇති බවත්, ඔවුන්ගේ වීසා දික් කිරීමද නතර කර ඇති බවත්ය.

පොලිස් සංචාරක කොට්ඨාසයේ අධ්‍යක්ෂ සහකාර පොලිස් අධිකාරී ප්‍රභාත් විදානගම මහතා සඳහන් කළේ, උණවටුන ප්‍රදේශයේ ව්‍යාපාර පවත්වාගෙන ගිය බ්‍රිතාන්‍ය ජාතිකයින් දෙදෙනෙකුට එරෙහිවද නීතිමය පියවර ගෙන ඇති බවය. එමෙන්ම ශ්‍රී ලාංකික ව්‍යාපාරිකයින් තම නමින් වෙනත් පුද්ගලයින්ට අනීතිකව ව්‍යාපාරික කටයුතු සිදු කිරීමට ඉඩ නොදිය යුතු බවද ඒ මහතා අවධාරණය කළේය.

මෙරටට පැමිණෙන විදේශ සංචාරකයින්ගේ ආරක්ෂාව රජයේ වගකීමක් බවද, ඊයේ ආරුගම්බේ ප්‍රදේශයට පැමිණි රටවල් 20ක සංචාරකයන්ගෙන් 20% ක් පමණ ඊශ්‍රායල ජාතිකයින් වූ බවද අමාත්‍යවරයා වැඩිදුරටත් පවසා සිටියේය.

ඊශ්‍රායල ජාතිකයන්ගේ ආරක්ෂාවට විශේෂ පියවරක් ගෙන තිබේදැයි විමසූ මාධ්‍යවේදියෙකුගේ ප්‍රශ්නයට පිළිතුරු ලබා දෙමින්, පොලිසිය, විශේෂ කාර්යය බලකාය, යුද හමුදාව සහ ගුවන් හමුදාව යොදවා සියලු සංචාරකයන්ට ආරක්ෂාව සනාථ කරන බවද පොලිස් නියෝජිතයා පැවසීය.

1998 අංක 50 දරන ජාතික ළමා ආරක්ෂක අධිකාරි පනත කාලීන අවශ්‍යතාවයන්ට ගැළපෙන පරිදි සංශෝධනය කිරීම සඳහා කාන්තා සහ ළමා කටයුතු අමාත්‍යාංශය විසින් ඉදිරිපත් කළ අමාත්‍ය මණ්ඩල සංදේශයට අනුමැතිය හිමිව ඇත.

මෙම පනත මඟින් සියලු ආකාරයේ ළමා අපයෝජන වැළැක්වීම, එවැනි අපයෝජනවලට ගොදුරු වන ළමයින් ආරක්ෂා කිරීම සහ ප්‍රතිකාර කිරීම සඳහා ජාතික ප්‍රතිපත්තියක් සැකසීමේ කාර්යභාරය සපුරාලීමට 1998 වසරේදී ශ්‍රී ලංකා පාර්ලිමේන්තුව මඟින් සම්මත කරන ලදී.

කෙසේවෙතත් වසර 25 කට ආසන්න කාලයක් ගතවීමත් සමඟ, සමාජීය, ආර්ථික, දේශපාලනික සහ සංස්කෘතික වෙනස්කම්වල බලපෑම නිසා ළමයින්ට එරෙහිව සිදුවන අපයෝජන වඩාත් සංකීර්ණ ස්වභාවයක් ලබාගෙන ඇති බවත්, පවතින නීති රීති ඒ සඳහා නොහැකියාවෙන් පසුවන බවත් අවධාරණය කරයි.

එමනිසා, පනත සංශෝධනය කර ළමයින්ට එරෙහි සියලු ආකාරයේ අපයෝජන වැළැක්වීම, ප්‍රතිචාර දැක්වීම සහ නීතිමය පියවර ගන්නා ක්‍රමවේද වඩාත් සකස් කරන අයුරින් නව යෝජනා සකස් කර තිබේ.

මෙම සංශෝධන ක්‍රියාවලිය අරමුණු කරගනිමින් ඉදිරිපත් කළ යෝජනාවට අමාත්‍ය මණ්ඩලය විසින් අනුමැතිය ලබාදී ඇත.