මාතලේ දිස්ත්‍රික් සම්බන්ධීකරණ කමිටු රැස්වීම, සම සභාපති මධ්‍යම පළාත් ආණ්ඩුකාර මහාචාර්ය එස්.බී.එස්. අභයකෝන් හා බුද්ධ ශාසන නියෝජ්‍ය අමාත්‍ය ගමගෙදර දිසානායක මහත්වරුන්ගේ ප්‍රධානත්වයෙන් අද (28) දිස්ත්‍රික් ලේකම් කාර්යාල ශ්‍රවනාගාරයේදී පැවැත්විනි.

මෙහිදී, දිස්ත්‍රික්කයේ ක්‍රියාත්මක වන ව්‍යාපෘති සියල්ල මේ වසර තුළම නිම කර දමන ලෙසත්, වෙන්කර ඇති මුදල් නව වසරට අවිච්ඡින්න නොවන ලෙසත් සභාපතිවරුන් සියළු ආයතනවලට අවධාරණය කළහ.

මධ්‍යම පළාත් සභා සංවර්ධන වැඩසටහන යටතේ මාතලේ දිස්ත්‍රික්කය සඳහා රු. මිලියන 2,794ක් වෙන් කර ඇති අතර, එමගින් වැඩ ඒකක 1,357 ක් ක්‍රියාත්මක වන බව දැනුම් දෙන ලදී. ඒ අතර අධ්‍යාපන අමාත්‍යාංශය යටතේ ව්‍යාපෘති 531ක්, කර්මාන්ත 253ක්, කෘෂිකර්ම 246ක්, සෞඛ්‍ය 89ක් සහ ප්‍රධාන ලේකම් කාර්යාලය යටතේ ව්‍යාපෘති 48ක් ඇතුළත්ය.

තවද, විමධ්‍යගත සංවර්ධන වැඩසටහන යටතේ ව්‍යාපෘති 47ක් ක්‍රියාත්මක වන අතර, ඒවගෙන් 16 දැනට අවසන් කර තිබේ. දිස්ත්‍රික්කයේ ප්‍රාදේශීය ලේකම් කොට්ඨාශ 11 තුළ විවිධ ක්ෂේත්‍රවලට රු. මිලියන 400කට අධික මුදලක් වෙන් කර ඇති බවත් සදහන් විය.

අමතරව, විහාරස්ථාන 9ක් සංවර්ධනය කෙරෙමින් ඇති අතර, වතු ජනතාව සඳහා නිවාස 23ක් ඉදි කිරීමේ ව්‍යාපෘතියට රු. මිලියන 77.4 වෙන් කර තිබේ. සංචාරක කර්මාන්තය දියුණු කිරීම සඳහා සීගිරිය හස්ත කර්මාන්ත ගම්මානයේ සංවර්ධනයට රු. මිලියන 37ක් වෙන් කෙරේ.

සමෘද්ධි වැඩසටහන යටතේ ප්‍රතිලාභීන් 137 දෙනා සවිබල ගැන්වීම සඳහා රු. මිලියන 10.7ක් වෙන් කර ඇති අතර, ගොවිජන සංවර්ධන දෙපාර්තමේන්තුව මගින් රු. මිලියන 96ක් යොදවා ව්‍යාපෘති 79 ක් ක්‍රියාත්මක කෙරේ. එක මිටට ගොවි බිමට වැඩසටහන යටතේ වගා නොකළ ඉඩම් නැවත වගා කිරීම සඳහා හෙක්ටයාර 1000ක් යොදාගැනීමට ද සැලසුම් කර ඇත.

මෙම රැස්වීමට දිස්ත්‍රික් පාර්ලිමේන්තු මන්ත්‍රීවරුන්, මධ්‍යම පළාත් සභා සභාපති, නගරාධිපතිවරුන්, ප්‍රාදේශීය සභා සභාපතිවරුන්, මධ්‍යම පළාත් ප්‍රධාන ලේකම්, අමාත්‍යාංශ ලේකම්වරුන්, දෙපාර්තමේන්තු ප්‍රධානීන්, දිස්ත්‍රික් ලේකම් ප්‍රසන්න මදනායක සහ ප්‍රාදේශීය ලේකම්වරුන් ඇතුළු රාජ්‍ය නිලධාරීන් රැසක් සහභාගී වූහ.

හිටපු අමාත්‍ය රාජිත සේනාරත්න සහ පාර්ලිමේන්තු මන්ත්‍රී නිමල් ලංසාට ඔවුන්ගේ නිවෙසවලින් ආහාර රැගෙන ඒමට අවසර ලබාදුන් බව බන්ධනාගාර දෙපාර්තමේන්තුවේ මාධ්‍ය ප්‍රකාශක ජගත් වීරසිංහ මහතා සඳහන් කරයි. ඔහු පැවසුවේ එය ඔවුන්ගේ ඉල්ලීමකට අනුව සලස්වා ඇති බවයි.

රාජිත සේනාරත්න මහතා ලබන 9 වැනිදා දක්වා රක්ෂිත බන්ධනාගාරගත කර ඇති අතර, කිරිඳ ධීවර වරායේ වැලි කැණීම් ව්‍යාපෘතිය කොරියානු සමාගමකට ලබාදී රජයට රුපියල් කෝටි 200ට අධික පාඩුවක් කිරීමේ චෝදනා ඔහුට එල්ල වී ඇත.

නිමල් ලංසා මහතා ලබන 12 වැනිදා දක්වා රක්ෂිත බන්ධනාගාරගත කර ඇති අතර, 2006 පළාත් පාලන මැතිවරණ කාලයේ මීගමුව උප නගරාධිපතිවරයාගේ නිවසට පහරදී අනර්ථයක් සිදුකිරීමේ චෝදනා යටතේ ඔහුට එරෙහිව නඩු ගොනු කර ඇත.

ඊයේ දිනයේදී රටේ විවිධ ප්‍රදේශවල සිදුවූ මාරක රිය අනතුරු කිහිපයකින් පුද්ගලයින් තිදෙනෙකු ජීවිතක්ෂයට පත්ව ඇති බව පොලීසිය සඳහන් කරයි.

ඇඹිලිපිටිය මොරකැටිය මාර්ගයේ 09 ඇල ප්‍රදේශයේදී ත්‍රීරෝද රථයක් යතුරුපැදියක ගැටීමෙන් සිදු වූ අනතුරකින් 75 හැවිරිදි ත්‍රීරෝද රථ රියදුරු මියගොස් ඇත.

හික්කඩුව ප්‍රදේශයේ ගාල්ල–කොළඹ ප්‍රධාන මාර්ගයේදී යතුරුපැදියකට ලොරි රථයක් ගැටීමෙන් 23 හැවිරිදි අඟුරුවාතොට පදිංචිකරුවෙකු ජීවිතක්ෂයට පත්ව තිබේ.

තවද නොච්චියාගම ප්‍රදේශයේදී මෝටර් රථයක් මාර්ගය හරහා ගමන්ගත් කාන්තාවක් ගැටීමෙන් 75 හැවිරිදි වෙන්නප්පුව පදිංචිකාරිය මියගොස් ඇති බවද පොලීසිය කියයි.

මෙම අනතුරු සම්බන්ධයෙන් පොලීසිය වැඩිදුර විමර්ශන සිදුකරමින් පවතී.