2025 වසරේ මේ දක්වා ශ්‍රී ලංකාවට පැමිණ ඇති සංචාරකයින් ගණන ලක්ෂ 16 ඉක්මවා තිබෙන බව ශ්‍රී ලංකා සංචාරක සංවර්ධන අධිකාරිය නිකුත් කළ නවතම සංඛ්‍යා ලේඛනවල සඳහන් වේ.

ඊයේ (07) වන විට 1,604,018ක් දක්වා විදේශ සංචාරකයින් මෙරටට පැමිණ ඇති අතර, සැප්තැම්බර් මාසයේ මුල් දින හත තුළ සංචාරකයින් 37,495ක් ශ්‍රී ලංකාවට පිවිස තිබේ.

සැප්තැම්බර් මාසයේදී ඉන්දියාවෙන් 10,171ක් (27.1%) පැමිණ ඇති අතර, එක්සත් රාජධානියෙන් 3,033ක්, ජර්මනියෙන් 2,426ක්, ඔස්ට්‍රේලියාවෙන් 1,806ක් සහ චීනයෙන් 1,803ක් මෙරටට පැමිණ තිබේ.

මෙම වසරේ මුළු සංචාරක සංඛ්‍යාවෙන් ඉන්දියාවෙන් 335,766ක්, එක්සත් රාජධානියෙන් 154,174ක් සහ රුසියාවෙන් 119,592ක් පැමිණ ඇති බවද සංචාරක සංවර්ධන අධිකාරිය වැඩිදුරටත් නිවේදනය කරයි.

2025 වසරේ පළාත් පාලන සතිය සැප්තැම්බර් 15 සිට 21 දක්වා “පුනරුදයේ පුරවරය” යන තේමාව යටතේ පවත්වන බව පළාත් සභා සහ පළාත් පාලන නියෝජ්‍ය අමාත්‍ය ප්‍රභා රුවන් සෙනෙරත් මහතා ප්‍රකාශ කළේය.

2016දී අවසන් වරට පවත්වා තිබූ පළාත් පාලන සතිය, නව රජය බලයට පත්වීමෙන් පසු පවත්වන පළමු අවස්ථාව බවද එහිදී සදහන් කරන ලදි.

“පුනරුදයේ පුරවර” සතිය තුළ ජනතා අවශ්‍යතා සපිරීම, ජීවත්වෙන පරිසරය සුරැකීම සහ අනාගත දැක්මක් ඇති නගරයක් බිහිකිරීම සඳහා රාජ්‍ය පරිපාලන, පළාත් සභා හා පළාත් පාලන අමාත්‍යංශය මෙහෙයවනු ඇත.

එම සතියේ දිනයන් සඳහා විශේෂ වැඩසටහන් නම්කර ඇති අතර,

• සැප්තැම්බර් 15 – ජංගම සේවා දිනය,
• 16 – පරිසර සහ රුක් රෝපණ දිනය,
• 17 – සෞඛ්‍ය හා සනීපාරක්ෂක දිනය,
• 18 – ආදායම් ප්‍රවර්ධන දිනය,
• 19 – සාහිත්‍ය, අධ්‍යාපන හා පුස්තකාල දිනය,
• 20 – මහජන උපයෝගීතා දිනය,
• 21 – සහතික පත්‍ර ප්‍රදානය හා සමාප්තිය යැයි සඳහන් කෙරේ.

රාජ්‍ය පරිපාලන අමාත්‍ය ආචාර්ය ඒ. එච්. එම්. එච්. අබේරත්න මහතා පෙන්වා දුන්නේ, සතිය පුරා ඇති වැඩසටහන් රජයේ ප්‍රධාන ව්‍යාපෘති තුනක් ආවරණය කරන බවත්, විශේෂයෙන් කැලි කසල බැහැර කිරීම, ආයතනගත ගැටලු විසඳීම සහ ඩිජිටල්කරණය පිළිබඳ වැඩපිළිවෙලට අදාළ වැඩසටහන් සිදු කරන බවත්ය.

මෙම සතියේ අවසාන ඉලක්කය වන්නේ ජනතාවගේ දුප්පත්කම අඩු කර ශක්තිමත් ආර්ථිකයක් සහිත සතුටින් ජීවත්විය හැකි ප්‍රජාවක් බිහිකිරීම බවද ඔහු අවධාරණය කළේය.

මෙරට සෞඛ්‍ය සේවාවේ විශ්ව සෞඛ්‍ය අගයන් තවත් ඉහළට නංවීමට නව වැඩපිළිවෙලක් යටතේ දන්ත වෛද්‍ය උපාධිධාරීන් 86 දෙනෙකු සීමාවාසික පුහුණුවට බඳවා ගැනීමට අද (08) පියවර ගන්නා ලදි.

කොළඹ හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු ආයතනයේදී පැවති උත්සව සභාවට සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ප්‍රධානත්වය දරන අතර, නව සීමාවාසික වෛද්‍යවරයන්ට පත්වීම් ලිපි මෙහිදී ලබා දින ලදි.

අමාත්‍යවරයා සඳහන් කළේ ජනතාවගේ සෞඛ්‍ය සේවාව විද්‍යාත්මකව හා සැලසුම් සහගතව සංවර්ධනය කරමින්, විශ්ව සෞඛ්‍ය ආවරණයේ දී ශ්‍රී ලංකාව තවත් ඉහළට ගෙන යෑම තමන්ගේ ප්‍රධාන අරමුණ බවයි.

මෙම අවස්ථාවට සෞඛ්‍ය අමාත්‍යාංශයේ නිලධාරීන්, දන්ත වෛද්‍ය විද්‍යාඥයන් සහ විද්‍යාපීඨ නියෝජිතයින් ද සහභාගි වී සිටියහ.