පළාත් පාලන මැතිවරණය කල් දැමීමට ජනාධිපති රනිල් වික්‍රමසිංහ ගත් තීරණයට තමන් විරුද්ධ බව හිටපු ජනාධිපති මහින්ද රාජපක්ෂ මහතා පවසයි.
මාධ්‍යවේදීන් අමතමින් හිටපු අග්‍රාමාත්‍යවරයා ප්‍රකාශ කළේ මැතිවරණය පැවැත්වීම ජනාධිපතිවරයාගේ වගකීමක් බවයි.
“අපි ඕනෑම වෙලාවක මැතිවරණයට ඉදිරිපත් වෙන්න සූදානම්. මේ ආණ්ඩුව මැතිවරණය දිනයිද කියලා අවිනිශ්චිතයි, ඒ නිසා තමයි මැතිවරණය කල් දැම්මේ” මහින්ද රාජපක්ෂ මහතා වැඩිදුරටත් පැවසීය.

මාර්ග සංවර්ධන අධිකාරිය විසින් මාර්ග දෙපස දැල්වෙන විදුලි ලාම්පු සඳහා ගෙවන බිල්පත් ගෙවීම එම මාර්ගයේ අදාළ නගර සභාවලට හා ප්‍රදේශීය සභාවලට ඉදිරියේදී ගෙවීමට සිදුවන බව පවසයි. මේ වනවිට අදාළ විදුලි බිල්පත් මාර්ග සංවර්ධන අධිකාරියෙන් ගෙවන බව එහි අධ්‍යක්ෂ ජනරාල් එල්.වි.එස් විරකෝන් මහතා සඳහන් කළේය. මේ දිනවල ඉතා අපහසු තත්ත්වයෙන් මාර්ග නඩත්තු කටයුතු සිදු කරන බව ද ඔහු වැඩිදුරටත් පැවසීය.

අද (05) සිට පළාත් පාලන මැතිවරණය සඳහා තැපැල් ඡන්දය ලබා දීමට සුදුසුකම් ලැබූවන්ගේ අයදුම්පත් භාරගැනීම ආරම්භ කෙරෙන බව මැතිවරණ කොමිෂන් සභාව පවසනවා.

ඒ අනුව තැපැල් ඡන්දය ප්‍රකාශ කිරීම සඳහා සුදුසුකම් ලැබූවන් සිය අයදුම්පත් එළඹෙන ජනවාරි මස 23 වනදා මධ්‍යම රාත්‍රී 12.00 ට පෙර සිය ආයතන ප්‍රධානීන් හරහා ඉදිරිපත් කළ යුතු බවත්, එම දිනය නැවත කිසිසේත් දීර්ඝ නොකරන බවයි මැතිවරණ කොමිෂන් සභාව සඳහන් කරන්නේ.