ජාතික ගොඩනැගිලි පර්යේෂණ සංවිධානය විසින් දිස්ත්‍රික්ක 5කට අයත් ප්‍රදේශ කිහිපයකට නායයාමේ පූර්ව අනතුරු ඇඟවීමක් නිකුත් කර තිබේ.

අද (30) රාත්‍රී 9.00 සිට හෙට (31) රාත්‍රී 9.00 දක්වා පැවතිනු ලබන පැය 24 කාලය සඳහා කහ පැහැති පළමු මට්ටමේ මෙම අනතුරු ඇඟවීම නිකුත් කර ඇත්තේ විශේෂ විමසිල්ලෙන් කටයුතු කිරීමටයි.

අදාළ ප්‍රදේශ:

• ගාල්ල දිස්ත්‍රික්කය: බදදේගම
• මහනුවර දිස්ත්‍රික්කය: ගඟ ඉහළ කෝරළය
• කෑගල්ල දිස්ත්‍රික්කය: අරණායක
• නුවරඑළිය දිස්ත්‍රික්කය: අඹගමුව, නෝර්වුඩ්
• රත්නපුර දිස්ත්‍රික්කය: කිරිඇල්ල

අදාළ ප්‍රදේශවල ජනතාව නායයාමේ අවදානම සැලකිල්ලට ගනිමින් අවශ්‍ය ජාතික ආරක්ෂක ආයතනවල උපදෙස් පිළිපැදීම වැදගත්ය.

ඩෙංගු සහ චිකුන්ගුන්යා රෝග දෙකම වසංගත තත්ත්වයේ පවතින බව ශ්‍රී ලංකා වෛද්‍ය සංගමය පවසයි.

වෛද්‍ය ආනන්ද විජේවික්‍රම මහතා සඳහන් කරන්නේ, මෙම රෝග දෙකම බෝවනේ එකම මදුරුවාගෙන් වන අතර මුල් අවස්ථාවේ රෝග ලක්ෂණ සමාන බවය.

අද පැවති කොළඹ දිස්ත්‍රික් ප්‍රාදේශීය සම්බන්ධීකරණ කමිටු රැස්වීමේදී සෞඛ්‍ය අංශ පෙන්වා දුන්නේ, බස්නාහිර පළාතේ කොළඹ සහ ගම්පහ දිස්ත්‍රික්කවලින් රෝගීන් වැඩි වශයෙන් වාර්තා වන බවයි.

මෙම වසරේ මේ දක්වා කාලය තුළ 23,300කට වැඩි ඩෙංගු රෝගීන් සංඛ්‍යාවක් වාර්තා වී ඇති අතර 2009 වසරෙන් පසුව චිකුන්ගුන්යා රෝගීන් වැඩි වශයෙන් වාර්තා වීමද සිදුවී ඇත.

අලුතින් ශ්‍රී ලංකාවට පත්ව සිටින රටවල් හතක නව තානාපතිවරුන් අද (15) පෙරවරුවේ ජනාධිපති අනුර කුමාර දිසානායක මහතා වෙත ඔවුන්ගේ නිල අක්තපත්‍ර භාරදීම් සිදුකළහ.

මෙම නව තානාපතිවරුන් අදාළව පත්වී ඇත්තේ ආජන්ටිනා, සිම්බාබ්වේ, ඊශ්‍රායලය, පිලිපීන, ටජිකිස්තානය, කාම්බෝජය සහ ඩෙන්මාර්ක් රටවල් සඳහාය.

ආජන්ටිනා ජනරජය සඳහා නවදිල්ලියේ වාසික තානාපතිවරයා ලෙස මාරියානෝ අගුස්ටින් කච්චිනෝ මහතා පත්වී තිබේ. සිම්බාබ්වේ ජනරජය සඳහා තානාපතිවරිය ලෙස ස්ටෙලා න්කොමෝ මහත්මිය නම් කර ඇති අතර, ඊශ්‍රායලය සඳහා රූවෙන් හවීයර් අසාර් මහතා, පිලිපීන ජනරජය සඳහා නිනා පී. කයින්ග්ලට් මහත්මිය, ටජිකිස්තානය සඳහා ලුක්මොන් බොබොකලොන්සෝඩා මහතා, කාම්බෝජ රාජධානිය සඳහා රත් මැනි මහත්මිය සහ ඩෙන්මාර්ක් රාජධානිය සඳහා රස්මස් ක්‍රිස්ටෙන්සන් මහතා යන අය මෙම අවස්ථාවට එක්වූහ.

ජනාධිපතිවරයා මෙහිදී පැවසුවේ රට තුළ සිදුවී ඇති දේශපාලනික පරිවර්තනය පිළිබඳ පණිවුඩය ජාත්‍යන්තරයට ගෙනයාම හා ශ්‍රී ලංකාවේ ප්‍රතිරූපය ජාත්‍යන්තර වේදිකාවල ඔසවා තැබීම තානාපතිවරුන් සතු මූලික වගකීමක් බවය.

මෙම උත්සවය සඳහා විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා සහ ජනාධිපති ලේකම් ආචාර්ය නන්දික සනත් කුමානායක මහතා ද සහභාගී වූහ.