නවදිල්ලියේදී ඔක්තෝබර් 17 සහ 18 යන දිනවල පැවැත්වීමට නියමිත 2025 NDTV ලෝක සමුළුවට ශ්‍රී ලංකා අග්‍රාමාත්‍ය ආචාර්ය හරිනි අමරසූරිය සහ ඉන්දීය අග්‍රාමාත්‍ය නරේන්ද්‍ර මෝදි සහභාගී වීමට නියමිතය.

මෙම සමුළුවේදී ගෝලීය ප්‍රශ්න, ආර්ථික ප්‍රවණතා සහ ආගමනික ප්‍රතිපත්ති ආදිය පිළිබඳව ලෝක නායකයින් අතර විවෘත සංවාද පැවැත්වෙන බව සඳහන් වේ.

ඉන්දීය අග්‍රාමාත්‍යවරයාට සහ ශ්‍රී ලංකා අග්‍රාමාත්‍යවරියට අමතරව, එක්සත් රාජධානියේ හිටපු අග්‍රාමාත්‍ය රිෂි සුනක් සහ ඔස්ට්‍රේලියාවේ හිටපු අග්‍රාමාත්‍ය ටෝනි ඇබට් ද මෙම සමුළුවට සහභාගී වන නායකයින් අතරට එක්ව තිබේ.

සමාජ මාධ්‍ය ඔස්සේ ජනාධිපති කයිස් සයිඩ් මහතාට අපහාස කළ බවට චෝදනා එල්ල වූ 56 හැවිරිදි පුද්ගලයෙකුට ටියුනීසියාවේ අධිකරණය මරණ දඬුවම නියම කර ඇත.

මෙම තීන්දුව ජනාධිපතිවරයාට අපහාස කිරීම සහ ජාතික ආරක්ෂාවට තර්ජනය කිරීම යන චෝදනා මත නියම වූ බව, මානව හිමිකම් සඳහා වූ ටියුනීසියානු ලීගයේ ප්‍රධානියා සඳහන් කළේය.

2021දී ජනාධිපතිවරයා බලය අත්පත් කරගත් පසු, අදහස් ප්‍රකාශය සඳහා දැඩි සීමා පැනවූ පසුබිමකදී මෙම තීන්දුව ලබා ඇත. එය එරට අධිකරණ ඉතිහාසයේ විරල හා කම්පන සහගත තීන්දුවක් ලෙස සැලකේ.

නීතිඥවරයා සඳහන් කළේ, ඔහුගේ සේවාදායකයාට එරෙහිව එල්ලවූ චෝදනා ෆේස්බුක් සටහන් කිහිපයකට අදාළ බවත්, එම තීන්දුවට එරෙහිව අභියාචනයක් ද ඉදිරිපත් කර ඇති බවත්ය.

ටියුනීසියාවේ අධිකරණය මරණ දඬුවම් කිහිපයක් නියම කර තිබුණද, වසර 30කට අධික කාලයක් තිස්සේ ඒවා ක්‍රියාත්මක වී නොමැත.

එංගලන්ත පල්ලියේ ඉහළම ආගමික තනතුර වන කැන්ටබරියේ අගරදගුරු තනතුර, ඉතිහාසයේ පළමුවරට කාන්තාවක් වෙත පැවරීමෙන් නව අධ්‍යායයක් ආරම්භ වී ඇත.

වයස අවුරුදු 63ක් වූ සේරා මුලාලේ බිෂොප්වරිය, වසර 1,400කට පසු මෙම ගෞරවනීය තනතුර සඳහා නියමිත පළමු කාන්තාව ලෙස පත්වී ඇත.

බ්‍රිතාන්‍ය රාජාභිෂේකයන් අතර, කිරුළ පැළඳවීම වැනි විශේෂ භාරදූර්යයන් ඉටු කරන මෙම අගරදගුරු තනතුර කාන්තාවක් වෙත හිමිවීම, ඉතාමත් ඓතිහාසික සිදුවීමක් ලෙස සැලකේ.

එම තනතුරක් දරණ අගරදගුරුවරයා, ගෝලීය ඇන්ග්ලිකන් කතෝලිකයින්ගේ ආධ්‍යාත්මික නායකයා ලෙසද කටයුතු කරයි.