16 වන රණවිරු සැමරුමට සමගාමීව ආබාධිත රණවිරුවන් ඇගයීමේ උත්සවයක් අද (19) පස්වරුවේ මාතර රුහුණු පුරවර අභිමංසල ආබාධිත රණවිරුවන්ගේ පුනරුත්ථාපන මධ්‍යස්ථානයේදී පැවැත්විණි.
මේ සදහා පාර්ලිමේන්තු මන්ත්‍රී මහාචාර්යය එල්.එම් අබේවික්‍රම මහතා සහ අභිමංසල මධ්‍යස්ථානය නියෝජනය කරමින් මේජර් ජයන්ත දනේෂ්,ලුතිනල් නිලංගසිරි ඇතුලු නිළදාරීන් පිරිසක්ද සහබාගී වූහ.
පාර්ලිමේන්තු මන්ත්‍රී මහාචාර්යය එල්.එම් අබේවික්‍රම මහතා මධ්‍යස්ථානයේ සිටි ආබාධිත රණවිරුවන් සමග සුහද පිලිසදරක නිරත වූ අතර ඔවුන් සදහා වටිනා සමරු තිලිණයක්ද පිරිනමනු ලැබීය.

මේ රණවිරුවන් තම ජීවීත පරිත්‍යාගයෙන් දිනා දුන් මේ ජයග්‍රහණය වචන වලින් විස්තර කිරීමට නොහැකි බවත් මේ රජය යටතේ ආබාධිත රණවිරුවන්ගේ අවශ්‍යයතා නිබදව සොයාබැලීමට කැපවෙන බවත් මාධ්‍ය වෙත අදහස් දක්වමින් පාර්ලිමේන්තු මන්ත්‍රී එල්.එම් අබේවික්‍රම මහතා වැඩිදුරටත් පැවසීය.

රාගම “රණවිරු සෙවණ” සුවතා නිකේතනයේ නේවාසිකව ප්‍රතිකාර ලබන සෙබළුන්ගේ සුවදුක් විමසා බැලීම සඳහා ආරක්ෂක නියෝජ්‍ය අමාත්‍ය අරුණ ජයසේකර මහතා අද (19) පෙරවරුවේ එක් විය.
නේවාසිකව ප්‍රතිකාර ලබන සෙබළුන් වෙත ගොස් ඔවුන්ගේ තොරතුරු විමසූ නියෝජ්‍ය අමාත්‍යවරයා ඔවුන් සමඟ සුහද කතාබහකද නිරත විය.
තිස් අවුරුදු යුද්ධය හේතුවෙන් උතුරේත් දකුණේත් විශාල පිරිසකට තම ජීවිත මෙන්ම ශරීරාංග අහිමි වී සදාකාලික ආබාධිත තත්ත්වයට පත් වීමට සිදු ව ඇති බව පැවසූ නියෝජ්‍ය අමාත්‍යවරයා යළිත් එවැනි තත්ත්වයක් මෙරට ඇති නොවීමට රජය කටයුතු කරන බවද අවධාරණය කළේය. ආබාධිත තත්ත්වයට පත් සෙබළුන් මෙන්ම ඔවුන්ගේ පවුල්වල අභිවෘද්ධිය වෙනුවෙන් රජය අඛණ්ඩව කැප වන බවද නියෝජ්‍ය අමාත්‍ය අරුණ ජයසේකර මහතා සඳහන් කළේය.
මේ අතර නියෝජ්‍ය අමාත්‍යවරයා “රණවිරු සෙවණ” සුවතා නිකේතනයෙහි සේවයේ නිරත වෛද්‍යවරුන් ප්‍රමුඛ කාර්ය මණ්ඩලය සමඟද කතාබහක නිරත වෙමින් සෙබළුන් වෙනුවෙන් තවදුරටත් ලබා දිය හැකි වෛද්‍ය හා සේවා පහසුකම් සැපයීම පිළිබඳවද සොයා බැලීය.
නාවික හමුදාපති වයිස් අද්මිරාල් කාංචන බානගොඩ, ගුවන් හමුදාපති එයාර් මාර්ෂල් වී.බී. එදිරිසිංහ යන මහත්වරු සහ “රණවිරු සෙවණ” සුවතා නිකේතනයේ සේනා විධායක බ්‍රිගේඩියර් ඩබ්ලිව්.ඩී.එම්. කුමාරසිංහ මහතා ඇතුළු ත්‍රිවිධ හමුදාවේ ජ්‍යෙෂ්ඨ නිලධාරිහු පිරිසක් මෙම අවස්ථාවට එක්ව සිටියහ.

ශ්‍රී ලංකාවේ ප්‍රංශ තානාපති රෙමි ලැම්බර්ට් මහතා සහ විදේශ කටයුතු, විදේශ රැකියා හා සංචාරක අමාත්‍ය විජිත හේරත් මහතා අතර හමුවක් අද (19) විදේශ කටයුතු අමාත්‍යංශයේදී පැවැත්වුණි.

මෙම අවස්ථාවේදී තානාපතිවරයා ශ්‍රී ලංකා රජය දියත් කර ඇති දීර්ඝදර්ශී ආර්ථික වැඩපිළිවෙල සන්සුන්ව අගය කළ අතර, ජාත්‍යන්තර මට්ටමින් ශ්‍රී ලංකාව සමඟ ප්‍රංශය වැඩි සහයෝගය පළ කිරීමට කැමැත්තෙන් සිටින බවත් පැවසීය.

අමාත්‍ය විජිත හේරත් මහතා පවසා සිටියේ, ශ්‍රී ලංකාව සහ ප්‍රංශය අතර තිබෙන ද්විපාර්ශ්වික ණය ගිවිසුම ප්‍රතිව්‍යුහගත කිරීමේ ක්‍රියාවලිය ඉක්මනින් නිම කිරීම අවශ්‍ය බවය.

තානාපතිවරයාද පිළිතුරු ලෙස සඳහන් කළේ, මෙම ණය ප්‍රතිව්‍යුහගත කිරීම දෙපාර්ශ්වයටම අනාගතයේ වාසිදායක වන පරිදි ක්‍රියාත්මක කිරීමට ප්‍රංශය සූදානම් බවයි.