Connect with us

Local News

ශ්‍රී ලංකාවේ ආර්ථිකය ශක්තිමත් කිරීමට එක්සත් ජනපදයේ සහාය…

Published

on

ශ්‍රී ලංකාවේ ආර්ථිකය ශක්තිමත් කිරීම සඳහා අවශ්‍ය ඕනෑම සහයෝගයක් ලබාදීමට ඇමෙරිකානු එක්සත් ජනපදය එකඟතාව පළ කර ඇත. එමෙන්ම ශ්‍රී ලංකාවට අපනයන වෙළඳ ආර්ථිකයක් නිර්මාණය කිරීම සඳහා අවශ්‍ය සහයෝගය ලබාදෙන බව ශ්‍රී ලංකාවේ ඇමෙරිකානු තානාපති ජූලි චන්ග් මහත්මිය ප්‍රකාශ කළාය.

ජනාධිපති ලේකම් ආචාර්ය නන්දික සනත් කුමානායක මහතා හා ශ්‍රී ලංකාවේ ඇමෙරිකානු තානාපති ජූලි චන්ග් ( Julie Chung) මහත්මිය අතර ජනාධිපති ලේකම් කාර්යාලයේදී අද (08) පෙරවරුවේ පැවැති සාකච්ඡාවේදී මෙම කරුණු අනාවරණය විය.

ජනාධිපති අනුර කුමාර දිසානායක මහතාගේ ජයග්‍රහණය වෙනුවෙන් ඇමෙරිකානු එක්සත් ජනපද ජනාධිපති ජෝ බයිඩන් මහතාගේ සුබ පැතුම් පණිවිඩය ද ශ්‍රී ලංකාවේ ඇමෙරිකානු තානාපති ජූලි චන්ග් මහත්මිය විසින් ජනාධිපති ලේකම්වරයා වෙත මෙහිදී පිළිගන්වනු ලැබීය.

ශ්‍රී ලංකාවේ ආර්ථිකය නැංවීම සඳහා ජාත්‍යන්තර මූල්‍ය අරමුදල, එක්සත් ජනපද ජාත්‍යන්තර සංවර්ධන ඒජන්සිය (USAID) මඟින් ලබාදිය හැකි මූල්‍ය සහයෝග ලබාදීමට සූදානම් බව ද මෙහිදී ඇමෙරිකානු තානාපතිනිය සඳහන් කළාය.

වංචා දූෂණ අක්‍රමිකතා වැළැක්වීම සඳහා ජනාධිපති අනුර කුමාර දිසානායක මහතා ගෙනයන වැඩපිළිවෙලට මූල්‍ය සහ තාක්ෂණික දායකත්වය ලබාදීමටත්, යහපත් රාජ්‍ය පාලනයක් සඳහා ලබා දිය හැකි ඕනෑම සහයෝගයක් ලබාදීමටත් ශ්‍රී ලංකාවේ ආරක්ෂාව සුරක්ෂිත කිරීම සඳහා අවශ්‍ය ඕනෑම අවස්ථාවක සහයෝගය ලබාදීමටත් ඇමරිකානු එක්සත් ජනපදය සහතික විය.

පුනර්ජනනීය බල ශක්තිය, අපනයන කෘෂි කාර්මාන්තයක් ඇති කිරීමට හා ග්‍රාමීය දිළිඳුකම තුරන් කිරීම සඳහා නව ජනාධිපතිවරයා ගෙන යන වැඩපිළිවලටද සහයෝගය දක්වන බවද, දැනට ක්‍රියාත්මක වන ග්‍රාමීය පාසල් සඳහා දිවා ආහාරය ලබාදීමේ වැඩසටහන නාගරික පාසල් වලටද ඉදිරියේදී ලබාදීම සඳහා සහයෝගය දැක්වීමට ද කටයුතු කරන බව ඇමෙරිකානු තානාපති ජූලි චන්ග් මහත්මිය වැඩිදුරටත් ප්‍රකාශ කර සිටියා.

ශ්‍රී ලංකා සහ මාලදිවයින සඳහා එක්සත් ජනපද ජාත්‍යන්තර සංවර්ධන ඒජන්සියේ නියෝජ්‍ය අධ්‍යක්ෂ ජස්ටින් ඩිවෙනන්සො (Justin Divenanzo) සහ ආර්ථික විශේෂඥ ක්‍රිස්ටෝපර් ගූච් (Christopher Gooch) යන මහත්ම මහත්මීන් මෙම අවස්ථාවට එක්ව සිටියහ.

Local News

තරුණයින් බස්නාහිර පළාත් පාලනයට යොදාගන්නා “YoLoGo” වැඩසටහන ඇරඹේ….

Published

on

By

බස්නාහිර පළාතේ පළාත් පාලන ආයතන හරහා ක්‍රියාත්මක සංවර්ධන කටයුතු සඳහා තරුණයින් සහයෝගී කර ගැනීමේ YoLoGo (Youth in Local Governance) වැඩසටහනේ සමාරම්භක උත්සවය අද (05) බස්නාහිර පළාත් ගරු ආණ්ඩුකාරවර හනීෆ් යුසූෆ් මහතාගේ සහ ශ්‍රී ලංකා කැනේඩියානු මහ කොමසාරිස් එරික් වෝල්ෂ් මහතාගේ ප්‍රධානත්වයෙන් බස්නාහිර පළාත් සභා ප්‍රධාන ශ්‍රවනාගාරයේ දී පැවැත්වූ අතර මෙම අවස්ථාවට තරුණ කටයුතු නියෝජ්‍ය අමාත්‍ය එරංග ගුණසේකර, රාජ්‍ය පරිපාලන,පළාත් සභා සහ පළාත් පාලන නියෝජ්‍ය අමාත්‍ය රුවන් සේනාරත්න, කොළඹ මහා නගරසභාවේ නගරාධිපති ව්‍රායි කැලී බල්තසාර් ඇතුළු මහත්ම මහත්මීන් පිරිසක් එක්ව සිටියේය.

ගරු ආණ්ඩුකාරවරයාගේ මෙහෙයවීම යටතේ ක්‍රියාත්මක මෙම සුවිශේෂ වැඩසටහන බස්නාහිර පළාත් සභාව සහ ශ්‍රී ලංකා කැනේඩියානු මහා කොමසාරිස් කාර්යාලය සමඟ ඒකාබද්ධව ක්‍රියාත්මක කිරීමට කටයුතු සුදානම් කර ඇති අතර මෙම වැඩසටහන හරහා වර්තමානය වන විට රාජ්‍ය පාලනයට අඩු දායකත්වයක් සපයන තරුණ නියෝජනය ඉහල ප්‍රතිශතයකින් දායක කරගැනීම අරමුණු කරයි.

1971,1987-89 තරුණ නැගිටීමට ප්‍රතිචාර දැක්වීමක් ලෙස මහාචාර්ය ලක්ෂ්මන් ජයතිලක මහතා විසින් 1990 වසරේ දී තරුණ කොමිසම හදුන්වාදුන් අතර පසුව පළාත් පාලන ආයතනවල තරුණයින් (18-35) සඳහා නිර්දේශිත 40% කෝටාව හදුන්වාදුන් බවත් 1990 අංක 25 දරන පළාත් පාලන ආයතන මැතිවරණ (සංශෝධන) පනත මගින් ද රාජ්‍ය පාලනයට තරුණයින් වැඩි වශයෙන් සම්බන්ධ කරගැනීමට ප්‍රයත්න දැරුවද වර්තමානය තෙක් එය අපේක්ෂිත මට්ටමින් සාර්ථක වී නොමැති බවත් ආණ්ඩුකාරවරයාගේ ප්‍රධානත්වයෙන් ක්‍රියාත්මක මෙම YoLoGo වැඩසටහන එම රික්තකය පිරවීමට ජාත්‍යන්තර සහයෝගය සහිතව දරන ප්‍රයත්නයක් බවත් මෙම සමාරම්භක උත්සවයේදී ආණ්ඩුකාරවරයාගේ මහජන සම්බන්ධතා නිලධාරී අරුණ ප්‍රදීප් කුමාර මහතා කියා සිටියේය.

මෙම වැඩසටහන යටතේ බස්නාහිර පළාතේ සියලුම නගර සහ ප්‍රාදේශීය සභා 49ක තරුණ මන්ත්‍රීවරුන් නියෝජිතයන් ලෙස පත්කරමින් පළාත් තරුණ පාලන ජාලයක් පිහිටුවන බවත්, ඔවුන්ගේ මෙහෙයවීම යටතේ තරුණයින්ගෙන් සමන්විත තරුණ උපදේශන කමිටු සෑදීමට කටයුතු කරන බවත් ආණ්ඩුකාරවරයා කියා සිටි අතර එතුමා අවධාරණය කරමින් කියා සිටියේ “තරුණයින් අනාගතය නොව, ඔවුන් මේ මොහොතේම නායකත්වය ගන්නා ජනතාවය” බවයි.

මෙම උත්සවයට සහබාගී වෙමින් තරුණ කටයුතු නියෝජ්‍ය අමාත්‍ය එරංග ගුණසේකර මහතා ප්‍රකාශ කර සිටියේ….

“අපි හරි කැමතියි පළාත් පාලන ආයතන සමඟ සහයෝගයෙන් වැඩ කරන්න මේ වන විට රජය විසින් වැඩපිළිවෙළක් සකස් කරලා තියෙනවා තරුණ සංගම්වල නායකයින් පළාත් පාලන ආයතනවල වැඩපිළිවෙළ හා සම්බන්ධ කරගන්න.
ලබන වසර තුළ පොලිටිකල් ඇකඩමියක් හදන්න බලාපොරොත්තු වෙනවා, ආණ්ඩුකාරතුමා සහ මෙම වැඩපිළිවෙළ හා සම්බන්ධ වූ සියලු දෙනා සමග එකට එකතු වෙන්න අපි කැමතියි.
රට පුරා සිටින තරුණ තරුණයන් අප අභිබවා යා යුතු බව අප නිරන්තරයෙන් විශ්වාස කරනවා”

Continue Reading

Local News

මන්ත්‍රී විශ්‍රාම වැටුප අහෝසි කිරීමේ යෝජනාවට පළිගැනීමක් නැහැ – අමාත්‍ය නලින්ද ජයතිස්ස

Published

on

By

පාර්ලිමේන්තු මන්ත්‍රීවරුන්ගේ විශ්‍රාම වැටුප අහෝසි කිරීම සම්බන්ධයෙන් කිසිදු පළිගැනීමක් සිදු නොවූ බවත්, මෙම යෝජනාව අලුත් දෙයක් නොවන බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවති මාධ්‍ය හමුවේදී පැවසීය.

මෙම යෝජනාව පිළිබඳව පක්ෂයක් ලෙස වසර 25කට අධික කාලයක් තිස්සේ අඛණ්ඩව කතා කළ බවත්, විපක්ෂයේ සිටියදී මේ පිළිබඳව ඉදිරිපත් කළ අදහස් ක්‍රියාත්මක කිරීමට අවස්ථාවක් ලැබුණේ ආණ්ඩුවට පැමිණි පළමු වතාවේදී බවත් ඔහු පැවසීය.

මන්ත්‍රී විශ්‍රාම වැටුප අහෝසි කිරීම පිළිබඳ නීතිමය ක්‍රියාවලිය මේ වනවිට ක්‍රමානුකූලව සිදුකරමින් පවතින බවත්, විවිධ අදහස් පැවතීම සාමාන්‍ය යැයිද සඳහන් කළේය.

මේ දිනවල රජය විසින් ආර්ථික වශයෙන් අපහසුතාවයට පත්ව සිටින පුද්ගලයින් සොයා බැලීම ප්‍රාදේශීය ලේකම් මට්ටමින් සිදුකරන බවත්, මන්ත්‍රීවරුන්ටද ජීවත් වීමට අසීරු නම් සාමාන්‍ය පුරවැසියෙකු ලෙස සහනාධාර ඉල්ලිය හැකි බවද ඔහු පැවසීය.

එවැනි ඉල්ලීම් ලැබී නොමැති බවත්, මෙය අනාගතයට බලපාන නව පනතක් වන අතර එය ක්‍රියාත්මක වන දිනයෙන් පසුව පමණක් විශ්‍රාම වැටුප අහෝසි වන බවද අමාත්‍යවරයා අවධාරණය කළේය.

Continue Reading

Local News

සංචාරක වීසා මත ව්‍යාපාරික කටයුතු කළ විදේශිකයින්ට නීතිමය පියවර – අමාත්‍ය නලින්ද ජයතිස්ස

Published

on

By

සංචාරක වීසා මත ශ්‍රී ලංකාවේ රැඳී සිටිමින් ව්‍යාපාරික කටයුතු සිදු කිරීම නීතිවිරෝධී බවත්, එවැනි ක්‍රියාකාරකම්වල නිරත වන විදේශිකයින්ට එරෙහිව නීතිමය පියවර ගෙන ඇති බවත් සෞඛ්‍ය හා ජනමාධ්‍ය අමාත්‍ය, කැබිනට් මාධ්‍ය ප්‍රකාශක වෛද්‍ය නලින්ද ජයතිස්ස මහතා අද (05) පැවසීය.

රජයේ ප්‍රවෘත්ති දෙපාර්තමේන්තුවේදී පැවති කැබිනට් තීරණ දැනුම්දීමේ මාධ්‍ය සාකච්ඡාවකදී ඔහු සඳහන් කළේය ‍ආරුගම්බේ, වැලිගම සහ උණවටුන ප්‍රදේශවලදී මෙවැනි විදේශිකයින් ව්‍යාපාරිකව ක්‍රියාත්මක වන බවට ලැබුණු පැමිණිලිවලට අනුව සිදු කළ පරික්ෂණවලින් පසුව පුද්ගලයින් කිහිපදෙනෙකු අත්අඩංගුවට ගෙන ඇති බවත්, ඔවුන්ගේ වීසා දික් කිරීමද නතර කර ඇති බවත්ය.

පොලිස් සංචාරක කොට්ඨාසයේ අධ්‍යක්ෂ සහකාර පොලිස් අධිකාරී ප්‍රභාත් විදානගම මහතා සඳහන් කළේ, උණවටුන ප්‍රදේශයේ ව්‍යාපාර පවත්වාගෙන ගිය බ්‍රිතාන්‍ය ජාතිකයින් දෙදෙනෙකුට එරෙහිවද නීතිමය පියවර ගෙන ඇති බවය. එමෙන්ම ශ්‍රී ලාංකික ව්‍යාපාරිකයින් තම නමින් වෙනත් පුද්ගලයින්ට අනීතිකව ව්‍යාපාරික කටයුතු සිදු කිරීමට ඉඩ නොදිය යුතු බවද ඒ මහතා අවධාරණය කළේය.

මෙරටට පැමිණෙන විදේශ සංචාරකයින්ගේ ආරක්ෂාව රජයේ වගකීමක් බවද, ඊයේ ආරුගම්බේ ප්‍රදේශයට පැමිණි රටවල් 20ක සංචාරකයන්ගෙන් 20% ක් පමණ ඊශ්‍රායල ජාතිකයින් වූ බවද අමාත්‍යවරයා වැඩිදුරටත් පවසා සිටියේය.

ඊශ්‍රායල ජාතිකයන්ගේ ආරක්ෂාවට විශේෂ පියවරක් ගෙන තිබේදැයි විමසූ මාධ්‍යවේදියෙකුගේ ප්‍රශ්නයට පිළිතුරු ලබා දෙමින්, පොලිසිය, විශේෂ කාර්යය බලකාය, යුද හමුදාව සහ ගුවන් හමුදාව යොදවා සියලු සංචාරකයන්ට ආරක්ෂාව සනාථ කරන බවද පොලිස් නියෝජිතයා පැවසීය.

Continue Reading

ප්‍රවණතාවන්