අම්පාර කාවන්තිස්ස මධ්‍ය විද්‍යාලය, බලංගොඩ උඩගම මහා විද්‍යාලය හා ගම්පොළ ශාන්ත ජෝෂප් බාලිකා විද්‍යාලයවල ශිෂ්‍ය-ශිෂ්‍යාවන් අද (24) දිනයේදී ජනාධිපති මන්දිරය නැරඹීමට පැමිණියහ.

මෙම චාරිකාව ක්‍රියාත්මක වන්නේ ජනාධිපති කාර්‍යාලය, අධ්‍යාපන අමාත්‍යාංශය හා පාර්ලිමේන්තු ජනසන්නිවේදන අංශය එක්ව සංවිධානය කරන විශේෂ වැඩසටහනක් යටතේය. එහිදී සිසුන්ට ජනාධිපති මන්දිරය, ජනාධිපති කාර්‍යාලය, කොළඹ වරාය නගරය සහ ශ්‍රී ජයවර්ධනපුර පාර්ලිමේන්තුව නිරීක්ෂණය කිරීමට අවස්ථාව ලබා දී තිබුණි.

විධායකයෙහි කාර්යභාරය, නීතියේ ආධිපත්‍යය හා පාර්ලිමේන්තු ඉතිහාසය පිළිබඳවද අදාළ විදුහල්පතිවරුන් සහ ආචාර්ය මණ්ඩලය මගින් සිසුන්ට දැනුම් දෙන වැඩසටහනක් මෙයට සමගාමීව පැවැත්විය.

මෙම අවස්ථාවේදී “ක්ලීන් ශ්‍රී ලංකා” වැඩසටහන යටතේ පාසල්වලට වටිනා ශාක හා පුස්තකාල භාවිතය සඳහා පොත් ද නිකුත් කර තිබුණි.

සිසුන් හමුවේ අදහස් දැක්වූ ජනාධිපති මාධ්‍ය උපදේශක චන්දන සූරියබණ්ඩාර මහතා පැවසුවේ, කෘත්‍රිම බුද්ධිය වැනි නවීන තාක්ෂණයන් අතරතුර සත්‍ය ආචාරධර්මයන්ගෙන් යුතු පුරවැසියෙකු ගොඩනැගීම ගුරුවරුන්ගේ වගකීමක් බවත්, දුෂ්කර පාසල් නැති බවත්, කැපවීමෙන් සහ අරමුණක් ඇතිව කටයුතු කළහොත් සාර්ථකත්වයට ළඟාවිය හැකි බවත් ය.

එමෙන්ම ජනාධිපති ජ්‍යෙෂ්ඨ අතිරේක ලේකම් කේ. එම්. එන්. කුමාරසිංහ මහතා ඇතුළු ජනාධිපති උපදේශකයින්, හමුදා නිලධාරීන්, ආචාර්ය මණ්ඩලය සහ දෙමාපියන්ගේ පිරිසක්ද මෙම අවස්ථාවට සහභාගී වී සිටියහ.

ජනාධිපති අනුර කුමාර දිසානායක මහතා අද (24) දින වතිකාන තානාපති කාර්යාලය වෙත ගොස් අතිඋතුම් ශුද්ධෝත්තම ෆ්‍රැන්සිස් පාප් වහන්සේගේ ස්වර්ගස්ථ වීම පිළිබඳව තම ශෝකය පළ කළාය.

මෙහිදී ජනාධිපතිවරයා ශ්‍රී ලංකාවේ වතිකාන අපෝස්තලික තානාපති අගරදගුරු බ්‍රයන් උඩෙයිග්වේ හිමිපාණන් විසින් උණුසුම්ව පිළිගන්නා ලදී.

ඊට අනතුරුව, ජනාධිපතිවරයා හා උන්වහන්සේ අතර කෙටි සාකච්ඡාවක් ද සිදුවුණ අතර, ජනාධිපතිවරයා ශෝක සටහන් පොතේ සටහනක් තබමින්, අතිඋතුම් පාප්වහන්සේගේ ස්වර්ගස්ථ වීම නිමිත්තෙන් ලෝකයේ කිතුනු ජනතාවට සහ වතිකාන රාජ්‍යයට ශ්‍රී ලංකා රජයේ සහ ජනතාවගේ ගැඹුරු ශෝකය ලබාදෙන ලදී.

2025 මැයි මස 6 වනදා පැවැත්වීමට නියමිත පළාත් පාලන ආයතන ඡන්ද විමසීම හේතුවෙන්, දිවයිනේ සියලුම පාසල්වලට මැයි 5 සහ 6 දෙදින නිවාඩු ලබාදීමට අධ්‍යාපන අමාත්‍යාංශය තීරණය කර ඇති බව නිවේදනයක් මගින් පවසා තිබේ.

ඒ අනුව, පාසල් නැවත ආරම්භ වන්නේ මැයි 7 වැනිදාය.

මෙම ඡන්ද විමසීම සඳහා ඡන්ද මධ්‍යස්ථාන වශයෙන් යොදාගන්නා පාසල් 2025 මැයි 4 වැනිදා තුළ අදාළ ග්‍රාම නිලධාරීන් වෙත භාරදිය යුතු අතර, ඡන්ද කටයුතු සඳහා අවශ්‍ය මේස, පුටු සහ ශාලා පහසුකම් සපයාදිය යුතු බවත් නිවේදනයේ වැඩිදුරටත් සඳහන් වේ.

එසේම, පාසල් සඳහා නිවාඩු ලබාදිය යුතු දිනයන් විශේෂයෙන් සඳහන් කර ඇති අතර, පාසල් වේලාවෙන් පසුව භාවිතයට ඉල්ලා ඇති පාසල්, එදින පාසල පැවැත්වීමෙන් පසුව පමණක් මැතිවරණ කටයුතු සඳහා භාරදිය යුතුය.