විභාග කොමසාරිස් ජනරාල් තනතුර සඳහා ඒ. කේ. සුභාෂිණි ඉන්දිකා කුමාරි ලියනගේ මහත්මිය පත් කිරීම සඳහා කැබිනට් අනුමැතිය ලබා ඇති බව වාර්තා වේ.

මෙම පත්වීම සිදුකෙරෙන්නේ හිටපු විභාග කොමසාරිස් ජනරාල් එච්. ජේ. එම්. සී. ඒ. ජයසුන්දර මහතාගේ සේවා කාලය 2025 මැයි 06 දිනෙන් අවසන් වූ පසු ය.

සුභාෂිණි ඉන්දිකා කුමාරි ලියනගේ මහත්මිය දැනටමත් ශ්‍රී ලංකා විභාග දෙපාර්තමේන්තුවේ විභාග කොමසාරිස් ලෙස කටයුතු කරන අතර ශ්‍රී ලංකා අධ්‍යාපන පරිපාලන සේවයේ විශේෂ ශ්‍රේණියේ නිලධාරිනියෙකි.

ඒ අනුව පුරප්පාඩු වූ විභාග කොමසාරිස් ජනරාල් තනතුර සඳහා ඇය වහාම ක්‍රියාත්මක වන පරිදි පත් කිරීම සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ලෙස කටයුතු කරන අග්‍රාමාත්‍යවරිය ඉදිරිපත් කළ යෝජනාවට මෙලෙස කැබිනට් අනුමැතිය හිමිවී ඇත.

මෙරට ළමුන් 2000ත් 2500ත් අතර පිරිසක් තැලසිමියා රෝගයට ගොදුරු වී ඇති බව සෞඛ්‍ය අමාත්‍යාංශය සඳහන් කරයි.

අමාත්‍යාංශයේ බෝ නොවන රෝග ඒකකයේ අධ්‍යක්ෂ විශේෂඥ වෛද්‍ය සමිද්දි සමරකෝන් මහත්මිය පැවසුවේ, වසරකට උපත ලබන ළමුන්ගෙන් 40ත් 50ත් අතර පිරිසක් තැලසිමියා රෝගීන් ලෙස හඳුනාගෙන ඇති බවය.

තවද, රෝග වාහකයින් ලක්ෂ 5කට ආසන්න සංඛ්‍යාවක් මෙරට සිටින බවද, ජාත්‍යන්තර තැලසිමියා දිනය වෙනුවෙන් අද පැවති මාධ්‍ය හමුවකට එක්වෙමින් වෛද්‍ය සමරකෝන් මහත්මිය පැවසීය.

මෙවර තැලසිමියා දිනය “තැලසීමියා සමඟ එක්ව ප්‍රජාවන් එක්සත් කිරීම, රෝගීන්ට ප්‍රමුඛතාව දීම” යන තේමාව යටතේ සංවිධානය වෙයි.

විල්පත්තු අභයභූමිය හරහා යාමට යෝජනා කර තිබූ අධිවේගී මාර්ගය ඉදිකිරීම සිදු නොකරන බවට බලධාරීන් තීරණය කර ඇති බව නීතිපතිවරයා ශ්‍රේෂ්ඨාධිකරණය වෙත ඊයේ (07) දින දැනුම් දී ඇත.